جالپى جوبا اياسىندا 472 ورىن اقىلى بولادى. قازىرگى تاڭدا اۆتوكولىك يەلەرىنە نۇرجول ساياجولىندا ءتاريفتىڭ قۇنى, تولەم تاسىلدەرىنە قاتىستى جالپى تۇراقتى پايدالانۋ ەرەجەلەرى تۇسىندىرىلۋدە.
«ازىرگە تۇراققا كولىكتى قويۋ ءۇشىن اقشا تالاپ ەتىلمەيدى. جوبا تەستىلەۋ ءتارتىبى بويىنشا ىسكە قوسىلدى. نۇرجول ساياجولىندا پروموۋتەر توپتار قالا تۇرعىندارىنا جوبانىڭ ماڭىزدىلىعى, كولىك قوياتىن ورىنداردى پايدالانۋ قاعيدالارىن ايتىپ, تۇسىندىرۋدە», - دەدى استانا قالاسىنىڭ كولىك قوياتىن ورىنداردى باسقارۋ كومپانياسىنىڭ وكىلى زۋريا رىسپاەۆا.
ونىڭ ايتۋىنشا, بولاشاقتا تۇراقتارعا تولەم تەك جۇمىس كۇندەرى ساعات 8-20 ارالىعىندا جۇرگىزىلەدى. تۇنگى ۋاقىتتا كولىك قوياتىن ورىندار تەگىن بولادى.
كولىك قوياتىن ورىندارعا اقشا تولەۋ نۇرجول ساياجولىنداعى تۇراقتىڭ ماڭىندا ورنالاسقان ارنايى پاركوماتتار ارقىلى جۇرگىزىلەدى. ول ءۇشىن ءاۆتوموبيلدى قويعان جەردىڭ ءنومىرى مەن كولىك قۇرالىنىڭ تىركەۋ ءنومىرىن ەنگىزۋ قاجەت ءارى اقشانى تولەپ بولعان سوڭ تۇبىرتەكتى العان ءجون. تاريفتەۋ مينۋتپەن سانالادى. سونىمەن قاتار, پايدالانباعان ۋاقىتتاعى اقشا تۇراقتىڭ ەسەبىندە ساقتالىپ قالادى, ونى كەلەسى جولدارى پايدالانۋعا بولادى.
تۇراق ورنىنا اقشا تولەنبەگەن جاعدايدا 3 اەك بويىنشا (6 807 تەڭگە) ايىپپۇل سالىنادى. جىل ىشىندە قايتالانعان جاعدايدا – 5 اەك بويىنشا (11 345 تەڭگە).
«جالپى پيلوتتىق ايماقتا 12 پاركامات ورنالاسقان, ولاردىڭ ارقايسىسىندا قاي نۇكتەنى باسىپ, قالاي تولەم جۇرگىزۋ قاجەتتىگى, فيسكالدى تۇبىرتەكتىڭ بەرىلۋىنە دەيىنگى پايدالانۋ نۇسقاماسى ناقتى كورسەتىلگەن. نۇرجول ساياجولىنداعى اقىلى تۇراقتاردى ەنگىزۋ ۋاقىتىن قالا اكىمشىلىگى قوسىمشا حابارلايتىن بولادى», - دەدى ز.رىسپاەۆا.
ۇوس ارداگەرلەرى, جاستايىنان مۇگەدەكتەر مەن ءى جانە ءىى توپتاعى مۇگەدەكتەر, التىن قىران وردەنى جانە «حالىك كاhارمانى» اتاعىمەن ماراپاتتالعاندار, كوپ بالالى انالار, «التىن القا» جانە «كۇمىس القا» يەلەرى, سەمەي يادرولىق پوليگونىنداعى يادرولىق سىناقتاردىڭ سالدارىنان زارداپ شەككەندەر, اۋعانستان سوعىسىنىڭ ارداگەرلەرى مەن مۇگەدەكتەرى, جەرگىلىكتى ۇرىس كەزدەرى مەن شۇعىل ارەكەت ەتۋ قىزمەتىنىڭ قىزمەتكەرلەرى كولىك قوياتىن ورىنداردى تەگىن پايدالانۋ قۇقىنا يە.
بولاشاقتا بانك كارتالارى ارقىلى نەمەسە سمس-حابارلاندىرۋلار مەن "Astra park" ءموبيلدى قوسىمشاسىنىڭ كومەگىمەن تولەم جاساۋ مۇمكىندىگىن قاراستىرۋ جوسپارلانۋدا.
