بۇل ماقساتقا جەتۋ ءۇشىن ءۇش دەڭگەيلى وقۋ جۇيەسى قاراستىرىلعان. ءبىرىنشىسى, ەڭبەك نارىعىنىڭ قاجەتتىلىكتەرىن ەسكەرە وتىرىپ, تەحنيكالىق جانە كاسىپتىك ءبىلىمى بار كادرلاردى دايارلاۋ. باعدارلاماعا قاتىسۋشىلارعا اتالعان ماماندىقتارعا وقىتۋدىڭ ەكى دەڭگەيلى مودەلىنىڭ مودۋلدىك باعدارلامالارىنا سايكەس تەگىن بەرىلەدى. وتكەن جىلى بۇل جونىندە ەلباسى قازاقستان حالقىنا جولداۋىندا ايتقان بولاتىن.
بۇل وقۋعا ومىرلىك قيىن جاعدايعا تاپ بولعان جانە تۇرمىسى تومەن وتباسىلاردىڭ 9-11-سىنىپتاردى بىتىرگەن بالالارى, وقۋ ورىندارىنا تۇسپەگەن, جۇمىس ىزدەپ جۇرگەن ادامدار, سونداي-اق وزگە ساناتتاعى ازاماتتار قابىلدانادى. ال وزگە ساناتتاعى ادامدارعا جاتاتىن كىمدەر دەگەن سۇراق تۋادى. ولار كوپ بالالى وتباسىلاردىڭ بالالارى, اتاۋلى الەۋمەتتىك كومەك الۋعا قۇقىعى بار وتباسىلاردىڭ, سونداي-اق مەملەكەتتىك اتاۋلى الەۋمەتتىك كومەك المايتىن, جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلاردىڭ بالالارى, مەكتەپ-ينتەرناتتاردا جانە دارىندى بالالارعا ارنالعان ينتەرناتتاردا, ينتەرناتتىق ۇيىمداردا ءبىلىم الاتىن, دەنساۋلىق جاعدايىنا قاراي ۇيدە نەمەسە ەمحانادا, مەديتسينالىق وڭالتۋ ۇيىمدارىندا وقيتىن, جەتىم, اتا-انالارىنىڭ قامقورلىعىنسىز قالعان, مۇگەدەك جانە كامەلەتكە تولماعانداردى بەيىمدەۋ ورتالىقتارىنداعى بالالار. ولاردىڭ وقۋى تەگىن, ءبىر رەتتىك ىستىق تاماقپەن, شاكىرتاقىمەن, جول ءجۇرۋ اقىسىمەن قامتاماسىز ەتىلەدى. ال وقۋدى اياقتاعان جانە بىلىكتىلىك ەمتيحانىنان وتكەن وقۋشىعا بەلگىلەگەن تارتىپپەن تەحنيكالىق جانە كاسىپتىك ءبىلىم تۋرالى ديپلوم, بىلىكتىلىك تۋرالى سەرتيفيكات بەرىلەدى. ءبىرىنشىسى تۇسىنىكتى, ال ەكىنشى بەرىلەتىن سەرتيفيكاتتىڭ دا ءوز ءمانى بار. ويتكەنى, ونسىز ميكروكرەديت الا المايسىز.
ەكىنشى وقۋ جۇيەسى, بۇل جۇمىسشى كادرلاردى ەڭبەك نارىعىندا سۇرانىسقا يە كاسىپتەر جانە داعدىلار بويىنشا قىسقا مەرزىمدى كاسىپتىك وقىتۋ. باعدارلاماعا قاتىسۋشىلاردى قىسقا مەرزىمدى كاسىپتىك وقىتۋ كادرلاردى دايارلاۋدىڭ دۋالدى مودەلىنىڭ ەلەمەنتتەرىمەن ءبىلىم بەرۋ ۇيىمدارىندا, ونىڭ ىشىندە ءموبيلدى وقۋ ورتالىقتارى ارقىلى جۇرگىزىلەدى. قىسقا مەرزىمدى كاسىپتىك وقۋ ەرەكشەلىگىنە قاراي ءبىر ايدان التى ايعا دەيىنگى مەرزىمدى قۇرايدى. قىسقا مەرزىمدى كاسىپتىك وقۋدان وتەتىن باعدارلاماعا قاتىسۋشىلار 29 جاسقا دەيىنگى جاستار مەن حالىقتى جۇمىسپەن قامتۋ ورتالىقتارىندا تىركەلۋىنە قاراماستان, جۇمىسسىزدار جانە ءوزىن ءوزى جۇمىسپەن قامتىعاندار بولىپ تابىلادى.
ءۇشىنشىسى − «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ. بۇل جوبا جۇمىسسىزدار, كاسىپكەرلىك الەۋەتى بار جانە اۋىلدار مەن اۋدان ورتالىقتارىندا تۇراتىن ءوزىن ءوزى جۇمىسپەن قامتىعان ادامداردى كاسىپكەرلىك داعدىلارعا وقىتۋعا, ونىڭ ىشىندە اۋىل شارۋاشىلىعى كووپەراتيۆتەرىن قالىپتاستىرۋ قاعيداتتارىنا, سونداي-اق ولاردىڭ بيزنەس جوبالارىن سۇيەمەلدەۋگە باعىتتالعان. بۇل وقۋ دا تەگىن, وعان قوسىمشا ستيپەنديا تولەنەدى.
وقۋ مەرزىمى 30 كۇن, بىراق وقۋعا قاتىسۋشىنىڭ 12 ايعا دەيىن بيزنەس-جوباسىنىڭ ىسكە اسىرىلۋى سۇيەمەلدەنەدى. ول جۇمىستى قارجىلاي ەمەس قولداۋ وپەراتورلارى اتقارادى. بيزنەس-جوبانى ىسكە اسىرۋدى سۇيەمەلدەۋ بيزنەس-جوبانى ىسكە اسىرۋ كەزەڭىندە كونسۋلتاتسيالىق قولداۋ كورسەتۋگە باعىتتالعان. وسى جەردە مەنىڭ ويىما يسلام بانكينگىنىڭ قاعيداتتارى كەلىپ وتىر. ولار نەسيە بەرگەندە پايىزدىق ۇستەمە المايدى, ءسىزدىڭ بيزنەسىڭىزدىڭ ءجۇرۋىن قاداعالاپ, پايداڭىزبەن بولىسەدى. قازاقستاندا يسلام بانكتەرى ءىرى بيزنەس اراسىندا عانا ءجۇر, شاعىن بيزنەس پەن اۋىل ەكونوميكاسىنا ءالى بەت بۇرا قويعان جوق. سوندىقتان بۇل باعدارلاماداعى قاعيداتتار قۇپتارلىق.
اتامۇرات شامەنوۆ,
ەكونوميكا عىلىمدارىنىڭ دوكتورى
