سان باعىتتاعى سىرتقى ساياسات

سىرتقى ىستەر مينيسترلىگىنىڭ رەسمي وكىلى اسقار ابدراحمانوۆ جۋرناليستەرگە ارنالعان ءداستۇرلى بريفينگتە وسى اپتانىڭ ىشىندە سىرتقى ساياسات ىسىندە وتەتىن قاداۋ-قاداۋ شارالارمەن تانىستىردى. رەسمي وكىل سىرتقى ىستەر ءمينيسترى ەرجان قازىحانوۆ ەلىمىزگە جۇمىس ساپارىمەن كەلەتىن ەۋروپالىق كوميسسياسىنىڭ ەنەر­گەتيكا ماسەلەلەرى جونىندەگى وكىلى گيۋنتەر وتتينگەردى قابىلدايتىنىن ايتىپ, كەزدەسۋ بارىسىندا قازاقستان پرەزيدەنتى نۇر­سۇل­تان نازارباەۆتىڭ 2010 جىلعى قا­زان­داعى ەۋروپالىق وداقتىڭ باس پاتەرىنە وتكەن سا­پا­رى بارىسىندا قول جەتكىزىلگەن ۋاعدالاس­تىق­تاردىڭ جۇزەگە اسىرىلۋى تال­قىلا­ناتىنىن جەتكىزدى. ال 5 جانە 8 قازان ارالىعىندا قا­زاق­ستان  پرەزيدەنتى نۇرسۇلتان نازارباەۆتىڭ شاقىرۋىمەن ليتۆا پرەزيدەنتى داليا گريبۋسكايتەنىڭ استاناعا رەسمي ساپارى بولىپ, ونىڭ بارىسىندا مەملەكەت باس­شى­لارى­نىڭ قاتىسۋىمەن ەكەۋارا جانە كە­ڭەيتىلگەن قۇرامدا كەلىسسوزدەر وتكىزۋ, ءبىر­قاتار ۇكىمەتارالىق كەلىسىمدەرگە قول قويۋ جوسپارلانىپتى. سونداي-اق, گريبۋسكايتە حانىمنىڭ پارلامەنت ءماجىلىسىنىڭ ءتور­اعاسى ورال مۇحامەدجانوۆپەن جانە پرەمەر-مينيستر كارىم ماسىموۆپەن كەزدەسۋلەرى جوسپارلانىپتى. اسقار ابدراحمانوۆ بريفينگتە قا­زاق­ستان مەن جاپونيا اراسىنداعى ەكونومي­كا­لىق ىنتىماقتاستىق جونىندەگى ۇكىمەتتىك جانە جەكەمەنشىك سەكتورلاردىڭ  كەزەكتى ءۇشىنشى بىرلەسكەن كوميسسياسى استانادا وتەتىنىنەن دە حاباردار ەتىپ, 6-7 قازاندا رابات قالاسىندا قازاقستان رەسپۋبليكاسى مەن ماروككو كورولدىگىنىڭ سىرتقى ىستەر مينيسترلىكتەرى اراسىندا ساياسي كونسۋلتاتسيالار بولاتىنىن دا قاپەرگە سالىپ, قازاقستاندىق دەلەگاتسيانى سىرتقى ىستەر ءمينيسترىنىڭ ورىنباسارى قايرات سارى­بايدىڭ باستاپ باراتىنىن جەتكىزدى. وسى اپتادا ەلىمىزدىڭ سىرتقى ساياسات ۆە­دومستۆوسىنىڭ باسشىسى ەرجان قازى­حا­نوۆ يراندىق ارىپتەسى ءالي اقبار سالەحيدىڭ شاقىرۋىمەن تەھرانعا جۇمىس ساپارىمەن بارىپ, ونىڭ اياسىندا يراننىڭ جوعارعى باس­شىلىعىمەن كەزدەسۋلەر وتكىزەتىنى جوس­پار­لانىپ وتىرعان كورىنەدى. كەزدەسۋلەر با­رىسىندا مەملەكەتتەر اراسىنداعى ەكىجاقتى قاتىناستار, وزەكتى ايماقتىق جانە حالىق­ارا­لىق ماسەلەلەر قارالىپ, تاراپتار مۇشە بولىپ وتىرعان حالىقارالىق ۇيىمدار شەڭ­بەرىندەگى ىن­تى­ماقتاستىقتى نىعايتۋ جايى دا تالقى­لا­نا­دى, دەدى