اۋدان ورتالىعىندا 2001 جىلدان باستاپ «دوستىق» ءۇيى شاڭىراق كوتەرىپ, كەيىن ول ۇلتتىق-مادەني ورتالىق بولىپ قايتا قۇرىلدى. بۇل ورتالىقتىڭ ءتورايىمى بەسايدار الاشقىزى كورشى بايان-ولكە ايماعى جانە شىعىس قازاقستان وبلىسىمەن تىعىز قارىم-قاتىناس ورناتقان. سونىمەن بىرگە, ناۋرىز جانە وزگە دە ۇلتتىق-ءدىني مەيرامداردى ءوز دەڭگەيىندە وتكىزۋگە ۇيىتقى بولىپ كەلەدى.
سونىمەن قاتار, اۋدانداعى مادەني جاڭالىقتاردى حالىققا جەتكىزىپ وتىراتىن ء«شۇي نۇرى» اتتى گازەت شىعارىلۋدا. سونىمەن بىرگە, ۇلتتىق-مادەني ورتالىقتىڭ قاسىنان ەتنوگرافيالىق باعىتتا ءان ايتاتىن «كەرۋەن» جانە «ميراس» سەكىلدى انسامبلدەر جۇمىس ىستەپ تۇر. سوڭعى جىلدارى ۇلتتىق-مادەني ورتالىق قازاقتىڭ قولونەر شەبەرلىگىن قايتا جاڭعىرتۋ ماقساتىندا شاعىن شەبەرحانا اشتى. بۇگىندە شەبەرحانانىڭ شىعارعان قولونەر بۇيىمدارى ءتۇرلى كورمەلەرگە قويىلىپ كەلەدى.
دەسە دە, ءبىزدى الاڭداتىپ وتىرعان دۇنيە – قازاق ءتىلى ماسەلەسى. اۋدان بويىنشا قازاق ءتىلى تەك فاكۋلتاتيۆتى ءپان رەتىندە وقىتىلعانى بولماسا, باسقا ساباقتار تۇگەلدەي ورىس-التاي تىلدەرىندە جۇرگىزىلۋدە. وسى ورايدا, قوساعاش اۋدانىنا كومەك قولىن سوزاتىن ەڭ ىڭعايلى مۇمكىندىك – ىرگەلەس ورنالاسقان شىعىس قازاقستان وبلىسىمەن مادەني-رۋحاني قاتىناس ورناتۋدى قولعا السا, ابزال بولار ەدى.
امانجول ساحاريانوۆ,
التاي رەسپۋبليكاسى قوساعاش اۋدانى ءماسليحاتى توراعاسىنىڭ ورىنباسارى (رەسەي)
