ەلەۋسىنوۆتىڭ ەكپىنى

كەشە باكۋدە بوكستان ءوتىپ جاتقان الەم چەمپيوناتىنىڭ بەسىنشى كۇنى ءبىزدىڭ قۇرامادان شارشى الاڭعا 64 كيلو سالماقتاعى دانيار ەلەۋسىنوۆ شىعىپ, شوتلانديالىق دجوش تەيلورمەن قولعاپ ءتۇيىستىردى. وسى كەزدەسۋدە قولىنا بىل­عارى قولعاپ كيگەلى بەرى العاش رەت الەم چەمپيوناتىنا قاتى­سىپ جات­قان ءبىزدىڭ بوكسشى قار­سىلا­سىن ايقىن باسىمدىقپەن جەڭىپ, كەلەسى اينالىمعا جولداما الدى. بۇ­عان دەيىن ءجاسوس­پى­رىم­دەر اراسىن­دا الەم چەمپيو­نى, جاستار ارا­سىن­داعى الەم بىرىنشىلىگىنىڭ كۇ­مىس جۇلدەگەرى, بىلتىرعى جىلعى جازعى ازيا ويىن­دارىنىڭ جەڭىم­پازى اتان­عان استانالىق بوكس­شى­عا ۇلت­تىق قۇرامانىڭ باس باپكەرى مىرزاعالي ايتجانوۆ بەكەر سەنىم ارتپاپتى. كەزدەسۋدە ول ءوزىن ەر­كىن سەزىنىپ, ءبىرىنشى راۋندتان باس­تاپ-اق سوققىلار جاساۋعا كوشتى. شوتلانديالىق تا وسال بوكس­شى ەمەس ەكەن, ءبىزدىڭ بوكسشى­نىڭ شابۋىلىنا جاۋاپ قايتارۋ­عا ۇم­تىلىپ وتىردى. بىراق ەكىنشى راۋندتا ەلەۋسىنوۆ قارسى­لا­سىن نوك­داۋنعا جىبەردى. الايدا, تەيلور ەسىن تەز جينادى. وسى كەزدە ۇلتتىق قۇرامانىڭ باپكەرى مىرزاعالي ايتجانوۆ پەن ءوزى­نىڭ جەكە باپكەرى جانە اكەسى مارات ەلەۋسىنوۆتىڭ شار­شى الاڭ­نىڭ سىرتىنان دانيار­عا كەڭەستەرىن بەرىپ, قامشىلاپ جات­قانىن دا كوزىمىز شالدى. باپكەر­لەرىنىڭ ايت­قان سول اقىل-كەڭەسىمەن بوكسشى دا العا ۇمتىلۋىن جالعاس­تىرىپ, قارسىلاسىنا بىرنەشە ادەمى سوق­قى­لار جاساپ ۇلگەردى. قازاق بوكس­شى­سىنىڭ قاھارىنا ىلىككەن تەي­­لور كەزدەسۋدەگى ەسەپتى تەڭەس­تىرۋ­گە تىرىسقانىمەن, ونىسىنان ەشتەڭە شىقپادى. ال ءۇشىنشى راۋند تازا تاۋەل­سىزدىكتىڭ ءتول قۇرداسىنىڭ باسىم­دىعىمەن ءوتتى دەسە بولادى. ءسوي­تىپ, كەزدەسۋدىڭ سوڭىندا وسىنداي تاك­تيكانى ۇستانعان بوكسشىمىز شوت­لانديالىق قارسىلاسىن 11 : 5 ەسەبىمەن ايقىن جەڭدى. ءبىزدىڭ بوكسشىنىڭ سالماعىندا كۋبالىق رونيەل سولوتونگو, اعىل­شىن توماس ستالكەر, ازەربايجان گايباتۋللا گادجاليەۆ, ماجار گۋيلا كاتە, موڭعول مۋنكح ەردەنە ۋرانچيمەس بار. دەگەنمەن, بوكس­شى­نىڭ اكەسى جانە باپكەرى مارات ەلەۋسىنوۆتىڭ ايتقانىنداي, ءار اي­قاسقا دۇرىس تاكتيكا ۇستانىپ شى­عاتىن قازاقستاندىقتىڭ بيىلعى الەم چەمپيوناتىنان دامەسى زور. سوڭعى كەزدەرى ەلىشىلىك جارىس­تار­دا قارسىلاستارىن شىداتپاي جۇرگەن بوكسشىمىز بىلتىرعى ازيا ويىندارىندا التىن تۇ­عىر­دان قول بۇلعاپ, ءوزىن جاقسى قىرىنان كورسەتكەن بولاتىن. جالپى, وسى جولعى الەم چەم­پيوناتىندا وليمپيا ويىن­دارى­نىڭ 92 جولداماسى ساراپقا سالى­نۋ­دا. بۇل سىندا لوندونعا جولداما الۋ ءۇشىن بوكسشىلار 49 كيلو, 91 كيلو جانە +91 كيلو سالماق دارەجەلەرى بويىنشا ۇزدىك التى بوكسشىنىڭ قاتارى­نان كورىنۋگە ءتيىس. ال وزگە سال­ماق­تاردا شيرەك فينالعا شىقسا دا جەتكىلىكتى. بۇگىن باكۋ رينگىنە 60 كيلو سالماقتا عاني جايلاۋوۆ پەن 75 كيلوداعى دانابەك سۋجانوۆ شىعادى. ەكەۋى دە قازاقستاننىڭ ءبىر ەمەس, بىرنەشە دۇركىن چەم­پيو­نى. جايلاۋوۆ جامبىل وب­لى­سىنىڭ وكىلى. كوماندا ساپىن­داعى تاجىريبەلى بوكسشىلاردىڭ ءبىرى. ول ستۋدەنتتەر اراسىنداعى الەم چەمپيوناتى مەن ازيا چەمپيو­ناتىندا جەڭىس تۇعىرىنا كوتەرىل­گەن. 2009 جىلى ميلاندا وتكەن الەم چەمپيوناتىنا دا قاتىستى. بىراق, سول كەزدە ونىڭ جولى بول­مادى. قازاق­ستان­دىق­تىڭ بيىلعى چەمپيوناتتاعى ال­عاشقى قارسى­لا­سى – جاپون شوتا ناكاياما. دانابەك سۋجانوۆ ەرەسەكتەر اراسىنداعى الەمدىك دودادا رينگ­كە العاش رەت شىققالى وتىر. ونىڭ قارسىلاسى – تايپەيلىك يانگ يۋ تينگ. وسى باسە­كەگە وسكە­مەن­نەن دانابەكتىڭ اكەسى جۇماعۇل سۋجانوۆ تا كەلىپتى. بالاسىنا جانكۇيەر بولۋ ءۇشىن عوي. اكەسى­مەن كۇن سايىن كەزدەسەمىز. «جەڭە مە؟ جولداما الا ما؟» دەپ سۇرايمىز. ءوزى دە كەزىندە ءتورت جىل بوكسپەن اينالىسقان جۇكەڭ: «ازىرشە ەشتەڭە ايتپايمىن. ءبارىن رينگ كورسەتەدى», دەيدى تۋرا جاۋاپتان قاشقاقتاپ... داستان كەنجالين, «ەگەمەن قازاقستان» – باكۋدەن.