استانا ەكونوميكالىق فورۋمى اياسىندا وڭىرلىك حاب پەن برازيليا سىرتقى ىستەر مينيسترلىگىنىڭ ديپلوماتيا ينستيتۋتى, بانگلادەش پرەمەر-ءمينيسترى كەڭسەسى, ەستونيا ەلەكتروندى باسقارۋ اكادەمياسى, يسلام ىنتىماقتاستىعى ۇيىمىنىڭ زەرتتەۋلەر مەن وقىتۋ ورتالىعى (SESRIC), قازاقستاننىڭ «ازاماتتارعا ارنالعان ۇكىمەت» مەملەكەتتىك كورپوراتسياسى اراسىندا ىنتىماقتاستىق مەموراندۋمدارى مەن كەلىسىمدەرگە قول قويىلدى.
– جاھاندانۋ مەن اقپاراتتىق تەحنولوگيالار باسقارۋ سالاسىندا جاڭا سىناقتار ءارى مۇمكىندىكتەر تۋعىزۋدا: ازاماتتار ءوز كومپانياسىنداعى, مەملەكەتتىك ورگاندارداعى جاعدايدى, جەتەكشىلەر قابىلدايتىن شەشىمدەردى الەمنىڭ باسقا ەلدەرىندەگى جاعدايمەن سالىستىرا الادى, ياعني ولاردىڭ باسشىلىققا قويار تالابى دا كۇشەيۋدە, – دەدى استاناداعى وڭىرلىك حابتىڭ باسقارۋشى كوميتەت توراعاسى ءاليحان بايمەنوۆ.
مەموراندۋمدارعا قول قويۋ راسىمىنە قاتىسۋشىلار مەملەكەتتىك قىزمەت سالاسىن جەتىلدىرۋدە ىنتىماقتاستىق پەن حالىقارالىق ارىپتەستىكتىڭ ماڭىزىن اتاپ ءوتتى. مەملەكەتتىك باسقارۋداعى ورتاق ماقسات ءارى قاجەتتىلىك – لايىقتى ءارى قولايلى ورتانى قالىپتاستىرۋ. جانە بۇل تالاپ قۇندىلىقتارعا, ونىڭ ىشىندە, ەڭ الدىمەن, سىيلاستىق پەن تۇسىنىستىككە نەگىزدەلۋى ءتيىس. «ەگەر ءاربىر باسشى حالىقتىڭ, ءوز قاراماعىنداعى قىزمەتكەرلەردىڭ مۇددەسىن, ابىرويىن, ەڭبەگىن قۇرمەتتەپ, تۇسىنسە, ونىڭ باعا جەتپەس قۇندىلىعى – ۋاقىتىن سىيلاسا, باسقارۋدىڭ تيىمدىلىگى ارتادى», – دەپ سانايدى ءاليحان بايمەنوۆ.
«استانا وڭىرلىك حابى اياسىندا باسقا ەلدەرمەن تاجىريبە الماسامىز. ونىڭ ىشىندە, قازاقستاننىڭ دا مەملەكەتتىك قىزمەت سالاسىنداعى تاجىريبەسىمەن تانىسقىمىز كەلەدى. سوندىقتان, بۇل ىنتىماقتاستىق ءبىز ءۇشىن وتە ماڭىزدى ءارى ەكى مەملەكەتكە دە پايداسىن تيگىزەدى دەپ ويلايمىن», – دەدى بانگلادەش پرەمەر-ءمينيسترى كەڭسەسىنىڭ Access to Information باعدارلاماسى ساياساتى بويىنشا كەڭەسشىسى انير چوۋدحۋري. ال برازيليا ءسىم «ريو برانكو» ديپلوماتيا ينستيتۋتىنىڭ باس ديرەكتورى جوزە ەستانيسلاۋ دو امارال سوۋزا نەتو استاناعا العاشقى ساپارىنىڭ ءساتتى باستالعانىن جانە مەموراندۋمعا قول قويۋ ەكى ەل اراسىنداعى ىنتىماقتاستىققا دا وڭ ىقپالىن تيگىزەتىنىن جەتكىزدى.
