الەم ەلىمىزگە كوز تىگەدى

كەشە سىرتقى ىستەر مينيسترلىگىندە پارلامەنت سەناتىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ كوشپەلى وتىرىسى بولىپ ءوتتى. ونىڭ بارىسىندا سىرتقى ىستەر ءمينيسترى ەرجان قازىحانوۆ ەلىمىزدىڭ سىرتقى ساياساتتاعى باستى باعىتتارى جايىندا بايانداپ بەردى. ءوز سوزىندە ە.قازىحانوۆ «قوعامى­مىز­دىڭ بارلىق سالاسى بويىنشا ماڭىزدى شەشىمدەر قابىلدايتىن پارلامەنتىمىزدىڭ ءرولىن ەرەكشە اتاي وتىرىپ, ءداستۇرلى كەزدەسۋلەرىمىزدە سىرتقى ساياسات سالاسىنىڭ وزەك­تى ماسەلەلەرى جونىندە سىزدەرمەن جان-جاقتى پىكىر الماسىپ وتىرامىز, ءاردايىم ۇيلەسىم­دى جۇمىس ءجۇر­گىزىپ كەلەمىز. پرەزيدەنت نۇر­سۇل­تان نازار­باەۆتىڭ الەمدىك بەدەلى مەن با­يىپتى سىرتقى ساياسي ستراتەگيا­سىنىڭ ار­قا­سىندا حالىقارا­لىق قوعامداس­تىقتا ديپ­لو­ماتيالىق زور تا­بىس­تارعا قول جەتكىزىپ, ەل مارتەبەسىن كوتەرەر مازمۇندى ءىس-شارالار جۇزەگە اسىرىلدى. بۇل ساياسي جەتىستىكتەرىمىز, ارينە, پارلامەنت سەناتى­نىڭ حالىق­ارا­لىق قاتىناستار, قور­عانىس جانە قاۋىپ­سىز­دىك كوميتەتىنىڭ مۇشەلەرى بو­لىپ تابىلاتىن سىزدەرمەن بىرلەسە ۇيلەسىم­دى اتقارعان كۇش-جىگەرىمىزدىڭ ناتيجەسى دەپ سانايمىز. بۇل رەت­تە مەملەكەتتىك قىزمەتتە جانە سىرتقى سايا­سات سالاسىندا جيناقتاعان ومىرلىك مول تاجىريبەلەرى بار, سونىمەن قاتار, ەلىمىزگە بەلگىلى زيالى قاۋىم, قوعام جانە مەملەكەت قايراتكەرلەرىنەن تۇراتىن سەناتورلاردىڭ ءار­دايىم كورسەتىپ وتىرعان قولداۋلارىن ەرەك­شە اتاپ وتكىم كەلەدى», دەي كەلىپ, 20 جىل ىشىندە ءبىزدىڭ جاس مەم­لە­كەتىمىزدىڭ سىرتقى ساياسي سالادا زور تا­بىس­قا يە بولۋى قازاق­ستان رەسپۋبليكا­سىنىڭ پرەزيدەنتى ن.ءا.نا­زار­باەۆتىڭ مەملەكەتتى جا­ڭار­تۋداعى قىزمەتى­نىڭ ناتيجەسى بولىپ تابى­لاتىنىن اتاپ كورسەتتى. ودان ءارى ەلىمىز ءسىم-ءىنىڭ باسشىسى ەقىۇ-دا الىنعان پراكتيكالىق تاجىريبە ەندى قازىر 1,5 ملرد.-تان استام حالقى بار 57 مەملەكەتتى بىرىكتىرگەن يسلام ىنتىماق­تاس­تىعى ۇيى­مى­نا توراعالىق تۇسىندا قولدا­نىلاتىنىن اي­تىپ, قازاقستاننىڭ يىۇ-عا توراعا بولۋى استانادا ماۋسىم ايىندا وتكەن سىرتقى ىستەر مي­نيسترلەرىنىڭ 38-ءشى كەڭەسىندە ۇيىم اتى­نىڭ يسلام ىنتى­ماقتاس­تىعى ۇيىمى بولىپ ءوز­گەرۋىمەن يس­لامدىق ۋمماعا ايگىلى تاريحي وقيعا بولىپ ەنگەنىن دە ەسكە سالدى. ال ەلىمىز ابىرويىنىڭ يسلام الەمىندە بيىك بولۋى بارلىق قازاقستاندىق شەشىم­دەر­دىڭ, اتاپ ايتساق, سەمەي پوليگونى جابىلۋى­نان باستاپ يادرولىق سىناق­تارعا قارسى ارە­كەت­تەسۋگە دەيىنگى ارا­لىق­تاعى شەشىمدەردىڭ حالىقارالىق قوعامداستىق تاراپىنان قولداۋ تابۋى­نان باستاۋ الاتىنىنا ەكپىن ءتۇسىرىلدى. مينيستر نازارىنان ستراتەگيالىق ارىپتەستەر دە تىس قالمادى. «بۇگىنگى كۇنى ءبىزدىڭ سترا­تە­گيالىق ارىپتەستەرىمىز: رەسەي, قىتاي, اقش, ەۋرووداقپەن ىنتىماقتاستىعىمىز جاڭا ساپالى دەڭگەيدە دامىپ كەلە جاتىر», – دەپ اتاپ ءوتتى ە.قازىحانوۆ. پارلامەنت سەناتىنىڭ حالىقارا­لىق ىستەر, قورعانىس جانە قاۋىپسىزدىك كوميتەتى­نىڭ توراعاسى قۋانىش سۇلتانوۆ مينيستر­دىڭ سىرتقى ساياسات بويىنشا كەڭ قامتىل­عان, ماز­مۇندى بايانداماسىنا العىسىن ءبىلدىرىپ: «كە­ڭەس زامانىندا ەگەر ءبىزدىڭ ۇلتى­مىزدىڭ وكىلى حالىق­ارا­لىق دارەجەدەگى ءبىر مىنبەرگە كو­تە­رى­لىپ سويلەسە, توبەمىز كوككە جەتەتىن ەدى, ال قا­زىر بۇل وتە ۇيرەنشىكتى جاع­داي. ءشۇ­كىر, قازىر الەم قازاقستاندى تا­نى­دى, ونىڭ تابىستارى مەن يگىلىكتى باستاما­لارى­نا كوز تىگىپ قاراپ وتىر», دەدى. انار تولەۋحانقىزى.