مەرەكەلەرىمەن قۇتتىقتادى

مەملەكەت باسشىسى نۇرسۇلتان نازارباەۆ قازاقستان رەسپۋبليكاسىنىڭ ۇستازدارىنا, ءبىلىم بەرۋ سالاسىنىڭ قىزمەتكەرلەرى مەن ارداگەرلەرى اتىنا قۇتتىقتاۋ جولدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. «سىزدەردى ءتول مەرەكەلەرىڭىز – مۇعالىم­دەر كۇنىمەن قۇتتىقتايمىن! شاكىرتتەرىن ءبىلىم نارىمەن سۋسىنداتىپ, جاقسى قاسيەتتەردى بويىنا دارىتاتىن ۇستازعا دەگەن حالقىمىزدىڭ قۇرمەتى قاشان­دا ەرەكشە. ويتكەنى, قوعامنىڭ باستى باي­لى­عى – ادام بولسا, سول «ادامنىڭ ادامشىلىعى جاقسى ۇستازدان» دەيدى دانا اباي. قازىرگى زاماندا ءبىلىم دەڭگەيى جوعارى ۇلت قانا جاھاندانۋ تالاپتارىنا جاۋاپ بەرە الادى. سوندىقتان ءبىلىم سالاسى – ەلدىڭ ەرتەڭىن ايقىندايتىن, ونىڭ باسەكەلەستىك قابىلەتىنە ىقپال ەتەتىن اسا ماڭىزدى سالا. بيىل ەلىمىز ءوز تاۋەلسىزدىگىنىڭ 20 جىل­دى­عىن اتاپ وتەدى. ءبىز وسى جىلداردا زامان تالابىنا ساي ءبىلىم بەرۋدىڭ جاڭا جۇيەسىن قۇردىق. بۇگىندە مەملەكەتىمىز حالىققا الەم­دىك ستاندارتتارعا ساي ءبىلىم بەرۋ ءۇشىن ءوز تاراپىنان بارلىق جاعدايلاردى جاساۋدا. ۇستاز مارتەبەسىن كوتەرۋ جانە ونىڭ ەرەن ەڭ­بەگىن لايىقتى تۇردە باعالاۋ ورايىندا اۋقىم­دى ءارى جۇيەلى شارالار ىسكە اسى­رى­لۋدا. مەكتەپكە دەيىنگى, ورتا, كاسىپتىك جانە جوعارى ءبىلىم بەرۋدە مۇلدە جاڭا باعىتتار انىقتالىپ, ەلەكتروندى وقىتۋ جۇيەسى ەنگىزىلۋدە. ءبىلىم جۇيەسىنىڭ جانى دا, جۇرەگى دە, تىرەگى دە – ۇستاز. سوندىقتان ەلىمىزدىڭ ەرتەڭگى كەلەشەگى سىزدەردىڭ قولدارىڭىزدا. ەلىمىزدىڭ اتىن الەمگە تانىتاتىن ءبىلىمدى دە تالانتتى شاكىرتتەرىڭىز كوبەيە بەرسىن! سىزدەرگە زور دەنساۋلىق, ۇزاق ءومىر, قيىن دا قاستەرلى ۇستازدىق قىزمەتتە تابىس تىلەيمىن!», دەلىنگەن جەدەلحاتتا.