قوناقتار حابتىڭ ايماق ەلدەرى مەملەكەتتىك قىزمەتىن دامىتۋعا قوسقان ەلەۋلى ۇلەسى مەن اۋقىمدى ساراپتامالىق قورىن اتاپ ءوتتى. ۇيىمنىڭ ساراپشىلار رەەسترى 25 ەلدىڭ 90-نان استام جەتەكشى ماماندارىن بىرىكتىرەدى, مەملەكەتتىك باسقارۋ سالاسىنداعى 30-دان استام بەدەلدى حالىقارالىق ۇيىممەن تۇراقتى ارىپتەستىك ورناتقان.
سونداي-اق, استانا ەكونوميكالىق فورۋمى اياسىندا ءاليحان بايمەنوۆ ەىدۇ مەملەكەتتىك باسقارۋ بويىنشا ديرەكتورى رولف التەرمەن, اقش فەدەرالدى ينستيتۋتى كوشباسشىلىقتى حالىقارالىق دامىتۋ ديرەكتورى فلەتچەر حانيمۋندپەن, رەسەي پرەزيدەنتى جانىنداعى حالىق شارۋاشىلىعى مەن مەمقىزمەت اكادەمياسى رەكتورى ۆلاديمير ماۋمەن, وزبەكستان پرەزيدەنتى جاعىنداعى مەملەكەتتىك باسقارۋ اكادەمياسى پرورەكتورى باحودير عويبنازاروۆپەن كەزدەسىپ, ءوزارا ىنتىماقتاستىقتى دامىتۋ ماسەلەلەرىن تالقىلادى. ال مەملەكەتتىك باسقارۋ سالاسىنداعى بەلگىلى ساراپشىلار – سينگاپۋر ۇلتتىق ۋنيۆەرسيتەتى شىعىس-ازيالىق ينستيتۋتى پروفەسسورى گور لانس ليانپينگ جانە جاپونيا جوبا مەنەدجمەنتى قاۋىمداستىعىنىڭ نەگىزىن قالاۋشى, پروفەسسور حيروشي تاناكامەن عىلىمي باعىتتا ءوزارا قارىم-قاتىناستى نىعايتۋ تۋرالى پىكىر الماستى.
امەريكا, ەۋرووداق, تمد, كاۆكاز جانە اسەان ەلدەرىن قامتيتىن حاب اۋقىمىنداعى ارىپتەستىك مەملەكەتتىك قىزمەت سالاسىنداعى وزىق ۇلگىلەرمەن تانىسۋدى, ءبىلىم جانە تاجىريبە الماسۋ بويىنشا حالىقارالىق باستامالار مەن شارالارعا قاتىسۋدى, ساراپشىلار جەلىسىن دامىتۋعا ات سالىسۋدى بىلدىرەدى.
مەموراندۋمداردى جۇزەگە اسىرۋ بارىسىندا قاتىسۋشى-مەملەكەت وكىلدەرى ساراپتامالىق ماتەريالدار مەن زەرتتەۋلەر ناتيجەلەرىمەن الماسىپ, بىرلەسكەن عىلىمي-وقىتۋ جوبالارىنا ارالاسا الادى. ولاردىڭ مەملەكەتتىك باسقارۋدىڭ وزەكتى ماسەلەلەرى بويىنشا ورتاق وقىتۋ باعدارلامالارىنا, ونىڭ ىشىندە دارىستەر, سەمينارلار, ترەنينگتەر, كونفەرەنتسيالار مەن فورۋمدارعا قاتىسىپ, وي بولىسە الۋ مۇمكىندىگى بولادى.
قالماحانبەت مۇقامەتقالي,
«ەگەمەن قازاقستان»
