ايتا كەتكەن ءلازىم, كورمە بيلەتتەرى زياتكەرلىك مەكتەپتەردىڭ وقۋشىلارى ۇيىمداستىرعان قايىرىمدىلىق جارمەڭكەلەرىنەن تۇسكەن قارجىعا الىنعان بولاتىن. وسى شارا ارقىلى تۇرمىسى تومەن وتباسىلاردىڭ بالالارى جازعى دەمالىستارىن ەكسپو قابىرعاسىندا ۇمىتىلماستاي وتكىزبەك.
اتالعان شاراعا, سونىمەن بىرگە, «حالىق» قايىرىمدىلىق قورى دەمەۋشى بولىپ وتىر. سالتاناتتى جيىندا «نازارباەۆ زياتكەردىك مەكتەپتەرى» دببۇ باسقارما ءتورايىمى كۇلاش ءشامشيدينوۆا مەن حالىق بانكى استانا قالالىق فيليالىنىڭ ديرەكتورى جانار راحىموۆا ەكسپو-نىڭ جاس ەلشىلەرىن قۇتتىقتادى.
كۇلاش نوعاتايقىزىنىڭ ايتۋىنشا, قازاقستاننىڭ «نۇر الەم» باس ەكسپوزيتسياسىندا, قىتاي, گەرمانيا, وڭتۇستىك كورەيا, رەسەي جانە باسقا دا ەلدەردىڭ پاۆيلوندارىندا ۇسىنىلعان بولاشاق ەنەرگياسى ەكسپو-نىڭ جاس ەلشىلەرىنە جاڭا الەم قۋاتىنىڭ بەينەسىن كورسەتەتىن بولادى. سونىمەن بىرگە, بالالاردىڭ «بايتەرەك», «استانا-وپەرا», «دۋمان» وكەاناريۋمى, «اتامەكەن» ەتنومەموريالدىق كەشەنى سياقتى ەلوردانىڭ كورىكتى ورىندارىنا ساياحاتى, «نۇرلى جول» جەلەكجولىمەن سەرۋەندەۋ جانە ەسىل وزەنىندە قايىقپەن ءجۇزۋ جوسپارلانىپ وتىر.
حالىق بانكىندە وقۋشىلار تەڭگەنىڭ جانە قارجى نارىعىنىڭ پايدا بولۋ تاريحىمەن تانىسپاق. سونداي-اق, سپورتتىق ويىندار, عىلىمي جانە شىعارماشىلىق جوبالاردى ازىرلەۋ قاراستىرىلعان. وقۋشىلار بوس ۋاقىتتا زياتكەرلىك مەكتەپتەر ءۇشىن ءداستۇرلى ساباققا اينالعان قىش قولونەرى, اۋە كولىگىن مودەلدەۋ, ونەر ديزاينى جانە درامالىق ونەرگە ماشىقتانۋمەن شۇعىلدانادى. اتالعان شارادا ەكسپو كورمەسىنىڭ العاشقى تارتۋى, ياعني جاڭا وقۋ جىلىنا ارنالعان وقۋ قۇرالدارى سالىنعان سومكەگە سەمەي وڭىرىنەن كەلگەن جازعى مەكتەپتىڭ ەڭ جاس قاتىسۋشىسى تاڭشەبەر امانتاي يە بولدى.
دۋمان اناش,
«ەگەمەن قازاقستان»
سۋرەتتى تۇسىرگەن
يگور بۋرگاندينوۆ
