«سكيفيادا» - ەجەلگى مادەنيەتتەن جەتكەن ءۇن

الماتى قالاسىندا قازاقستان رەسپۋبليكاسىنىڭ تاۋەلسىزدىگىنىڭ 20 جىلدىعى جانە قازاقستان رەسپۋبليكاسى ۇلتتىق كىتاپحاناسىنىڭ 80 جىل­دىعىنا وراي رەسەي جازۋشىلار وداعىنىڭ مۇشەسى امان­عالي سۇلتاننىڭ «سكيفيادا» اتتى ەكى تومدىق تاريحي كىتابىنىڭ تۇساۋكەسەر ءراسىمى ءوتتى. «سكيفيادا» تاريحي داستانى ەۋرازيا ايماعىندا ءومىر سۇرگەن ساق-سكيف تايپالارىنىڭ تۇر­مىس-تىرشىلىگىن, سالت-ءداستۇرى مەن ايگىلى بيلەۋشىلەرى, باتىرلارى حاقىندا جانە ساقتاردىڭ مى­سىر, قىتاي, ۆاۆيلون, اسسيريا سەكىلدى ەجەلگى وركەنيەتتەرمەن قارىم-قاتىناسى جايىندا, جال­پى كوشپەلى قاۋىمعا ءتان ادامي اسىل قاسيەتتەر مەن قۇندىلىق­تار تۋرالى تولعايدى. بۇعان دەيىن «ايدىن شال­قار», «جازعىتۇرىم جارشىسى», «كەڭ دالا», «قۇتتى مەكەن», ء«تالتۇس», «ۋاقىت ۋاعىزى» اتتى جىر جيناقتارى جارىق كورگەن اقىن امانعالي سۇلتان ساق-سكيفتەر تۋرالى تاريحي داستا­نىن جيىرما بەس جىل بويىنا تال­ماي, تاريحي ىزدەنىستەرگە سۇ­يە­نە وتىرىپ جازىپ شىققان. تۇساۋكەسەرگە ءتىل ءبىلىمىنىڭ مامانى, فيلولوگيا عىلىمدارى­نىڭ دوكتورى, پروفەسسور شورا سارىباەۆ, بەلگىلى جازۋشى, قو­عام قايراتكەرى سماعۇل ەلۋباي, «مۇحتار اۋەزوۆ قورى» قوعام­دىق قورىنىڭ پرەزيدەنتى مۇرات اۋەزوۆ جانە عىلىم مەن قوعامعا ۇلەس قوسقان باسقا دا قايرات­كەرلەر, كىتاپحانا وقىرماندارى مەن قىزمەتكەرلەرى قاتىستى. كونە گرەك پەن پارسى تا­ريحشىلارىنىڭ جازبالارىن­دا اسقاق رۋح يەلەرى رەتىندە سۋرەتتەلەتىن ساق-سكيفتەر تۋرالى داس­تان قازاقى وقىرمان قاۋىم­عا گومەردىڭ «يلياداسىنان» كەم اسەر ەتپەيتىندىگىن ايتا كەتۋ كەرەك. شىعارما تارتىمدى دا قا­را­پايىم مانەردە, تاريحي دال­دىكتەن ەش اۋىتقىماي جا­زىلعان. قانات ەسكەندىر, الماتى.