قر ۇلتتىق ەكونوميكا ءمينيسترى تيمۋر سۇلەيمەنوۆ تۇتىنۋشىلاردىڭ قۇقىقتارىن قورعاۋ سالاسىن جەتىلدىرۋ ماقساتىمەن 2016 جىلعى ساۋىردە زاڭناماعا بىرقاتار وزگەرىستەر مەن تولىقتىرۋلار ەنگىزىلگەنىن اتاپ ءوتتى. سونىمەن قاتار قۇرىلىس نورمالارىمەن قاراستىرىلماعان, «بيزنەس», «ەليت», «ەكونوم» ساناتتارى سەكىلدى, تۇرعىزىلىپ جاتقان تۇرعىن ۇيلەردىڭ سىنىپتاماسىنا جارناما جاساۋعا, سونىمەن قوسا, بيولوگيالىق بەلسەندى قوسپالاردىڭ جارناماسىن ورنالاستىرۋعا تىيىم سالىنعان.
قر ۇلتتىق ەكونوميكا مينيسترلىگى جەكەلەگەن تاۋار نارىقتارىندا تۇتىنۋشىلاردىڭ قۇقىقتارىن قورعاۋ مەن ەلەكتروندى ساۋدا قاتىسۋشىلارىنىڭ قىزمەتتەرىن تۇتىنۋشىلاردىڭ قۇقىقتارىن ساقتاۋ كەپىلدىكتەرىن ايقىنداۋ ارقىلى رەتتەۋ جۇمىستارىن كۇشەيتۋدى جوسپارلاۋدا. جارناما جاريالاۋ, سونىڭ ىشىندە, ونى ورنالاستىرۋ ۋاقىتى, انىقتىعى مەن تاۋارلاردىڭ تۇتىنۋشىلىق قاسيەتتەرى بويىنشا تالاپتاردى كۇشەيتۋ كوزدەلگەن.
ۇلتتىق زاڭناما تۇتىنۋشىلاردىڭ قۇقىقتارىن قورعاۋ ماسەلەلەرىن رەتتەيتىن شەتەلدىك نورمالار مەن ەرەجەلەرگە سايكەس كەلتىرىلەدى. كاسىپكەرلىك سۋبەكتىلەرىنىڭ ساپا ستاندارتتارى مەن تاۋارلاردىڭ قاۋىپسىزدىگىن قاداعالاۋ بويىنشا جاۋاپكەرشىلىكتەرى كۇشەيتىلەدى.
قر ۇەم-ءنىڭ جۇرگىزىپ وتىرعان جۇمىستارىندا تۇتىنۋشىلىق ساۋاتتىلىق, سونداي-اق, تۇتىنۋشىلاردىڭ ازاماتتىق بەلسەندىلىگىنىڭ دەڭگەيىن ارتتىرۋعا جانە ولاردىڭ تاۋارلار, قۇقىقتارى مەن مىندەتتەرى تۋرالى اقپاراتتانۋىنا ەرەكشە كوڭىل بولىنەدى.
«تۇتىنۋشىلاردىڭ قۇقىقتارىن قورعاۋدىڭ ينستيتۋتسيونالدىق نەگىزىن جەتىلدىرۋ تۇتىنۋشىلاردىڭ قۇقىقتارىن بۇزۋدىڭ الدىن الۋعا, نارىقتاردى ساپالى تاۋارلارمەن مولىقتىرۋعا جانە دە قازاقستانداعى تۇتىنۋشىلاردىڭ قورعالۋ دەڭگەيىن ارتتىرۋعا مۇمكىندىك بەرەدى»,- دەپ ءسوزىن تۇيىندەدى ت. سۇلەيمەنوۆ.
وتىرىس بارىسىندا قارجى قىزمەتتەرىن تۇتىنۋشىلاردىڭ قۇقىقتارىن قورعاۋ ماسەلەلەرى جونىندە قر ۇلتتىق بانك توراعاسى د. اقىشەۆ, مەديتسينالىق قىزمەت كورسەتۋ ساپاسىن ارتتىرۋ تۋرالى قر دەنساۋلىق ساقتاۋ ءمينيسترى ە. ءبىرتانوۆ ءسوز سويلەدى. جۇرتشىلىق تاراپىنان «قازاقستان تۇتىنۋشىلارىنىڭ ۇلتتىق ليگاسى» باسقارما ءتورايىمى س. رومانوۆسكايا سويلەدى.
ۇكىمەت وتىرىسىنىڭ ماسەلەلەرىن قاراۋ قورىتىندىسى بويىنشا قر پرەمەر-ءمينيسترى باقىتجان ساعىنتاەۆ قر ۇلتتىق ەكونوميكا مينيسترلىگىنە, ورتالىق جانە جەرگىلىكتى اتقارۋشى ورگاندارعا تۇتىنۋشىلاردىڭ قۇقىقتارىن قورعاۋ بويىنشا بەلسەندى شارالار قولدانىپ, حالىققا بۇقارالىق اقپارات قۇرالدارى ارقىلى تۇتىنۋشىلاردىڭ قۇقىقتارى تۋرالى كەڭىنەن اقپارات تاراتۋدى تاپسىردى.
