بۇل مەرەكەنىڭ ءجونى بولەك

وتكەن اپتانىڭ سوڭىندا كۋرچاتوۆ قالاسىندا, ناقتىلاپ ايتساق, وسىنداعى ۇلتتىق يادرولىق ورتالىقتا اتوم سالاسى قىزمەتكەرلەرىنىڭ كۇنى جىلداعىدان دا ەرەكشە جاعدايدا اتالىپ ءوتىلدى. ال ونىڭ سەبەبى جوق ەمەس ەدى. بيىلعى جىلى ەلباسى جارلىعىمەن سەمەي اتوم پولي­گونى­نىڭ جابىلعانىنا 20 جىل تولىپ وتىر. مىنە, سودان بەرىدە تەك ۇلتتىق يادرو­لىق ورتالىق قانا ەمەس, كۋرچاتوۆ قالاسى تۇتاسىمەن بەيبىت ماقساتتا جۇمىس ىستەۋدە. مۇنى ءبىر دەسەك, ەكىنشىدەن, وزدەرىنىڭ كاسىبي مەرەكەسى قارساڭىندا اتالعان ورتالىقتىڭ باس عيماراتى ساۋلەتتى جاڭا قونىسقا جايعاستى. وندا اتوم سالاسى قىزمەتكەرلەرىنىڭ الاڭسىز جۇمىس ىستەۋىنە مەيلىنشە قولايلى مۇمكىندىك جا­سالعان. ونىڭ سىرتىندا جاڭا ع­ي­ماراتتاعى اكت جانە سپورت زالدارى دا بۇگىنگى كۇن تالا­بىنا ساي تولىق جاب­دىقتالعان. مەرەكەلىك جيىندى ورتالىقتىڭ باس ديرەكتورى, اكادەميك, مەملەكەتتىك سىي­لىق­تىڭ لاۋرەاتى قايرات كادىرجانوۆ اشا وتىرىپ, تاۋەلسىزدىكتىڭ 20 جىلىندا اتقارىلعان جۇمىستارعا قىسقاشا توقتالىپ ءوتتى. ودان كەيىنگى جەردە اتوم سالاسىنىڭ ۇزدىك قىزمەتكەرلەرى سالا­لىق مينيسترلىك, وبلىستىق جانە قالا­لىق اكىمدىكتىڭ تيىسىنشە ماراپاتتارىن يەلەندى. مۇنداعى عالىمدار كورپۋسىن كاسىبي مەرەكەلەرىمەن سونداي-اق يادرو­لىق سىناقتارعا قارسى «نەۆادا-سەمەي» حالىقارالىق قوزعالىسىنىڭ ۆيتسە-پرەزيدەنتى سۇلتان كارتوەۆ, قازاقستان ۇلتتىق جاراتىلىستانۋ عىلىمدارى اكادەمياسى سەمەي وڭىرىندەگى فيليا­لى­نىڭ توراعاسى, پروفەسسور سەرىكباي ماۋسىمباەۆ جانە تاعى باسقالار قىزۋ قۇتتىقتادى. جيىن سوڭىندا ورتالىق جاريالاعان جۋرناليستەر كونكۋرسىنىڭ قورىتىن­دىسى بويىنشا جەڭىمپاز اتانعان ءارىپ­تەس­تەرىمىز ماراپاتتالدى. بۇدان كەيىن ءباسپاسوز ءماسليحاتى وتكىزىلدى. داۋلەت سەيسەن ۇلى, سەمەي.