قارجى ءمينيسترىنىڭ ورىنباسارى بەرىك شولپانقۇلوۆتىڭ ايتۋىنشا, سەناتتىڭ جۇمىس توپتارى مەن كوميتەتتەرىندە بيۋدجەتتىڭ اتقارىلۋ قورىتىندىلارى جان-جاقتى تالقىلاندى.
سەناتورلار نەگىزگى ماكروەكونوميكالىق كورسەتكىشتەر مەن بيۋدجەت ۇدەرىستەرىن جەتىلدىرۋگە قاتىستى ساۋالدار قويىپ, ۇسىنىستارىن ايتتى. مينيسترلىكتىڭ مالىمەتتەرىنشە, 2016 جىلى بيۋدجەت تۇسىمدەرى 100,2 پايىزعا ورىندالىپ, 7 تريلليون 760 ميلليارد تەڭگەنى قۇرادى, شىعىستار 8 تريلليون 501 ميلليارد تەڭگە, نەمەسە 98 پايىزعا شىقتى. بيۋدجەت تاپشىلىعى 741 ميلليارد تەڭگەنى قۇرادى نەمەسە ىشكى جالپى ءونىمنىڭ 1,6 پايىزى بولدى.
رەسپۋبليكالىق ەسەپ كوميتەتىنىڭ توراعاسى نۇرمۇحامبەت ابدىبەكوۆ 2016 جىلعى رەسپۋبليكالىق بيۋدجەتتىڭ اتقارىلۋى جونىندەگى ۇكىمەتتىڭ ەسەبى تۋرالى مەكەمەنىڭ قورىتىندىسىمەن تانىستىردى.
ۇلتتىق بانكى توراعاسىنىڭ ورىنباسارى الپىسباي احمەتوۆ 2016 جىلعى اقشا-نەسيە ساياساتىن ىسكە اسىرۋ قورىتىندىلارى تۋرالى دەپۋتاتتاردى حاباردار ەتتى.
سەناتورلار راشيت احمەتوۆ, سەرگەي ەرشوۆ, ەربولات مۇقاەۆ, قايرات يششانوۆ, سەرىك جاقسىبەكوۆ, بەكمىرزا ەلامانوۆ تالقىلاۋعا قاتىستى.
دەپۋتاتتاردىڭ ساۋالدارىنا قارجى ءمينيسترى باقىت سۇلتانوۆ جانە مينيسترلىكتەر مەن مەكەمەلەردىڭ باسقا دا وكىلدەرى جاۋاپ بەردى. پىكىرتالاس قورىتىندىسى بويىنشا ۇكىمەتتىڭ جانە رەسپۋبليكالىق ەسەپ كوميتەتىنىڭ 2016 جىلعى رەسپۋبليكالىق بيۋدجەتتىڭ اتقارىلۋى جونىندەگى ەسەپتەرىن پالاتا وتىرىسىندا قاراۋ تۋرالى شەشىم قابىلداندى.
