قازاقستان بۇگىنگى تاڭدا الەمدىك تۋريستىك كەڭىستىكتىڭ وزىندىك ورنى بار ءبىر بولىگىنە اينالدى. الەم نازارىنا ۇسىنىلعان ەكسپو-2017 كورمەسى وسى جولداعى جاڭا قادام بولىپ سانالادى.
ەلىمىزدىڭ تاۋەلسىزدىك جىلدارىندا قول جەتكىزگەن وسىناۋ تابىستارى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ جۇرگىزىپ كەلە جاتقان ساليقالى ساياساتىنىڭ نەگىزىندە مۇمكىن بولدى. بۇگىنگى قازاقستان كەلبەتىنەن ءبىز ارمانداعان, ءبىز قالاعان بولاشاقتىڭ بەينەسى انىق كورىنەدى. ءبىزدىڭ ەلىمىز يادرولىق قارۋسىز الەم قۇرۋدى, كونفەسسياارالىق جانە ۇلتارالىق كەلىسىمدى نىعايتۋدى, اسكەري شىعىنداردى الەۋمەتتىك ماقساتتارعا جۇمساۋدى, ەكسترەميزم مەن تەرروريزمگە قارسى ىمىراسىز كۇرەستى, بولاشاق ەنەرگياسى سالاسىنداعى جاڭاشىل قادامداردى جاقتاي وتىرىپ, وسى باعىتتار بويىنشا كەلەشەككە ارنالعان ماقسات-مىندەتتەرىن ناقتىلاي ءتۇستى.
وسىلايشا, ەلىمىز بولاشاق الەمدى قۇرىلىمداۋ ءۇردىسىنىڭ بەلسەندى قاتىسۋشىسىنا اينالدى. قازىرگى تاڭدا قازاقستان جاھاندىق ساياسي ۇدەرىستەردىڭ مەينستريمى بولىپ تابىلادى. بۇل سوزىمىزگە دالەل رەتىندە الەمدى تولعاندىرعان كوپتەگەن جاھاندىق پروبلەمالاردىڭ ءتۇيىنىن شەشۋ ماقساتىندا ۇيىمداستىرىلعان تاريحي كەلىسسوزدەردىڭ استانادا ءوتۋىن ايتۋعا بولادى. ماسەلەن, يران يادرولىق باعدارلاماسىنا قاتىستى الەمدىك ءتۇرلى كوزقاراستاردى ءبىر-بىرىنە جاقىنداستىرۋدا, سيريا داعدارىسىن رەتتەۋدە استانا بەدەلدى ءارى بايسالدى بەيتاراپ الاڭ بولا ءبىلدى.
قازاقستان شىنايى كوزقاراستار مەن وڭ قالىپتاسقان ۇدەرىستەردى ءوزارا ۇيلەستىرىپ وتىر. قازىرگى تاڭدا سىن-قاتەرلەر مەن داعدارىستاردان ساقتانۋعا باعىتتالعان «الدىن الۋ ديپلوماتياسى» ۇرانىن باسشىلىققا الۋ ماڭىزدى. بۇل ورايدا كوبىنە الەۋمەتتىك-ەكونوميكالىق ماسەلەلەرگە باسا نازار اۋدارىپ, «بەيبىتشىلىك», «قاۋىپسىزدىك» جانە «دامۋ» ۇشتىگىنىڭ اجىراعىسىز بايلانىسى («Security-Development Nexus») قاعيداسىن جان-جاقتى دامىتۋ قاجەتتىگى باسىمدىققا الىنۋدا. وسى تۇرعىدا تۇراقتى دامۋ ماقساتتارىن ءساتتى جۇزەگە اسىرۋ ماڭىزدى ماسەلەگە اينالىپ كەلەدى. اتالعان باعىتتاعى ارەكەتتەرىمىزدىڭ بارلىعى قازاقستاننىڭ ستراتەگيالىق باعدارلامالىق قۇجاتتارىنا سايكەس كەلەدى. سونىمەن قاتار, بۇۇ ماقساتتارىمەن جانە جاھاندىق باسىمدىقتارمەن ءساتتى ۇندەستىك تابادى.
بۇگىنگى تاڭدا ەلىمىز ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا كورسەتىلگەن رۋحاني جاڭعىرۋدىڭ ماڭىزدى كەزەڭىن باستان وتكەرىپ جاتىر. سول سەبەپتەن دە مۇنداي اۋقىمدى شارانىڭ قازاقستاننىڭ ءۇشىنشى جاڭعىرۋىنىڭ باستالۋى اياسىندا ءوتۋىنىڭ ايرىقشا ماڭىزى بار.
ال بۇۇ قاۋىپسىزدىك كەڭەسىنە مۇشەلىگىمىز جاس مەملەكەتىمىزدىڭ سىرتقى ساياسي ستراتەگياسىن جۇزەگە اسىرۋ بارىسىنداعى ءىرى جەڭىسى بولىپ تابىلادى. سونىمەن بىرگە, بۇل – تاۋەلسىز ەلىمىزدىڭ الەمدىك ارەناداعى ساپالىق جاڭا مارتەبەسىنە يە بولۋىنىڭ ايقىن دالەلى.
وسى رەتتە ءبىز قازاقستاننىڭ بۇۇ قاۋىپسىزدىك كەڭەسىندەگى جۇمىسىن جالپىۇلتتىق جوبا رەتىندە قاراستىرعانىمىز ءجون. اسىرەسە, قاۋىپسىزدىك كەڭەسىنىڭ الاڭىن يادرولىق قارۋسىزدانۋ مەن تاراتپاۋ جونىندەگى ءوز وي-پىكىرىمىزدى, باستامالارىمىزدى ىلگەرىلەتۋ ءۇشىن بارىنشا پايدالانۋىمىز قاجەت. قازاقستان كحدر جونىندەگى كوميتەتتىڭ جۇمىسىنا دا بەلسەندى قاتىسۋدا. كحدر-ءدىڭ يادرولىق-راكەتالىق باعدارلاماسى بۇگىندە بەيبىتشىلىك پەن قاۋىپسىزدىك ءۇشىن ەڭ ەلەۋلى سىن-قاتەرلەردىڭ ءبىرى بولىپ وتىر.
قورىتا ايتقاندا, قازاقستاننىڭ تەرەڭنەن ويلاستىرىلعان سىرتقى ساياساتى, وندا قامتىلعان باسىم باعىتتار جاھاندىق ۇدەرىستەرگە, الەمدىك اعىستارعا وڭتايلى, جاعىمدى سيپاتتا ءۇن قوسۋدا. بۇل باعىتىمىز ەلىمىزدىڭ جەتىستىكتەرىن ەسەلەپ, ەل تاۋەلسىزدىگىنىڭ نىعايۋىنا وڭ ىقپال ەتە بەرەتىن بولادى.
