كونگرەسس جۇمىسىنا دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق ايماقتىق بيۋرو باسشىسى جۋجاننا ياكوب پەن قازاقستان رەسپۋبليكاسىنىڭ دەنساۋلىق ساقتاۋ ءمينيسترى ەلجان ءبىرتانوۆ, قازاق تاعامتانۋ اكادەمياسىنىڭ پرەزيدەنتى تورەگەلدى شارمانوۆ, سونداي-اق, وتاندىق جانە شەتەلدىك كوشباسشى دارىگەرلەر مەن ساراپشىلار قاتىستى.
باسقوسۋدا ەلباسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا قامتىلعان مىندەتتەردى ورىنداۋ, مىندەتتى الەۋمەتتىك ساقتاندىرۋ جانە ەمدەلۋشى اينالاسىندا دەنساۋلىق ساقتاۋدىڭ بارلىق قىزمەتتەرىن بىرىكتىرۋ, دەنساۋلىق ساقتاۋدى دامىتۋعا باعىتتالعان 2016-2019 جج. ارنالعان «دەنساۋلىق» مەملەكەتتىك باعدارلاماسىن جۇيەلى تۇردە جۇزەگە اسىرۋ سياقتى ماسەلەلەر كەڭ مازمۇندا ايتىلدى.
.jpg)
– ەۋرازيالىق دەنساۋلىق كونگرەسىنىڭ نەگىزگى ماقساتى – ەلىمىزدەگى رەفورمالاردى قولداۋ. بۇل سالاداعى نەگىزگى رەفورمانىڭ ءبىرى مىندەتتى الەۋمەتتىك ساقتاندىرۋدى ەنگىزۋ. وسىدان ەكى جىل بۇرىن ۇلت جوسپارى – «100 ناقتى قادامدى» قابىلداعاندا ەلباسى مىندەتتى مەديتسينالىق ساقتاندىرۋدىڭ باستاماسىن العاشقى مەديتسينالىق كومەكتىڭ نەگىزىندە ەنگىزۋىمىز قاجەتتىگىن تىكەلەي ايتقان ەدى. وسىعان سايكەس ەلىمىزدەگى بىلىكتى دارىگەرلەردى جانە الەمنىڭ ءار قيىرىنان كەلگەن حالىقارالىق دەڭگەيدەگى بەلگىلى ساراپشىلاردىڭ باسىن قوسىپ, العاشقى مەديتسينالىق كومەكتىڭ قىزمەتىن دامىتۋدىڭ تەتىكتەرى تۇرعىسىندا اقىلداسىپ وتىرمىز. بۇل جۇيەگە قاتىستى تۋىندايتىن ماسەلەلەر وتە كوپ. پەدياتورلىق قىزمەتتى دامىتۋ, العاشقى مەديتسينالىق كومەكتى جەتىلدىرۋ, حرونيكالىق اۋرۋلاردى ەنگىزۋ, سونىمەن قاتار مەديتسينالىق كومەكتەردىڭ ينفراقۇرىلىمىن دامىتۋ سياقتى جايتتار بۇگىنگى جيىننىڭ نەگىزگى وزەگىنە اينالىپ وتىر. وسى ماسەلەلەردى جولعا قويۋدا حالىقارالىق ساراپشىلارمەن كەڭەسىپ, جان-جاقتى ساراپقا سالۋدىڭ ماڭىزدىلىعى زور. الداعى 2018 جىلى دۇنيەجۇزىنە بەلگىلى «الماتى دەكلاراتسياسىنا» - 40 جىل تولادى. 1978 جىلى الماتى قالاسىندا دۇنيەجۇزىلىك دەنساۋلىق ساقتاۋ ۇيىمىنىڭ كونگرەسى ءوتىپ, الماتى دەكلاراتسياسىنا قول قويىلعان. اتالعان دەكلاراتسيا قازىر بۇكىل الەمگە تانىمال قۇجات. ونىڭ سەبەبى, قازىرگى كەزدەگى دەنساۋلىق ساقتاۋداعى نەگىزگى پرينتسيپتەر مەن العاشقى مەديتسينالىق كومەكتىڭ ماڭىزدىلىعى وسى قۇجاتتىڭ ءون بويىنان تابىلادى. وسى ۇلكەن شاراعا دا دايىندىقتى قازىردەن باستاۋىمىز قاجەت, – دەيدى قازاقستان رەسپۋبليكاسى دەنساۋلىق ساقتاۋ ءمينيسترى ەلجان ءبىرتانوۆ.
ساراپشى ماماندار اتالعان كونگرەسستىڭ الەۋمەتكە باعىتتالعان مەديكو-سانيتارلى العاشقى كومەككە نەگىزدەلگەن دەنساۋلىق ساقتاۋدى ءتيىمدى قالىپتاستىرۋ بويىنشا ۇسنىستاردى قۇراۋعا جانە دەنساۋلىق ساقتاۋ سالاسىنداعى كادرلىق رەسۋرستاردى دامىتۋعا تىڭ سەرپىن بەرەتىنىن ايتتى. بۇل شارا وتاندىق جانە شەتەلدىك مامانداردىڭ قوعامدىق دەنساۋلىق ساقتاۋ جانە مەكتەپ مەديتسيناسى سالاسىندا, سيمۋلياتسيالىق تەحنولوگيالاردى پايدالانۋ ارقىلى مەديكو-سانيتارلى العاشقى كومەك دەڭگەيىندە مامانداردى دايارلاۋ ءىسى بويىنشا جانە قازاقستاندا مىندەتتى الەۋمەتتىك مەديتسينالىق ساقتاندىرۋدى ەنگىزۋ جاعدايىنداعى مەديكو-سانيتارلى العاشقى كومەكتىڭ دامۋى تۇرعىسىندا تاجىريبە الماسۋعا بىرىكتىرۋ ماقساتىن كوزدەيدى. شارا بارىسىندا وزىق عالىمدار تاراپىنان جيىرمادان استام بايانداما وقىلىپ, مەديتسينالىق تۋريزم مەن جوعارىتەحنولوگيالى مەديتسينالىق قىزمەت بويىنشا كورمە ۇيىمداستىرىلدى.
ارمان وكتيابر,
«ەگەمەن قازاقستان»
الماتى
