قىمبات توقتامۇرات,
«ەگەمەن قازاقستان»
– بۇگىندە قازاقستان الەم نازارىن وزىنە اۋدارىپ, حالىقارالىق مامانداندىرىلعان ەكسپو-2017 كورمەسىن وتكىزىپ وتىر. دۇنيەجۇزى كوز تىككەن جاھاندىق شارا كەزىندە ەۋرازيالىق حالىقارالىق كىتاپ كورمە-جارمەڭكەسىنىڭ وتكىزىلۋى – ەرەكشە وقيعا. بۇل شاراعا اقش, گەرمانيا, قىتاي, تۇركيا, رەسەي, ءۇندىستان, يران سەكىلدى الەمنىڭ 25 مەملەكەتىنەن 90 باسپا ءۇيى ءوز ونىمدەرى مەن جاڭا تەحنولوگياسىن ۇسىنىپ وتىر. كورمەگە كەلگەن كىتاپسۇيەر قاۋىم ءتورت كۇن بويى عىلىمي-تانىمدىق, ىسكەرلىك جانە تەحنيكالىق ادەبيەتتەرمەن تانىسىپ, باسپا ءىسىنىڭ سوڭعى جەتىستىكتەرىنە كۋا بولا الادى. كورمە اياسىندا باس-اياعى 100-دەن استام شارا, سونىڭ ىشىندە دوڭگەلەك ۇستەل جيىندارى, سەمينارلار, وقىرماندار فورۋمى, جاڭا كىتاپتاردىڭ تانىستىرىلىمى وتەدى. ەندەشە, ادامزاتتى مەيىرىمدىلىككە, ىزگىلىككە, وركەنيەتكە باستايتىن كىتاپ الەمىنىڭ مەرەكەسى قۇتتى بولسىن! – دەدى مەملەكەتتىك حاتشى.
بۇدان كەيىن مەملەكەتتىك حاتشى ەۋرازيالىق حالىقارالىق كىتاپ كورمە-جارمەڭكەسىن ارالاپ كوردى. ونىڭ العاشقى ايالداعان «الماتىكىتاپ» باسپاسى كىتاپ كورمەسىنە 500 كىتاپ اكەلگەن ەكەن. سونىڭ ىشىندە «ەل جۇرەگى – اجارلى قالا استانا» اتتى تانىمدىق كىتاپتىڭ العاشقى نۇسقاسى كورمە-جارمەڭكەگە قويىلدى. بۇل باسىلىمدا ەلوردا ماڭىنداعى كونە بوزوق قالاشىعىنىڭ تاريحى جەڭىل تىلمەن, ۇعىنىقتى جازىلىپتى. نەگىزىنەن كىتاپ مەكتەپ وقۋشىلارىنا ارنالعانىمەن, ەرەسەكتەر دە ودان باس شاھار تۋرالى كوپتەگەن مالىمەت الا الادى.
جۇرتشىلىقتى رۋحاني الەمگە جەتەلەپ, ءبىلىم كوكجيەگىن كەڭەيتەتىن كىتاپ كورمەسىندە ايگىلى الەمدىك جانە وتاندىق اقىن-جازۋشىلارمەن كەزدەسۋ دە ۇيىمداستىرىلماق. سونىمەن بىرگە, قالىڭ كوپشىلىك ادەبيەت الەمىنىڭ ءالى سياسى كەپپەگەن دۇنيەلەرىمەن دە تانىسا الادى. ولاردىڭ قاتارىندا قازاقستاندىق بەلگىلى اقىن-جازۋشىلاردىڭ دا كىتاپتارى وقىرمانعا جول تارتادى.
كورمە اياسىندا, جوعارىدا ايتىلعانىنداي, اۋقىمدى مادەني-ىسكەرلىك باعدارلامالاردى ىسكە اسىرۋ جوسپارلانىپ وتىر. ونىڭ ىشىندە تانىمال مادەنيەت قايراتكەرلەرىمەن, جازۋشىلارمەن جانە اقىندارمەن كەزدەسۋلەر وتەدى, ەتنومادەني بىرلەستىكتەر ونەر كورسەتەدى.
مەملەكەتتىك حاتشى ەۋرازيالىق «Eurasian Book Fair-2017» حالىقارالىق كىتاپ كورمە-جارمەڭكەسىندە كىتاپتاردىڭ ەكسپوزيتسيالارىمەن تانىسىپ, قاتىسۋشىلاردىڭ بارلىعىنا شىعارماشىلىق بايلانىستاردى ىلگەرىلەتىپ, جوعارى كاسىبي تابىسقا جەتۋگە تىلەكتەستىك ءبىلدىردى.
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
