مەملەكەت باسشىسى ەلوردامىزدىڭ سيمۆولىنا اينالعان, قايتا جوندەۋدەن وتكەن «بايتەرەك» مونۋمەنتىندە بولدى.
كۇردەلى جوندەۋدەن سوڭ عيماراتتىڭ ىشكى كەيپى وزگەرگەن. اتاپ ايتقاندا, مونۋمەنتتىڭ كۇمبەزى مەن باعاناسىنا جىلۋدى ساقتاۋعا ءارى وعان جۇمسالاتىن شىعىندى ازايتۋعا مۇمكىندىك بەرەتىن ەنەرگيا ۇنەمدەگىش جاڭا شىنىپاكەتتەر ورناتىلعان. مونۋمەنتتىڭ حولىنا ۇلكەن LED-ەكران قويىلدى.
سونداي-اق, قازاقستان پرەزيدەنتى «نۇرجول» بۋلۆارىندا اشىق اسپان استىندا ءوتىپ جاتقان جىل سايىنعى حالىقارالىق ASTANA ART FEST مادەني فەستيۆالىندەگى ەكسپوزيتسيالارمەن تانىستى.
فەستيۆالدا قازاقستان, رەسەي, فرانتسيا, ۋكراينا, يسپانيا, اقش, گەرمانيا, ارمەنيا, جاپونيا جانە وزبەكستان ەلدەرىنەن كەلگەن 60-تان استام اۆتوردىڭ تۋىندىلارى كوپشىلىك نازارىنا ۇسىنىلادى.
سونىمەن قاتار, نۇرسۇلتان نازارباەۆ كەنەسارى حانعا ارنالعان ەسكەرتكىشتىڭ جانىندا ورنالاسقان «اربات» جاياۋ جۇرگىنشى جولىمەن ءجۇرىپ ءوتتى. وندا مەملەكەت باسشىسى قازاقستان قولونەرشىلەرى تەرىدەن, كيىزدەن, ساز بالشىقتان جانە اعاشتان جاساعان بىرەگەي بۇيىمداردى كورىپ, كوشە مۋزىكانتتارىنىڭ ونەرىن تاماشالادى.
وسى جەردە ەلورداداعى «سارىارقا» اۋدانىنىڭ اكىمى مەملەكەت باسشىسىن اۋدان ينفراقۇرىلىمىن ودان ءارى دامىتۋ جوسپارىمەن تانىستىردى.
قازاقستان پرەزيدەنتى ەلوردا تۇرعىندارىمەن جانە قوناقتارىمەن اڭگىمەلەستى, سونداي-اق بارشا جۇرتتى كەلە جاتقان استانا كۇنىمەن قۇتتىقتاپ, ولارعا زور دەنساۋلىق پەن باق-بەرەكە تىلەدى.
سوڭىندا نۇرسۇلتان نازارباەۆ ەسىل وزەنىنىڭ جاعاسىندا لازەرلىك شوۋدى تاماشالادى.