رەسمي وكىل. الداعى ساپار ەكى ەل اراسىنداعى ساياسي ۇنقاتىسۋدىڭ نىعايۋىنا, ساۋدا-ەكونوميكالىق, مادەني-گۋمانيتار­لىق سالالارداعى قارىم-قاتىناس­تاردىڭ ودان ءارى وربۋىنە مۇمكىندىك بەرمەك. سونداي-اق, ەۋروپا كەڭەسىنىڭ باس حاتشىسى تۋربەرن ياگلاندت تا وسى اپتا ىشىندە العاش رەت ەلىمىزگە رەسمي ساپارمەن كەلمەك. ونىڭ شەڭبەرىندە مارتەبەلى قو­ناق­تىڭ قازاقستان باسشىلىعىمەن جوسپار­لانعان كەزدەسۋلەرى بارىسىندا ەلىمىزدىڭ وسى ماڭىزدى ەۋروپالىق قۇرىلىممەن ىنتى­ماقتاستىق ماسەلەلەرى تالقىلانادى. بيىل سەمەي سىناق پوليگونى جابى­لۋى­نىڭ 20 جىلدىعىنا وراي ەلباسى نۇر­سۇل­تان نازارباەۆتىڭ جارلىعىمەن يادروسىز الەم ءۇشىن اتتى  فورۋم وتكىزىلەدى. ەكى بولىمنەن تۇراتىن فورۋمنىڭ العاشقى كۇنى 12 قازاندا استانادا باستالىپ, 13 قازاندا سەمەيدە جالعاسادى, دەدى رەسمي وكىل.  تاۋەلسىزدىك سا­رايىندا وتەتىن كونفەرەن­تسيا­نىڭ تاقىرىپ­تارى اراسىندا يادرولىق سىناقتارعا جاپپاي تىيىم سالۋ جونىندەگى شارتتىڭ (ياسجتش) دەرەۋ كۇشىنە ەنۋى بويىنشا جاھاندىق ارە­كەتتەرگە قوسىمشا سەرپىن بەرۋ, يادرولىق قارۋ مەن باسقا دا يادرولىق جارىلعىش قۇ­رال­دارعا ارنالعان ىدىراعىش ماتەريال ءون­دىرىسىنە تىيىم سالۋ جونىندەگى شارتتى ءازىر­لەۋ, يادرولىق قارۋدان بوس ايماقتار قاعي­دا­لارىن ءتيىمدى ەنگىزۋ جانە پرەزيدەنت نۇر­سۇل­تان نا­زار­باەۆتىڭ باستاماسىمەن يادرو­سىز الەمنىڭ جالپى دەكلاراتسياسىن قابىل­داۋ بويىنشا ناقتى ۇسىنىستار جاساۋ كوز­دە­لىنىپ,  سو­ڭىن­دا كونفەرەنتسيانىڭ قورى­تىن­دى قۇ­جاتى – يادروسىز الەم ءۇشىن استانا دەك­لا­راتسياسىن قابىلداۋ جوسپارلانىپ  وتىرعان كورىنەدى. فورۋمعا قاتىسۋ ءۇشىن بىرقاتار حالىق­ارالىق ۇيىمداردىڭ باسشىلارى, يادرولىق قارۋسىزدانۋ سالاسىنداعى جەتەكشى رولدەگى مەملەكەتتەردىڭ سىرتقى ساياسات ۆەدومستۆو­لارىنىڭ لاۋازىمدى تۇلعالارى, قارۋسىزدا­نۋ جانە تاراتپاۋ ىسىنە ەلەۋلى ۇلەس قوسقان نەمەسە مەملەكەتىمىزدىڭ تاۋەلسىزدىكتىڭ ال­عاشقى جىلدارىندا يادرولىق قارۋسىزدا­نۋ­ىن جۇزەگە اسىرۋعا قاتىسقان ارداگەر ساياساتكەرلەر, سونىمەن قاتار, الەم مەملە­كەت­تەرىنىڭ ۇكىمەتتەرى مەن پارلامەنتتەرىنىڭ, عا­لىمدار مەن ساراپشىلار قاۋىمداستى­عى­نىڭ, تاراتپاۋ مەن قارۋسىزدانۋ سالاسىن­دا­عى بەدەلدى حالىقارالىق ۇكىمەتتىك ەمەس ۇي­ىم­داردىڭ, شەتەلدىك ديپلوماتيالىق كورپۋستىڭ وكىلدەرى شاقىرىلعان. انار تولەۋحانقىزى.