جارىستا جۇيرىكتەر 25 شاقىرىمدىق الامان بايگە جىبەرىلسە, 15 شاقىرىمدىق توپ بايگە, 7 شاقىرىمدىق جورعالار جارىسى وتكىزىلەدى. سونىمەن قاتار, 7 شاقىرىمعا قۇنان بايگە, 2 400 جانە 1 800 مەتر قاشىقتىقتا ۇشقىر اتتار سىنالادى.
جارىستىڭ جۇلدە قورى - 63,6 ملن تەڭگە (200 000 دوللار). اقشالاي سىياقى بەسىنشى ورىنعا دەيىن بەرىلەدى.
ناقتىراق ايتىپ وتسەك, الامان بايگەدە باس جۇلدەگە 10 ملن تەڭگە, ەكىنشى ورىنعا 5 ملن, ءۇشىنشى ورىنعا 1,5 ملن تەڭگە بەرىلسە, مارەگە ءتورتىنشى كەلگەن جانە بەسىنشى بولىپ جەتكەن شاباندوزعا تيىسىنشە 1 ملن مەن 500 000 تەڭگە سىياقى بەرىلەدى. توپ بايگەدە جەڭىمپازعا 5 ملن تەڭگە, كۇمىس جۇلدەگەرگە 2 ملن, ءۇشىنشى ورىنعا 1 ملن, مارەگە ءتورتىنشى كەلگەن ادامعا 500 مىڭ, بەسىنشى ورىنعا 300 مىڭ تەڭگە تاعايىندالادى.
قۇنان بايگەدە باس جۇلدەگە 3 ملن, كۇمىس جۇلدەگەرگە 1,5 ملن, قولا جۇلدەگەرگە 1 ملن, ءتورتىنشى ورىنعا 500 مىڭ جانە بەسىنشى ورىنعا 300 تەڭگە تىگىلەدى. جورعا اتتار جارىسىندا جەڭىمپاز 1,5 ملن, كۇمىس جۇلدەگەر 700 مىڭ تەڭگە, قولا جۇلدەگەر 400 مىڭ, ءتورتىنشى جانە بەسىنشى ورىندى قاناعات تۇتقان ادام 200 مىڭ جانە 100 مىڭ تەڭگە الادى.
جارىسقا ەلىمىزدىڭ 14 وبلىسى مەن استانا جانە الماتى قالالارىنان شاباندوزدار قاتىسادى. سونداي-اق, رەسەي, قىرعىزستان, تاجىكستان, تۇركيا, بولگاريا مەن باسقا دا ەلدەردەن شاباندوزدار كەلەدى.
تاعى ءبىر ايتا كەتەرلىگى جارىستىڭ ءۇزىلىسى كەزىندە «تەڭگە ءىلۋ», «جامبى اتۋ», «قىز قۋ», قازاقى تازى يتتەر جارىسى سياقتى ۇلتتىق سپورت تۇرلەرىنەن كورسەتىلىمدەر ۇيىمداستىرىلادى. جارىس مادەنيەت جانە سپورت مينيسترلىگى, ۇلتتىق سپورت تۇرلەرى قاۋىمداستىعى, استانا قالاسىنىڭ اكىمدىگى, الماتى وبلىسىنىڭ اكىمدىگى مەن قازاقستاننىڭ بايگە تۇرلەرى قوعامىنىڭ ۇيىمداستىرۋىمەن وتەدى.
