مەملەكەتتiك قىزمەتشiلەردi قايتا دايارلاۋ جانە بiلiكتiلiكتi ارتتىرۋ ايماقتىق ورتالىعىنىڭ ديرەكتورى سابىر يبراەۆتىڭ كۋرستاردان وتكەن مەملەكەتتىك قىزمەتشىلەر مىندەتتى تۇردە سىبايلاس جەمقورلىق زاڭناماسىنا قاتىستى تەست تاپسىراتىنى, جىل باسىنان وسىنداي سىناقتان 266 تىڭداۋشى وتكەنى, ولاردىڭ 51-ءى «ۇزدىك», 77-ءسى «جاقسى», 131-ى «قاناعاتتانارلىق», ال 7-ءى «قاناعاتتانعىسىز» ناتيجە كورسەتكەنى تۋرالى بايانداعان اقپاراتىنا ساي وبلىس اكىمى قۇمار اقساقالوۆ مەملەكەت قارجىسى جۇمسالاتىن كۋرستار كوبىنە ءدارىس وقۋ ءۇشىن عانا جۇمىس ىستەيتىنىن, قىزمەت ساپاسىن جاقسارتۋ شارالارى كوڭىل كونشىتپەيتىنىن اتاپ كورسەتتى.
«وقۋعا, بىلىكتىلىگىن جەتىلدىرۋگە جىبەرىلگەن ماماندار قىزمەتىنە ورالعان كەزدە تىڭ ويمەن, جاڭاشىلدىق يدەيامەن ەرەكشەلەنۋى ءتيىس. وكىنىشتىسى سول, مۇنداي وزگەرىستەر بايقالمايدى. مەملەكەتتىك باسقارۋ اكادەمياسىن ءبىتىرىپ كەلگەن 19 تىڭداۋشىنىڭ جارتىسىنىڭ عانا قىزمەتى وسكەن. بەسەۋى جۇمىسسىز ءجۇر. كۋرستار, وقۋلار قايتارىم بەرمەيتىن بولسا, مەملەكەتتىك قىزمەتشىلەردىڭ بىلىكتىلىگىن ارتتىرۋعا ىقپال جاسالماسا, وندا مەملەكەت قارجىسىن تەككە ءراسۋا ەتۋ دەگەن ءسوز», دەدى قۇمار ىرگەباي ۇلى ماسەلەنى توتەسىنەن قويىپ. قاعازداعى ەسەپ ءۇشىن مەملەكەتتىك قىزمەتشىلەردى وقىتۋدىڭ قاجەتى جوق ەكەنىن باسا ايتتى.
سىبايلاس جەمقورلىققا قارسى ءىس-قيمىل جونىندەگى ۇلتتىق بيۋرونىڭ ءوڭىر بويىنشا دەپارتامەنتىنىڭ باسشىسى نىعمەتجان ساپاروۆ مەملەكەتتىك قىزمەتشىلەر جۇمىس ۋاقىتىندا عانا ەمەس, ودان تىس كەزدە دە وزدەرىن دۇرىس ۇستاۋى تيىستىگىن جەتكىزدى. ولاردىڭ اراسىندا جۇرگەن ورتادا ءجۇرىس-تۇرىستارىن, داستارحان باسىنداعى وتىرىستارىن ءتۇرلى الەۋمەتتىك جەلىلەر ارقىلى جارنامالايتىندار, بىلايشا ايتقاندا, ادەپ نورماسىن ساقتامايتىندار از ەمەس.
وسى رەتتە ق.اقساقالوۆ بارلىق مەملەكەتتىك ورگانداردىڭ سايتتارىن جاڭارتىپ تۇرۋعا باسا كوڭىل ءبولۋ قاجەتتىگىن جينالعانداردىڭ ەسىنە سالدى. «اۋدان اكىمدەرىنىڭ سايتتارىن قاراساڭ, بيۋدجەت قاراجاتىنىڭ قايدا جۇمسالىپ جاتقانى, مەملەكەتتىك ساتىپ الۋلار تۋرالى اقپارات مۇلدەم جوق. ءبىر اۋداندا, ءتىپتى, اقپارات 2015 جىلدان بەرى جاڭارتىلماعان. مەملەكەتتىك ورگاندار جۇمىسىنا تۇرعىنداردان تۇسەتىن ارىز-شاعىمداردىڭ ازايماۋىنىڭ ءبىر سەبەبى وسى», دەدى ول.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
