وتانعا شەكسىز قىزمەت ەتۋدىڭ ونەگەسى

قورعانىس ءمينيسترى ادىلبەك جاقسىبەكوۆ «قارۋلى كۇشتەر ارداگەرلەرى» رەسپۋبليكالىق قوعامدىق بىرلەستىگىنىڭ تورالقاسىمەن كەزدەستى, دەپ حابارلادى قورعانىس مينيسترلىگىنىڭ ءباسپاسوز قىزمەتى. – ءبىز قارۋلى كۇشتەر ارداگەرلەرىنە ري­زا­مىز. ولاردىڭ ارقاسىندا اسكەردەگى جانە اسكەرگە شاقىرىلۋشى جاستارعا پاتريوت­تىق تاربيە بەرۋگە كوپتەگەن پايدالى جۇ­مىس­تار اتقارىلدى, – دەپ اتاپ  ءوتتى. قور­عا­نىس ءمينيسترى. – ارداگەرلەر بىرلەستىگى شىن مانىندە بىزگە  قارۋلى كۇشتەرگە  بەلسەندى كومەك كورسەتە الاتىن كۇشكە اينالدى. وتانىمىزعا جانقيارلىقپەن قىزمەت ەت­كەندەر بۇگىندە قازاقستان ارمياسىنا  وفي­تسەرلەر كورپۋسىنىڭ  كاسىبيلىگىن ارت­تى­رۋعا ءوز كومەكتەرىن كورسەتىپ كەلەدى. ولار اسكەرگە  شاقىرىلۋشى جاستارمەن كەزدەسەدى, اتا-انالارمەن بىرگە جاستاردى ارميا قاتارىنا وزدەرىنىڭ كونستيتۋتسيالىق بورىشىن وتەۋگە اتتاندىرادى, بۇل, ارينە, جاقسى ءداستۇر. قارۋلى كۇشتەر ارداگەرلەرى بۇگىندە ساپتا: جاس ازاماتتارعا وزدەرى ومىردە باسشىلىققا العان پاتريوتتىق يدەيالارىن ۇيرەتۋدەن جالىقپايدى. ولار جەڭىل جول تاڭداعان جوق, ءوز جولداستارىن جولدا قال­دىر­مادى, اسپانداعى جۇلدىزعا قول سوز­بادى. جۇلدىزدار ولاردىڭ وزدەرىن تاپتى, العىس پەن ماقتاۋعا يە بولدى. بولاشاق وتان قورعاۋشىلاردىڭ سوزىمەن ايتقاندا, وتانعا شەكسىز قىزمەت ەتۋدىڭ ونەگەسى بولعان ارداگەرلەرمەن كەزدەسكەن ءاربىر ءسات ولاردىڭ  ماڭگىلىك ەستەرىندە قالماق. كەزدەسۋ سوڭىندا قورعانىس ۆەدوم­ستۆوسىنىڭ باسشىسى قازاقستان ارميا­سى­نىڭ زاپاستاعى جانە وتستاۆكاداعى گەنە­رال­دا­رى مەن وفيتسەرلەرىنە بەلسەندى پاتريوت­تىق جۇمىستارى ءۇشىن العىس ايتتى, سونى­مەن بىرگە, «قارۋلى كۇشتەر ارداگەرلەرى» رەسپۋبليكالىق قوعامدىق بىرلەستىگى ۇي­ىم­داستىرۋ جاعىنان كۇشەيىپ, حالىقارالىق سالادا ءوز قىزمەتىنىڭ باعىتىن كەڭەيتە ءتۇسۋى قاجەتتىگىن اتاپ ءوتتى.