30 قىركۇيەك، 2011

تابىستىڭ تايقازانىن تاسىتساق

241 رەت كورسەتىلدى
وليمپيادا – ەل مەرەيى بۇكىل دۇنيەجۇزى سپورتتىق شارالار جونىنەن وليمپيادا ويىندارى دەگەندە بەيتاراپ قالماسى انىق. سوڭعى وتكىزىلگەن بەيجىڭدەگى ءححىح-شى جازعى وليمپيادا ويىندارى ءالى كۇنگە كوزى قاراقتى سپورتسۇيەر قاۋىمنىڭ كوڭىلىنەن شىعا قويعان جوق. ءبارىمىز دە ونىڭ قۋانىشى مەن كۇيىنىشى جونىندە اركەز ويعا الامىز. ويتكەنى الدا لوندوندا وتەتىن جازعى ححح جازعى وليمپيادا ويىندارى توبە كورسەتىپ تۇر. ارينە، وتكەننەن ساباق الماي، العا قاراي قا­دام باسا الماسىمىز انىق. سوندىقتان، الەمنىڭ ءتورت تاراپىنان، ياعني 200-دەن استام ەلدەن 11 مىڭ­عا جۋىق سپورتشى قاتىسقان بەيجىڭ وليم­پيادا­سىنىڭ ءدۇبىرىن قايتا اقتارىپ كورسەك. بەي­جىڭگە ءبىزدىڭ ەلدەن سپورتتىڭ 22 تۇرىنەن 132 سپورت­شى ات قوستى. جىل باسىنان وليمپياداعا كىمدەر بارادى، كىمنىڭ كۇشى، كىمنىڭ مىسى مىقتى دەپ سالماقتاپ ءجۇرىپ اپارعان 132 سپورتشىنىڭ 13-ءى عانا ءۇمىتتى اقتادى. بارعا قاناعات ەتىپ قالعان حالقىمىز «بۇعان دا شۇكىر» دەسەك، باق وكىلدەرى «ەلىمىزدىڭ ەڭسەسىن كوتەرگەن ەرلەرىمىز جارادى!» دەپ جارىسا جازدى. ارينە، قاناعاتشىلدىققا نە جەتسىن. بىراق، «اتتەگەن-ايلاردى» جاسىرا بەرسەك، بۇدان ءارى جاعدايىمىز جاقسارىپ كەتپەيتىنى دە شىندىق. باسقاسىن بىلاي قويعاندا بەيجىڭ تورىندە ءبىزدىڭ سپورتشىلارىمىزدىڭ ىشىنەن بوكسشىلا­رى­مىز بەن بالۋاندارىمىزعا جانە اۋىر اتلەتتەرگە زور سەنىم جۇكتەلگەن. ويتكەنى وسى سپورت ءتۇر­لە­رىنەن ولار بۇدان بۇرىنعى وليمپيادالاردا قان­جىعامىزدى مايلاپ، ابىرويىمىزدى اسقاقتاتىپ ەدى. سولاردىڭ ارقاسىندا جالپى كوماندالىق ەسەپتە التانتادا 24-ءشى، سيدنەيدە 22-ءشى، ورىنعا تابان تىرەگەن بولاتىنبىز. ال بۇل جولى جالپى كوماندالىق ەسەپ بويىنشا 29-شى ورىندى قاناعات ەتتىك. بۇدان بۇرىنعى وتكەن وليمپيادا قورىتىندىلارىمەن سالىستىرار بولساق، مىنا­داي ناتيجەنى كورگەن بولار ەدىك: اتلانتادا (1996 جىل): 3 التىن، 4 كۇمىس، 4 قولا (بارلىعى 11 مەدال); سيدنەيدە (2000 جىل): 3 التىن، 4 كۇمىس (بار­لى­عى 7 مەدال); افينىدا (2004 جىل): 1 التىن، 4 كۇمىس، 3 قولا (بارلىعى 8 مەدال); بەيجىڭدە (2008 جىل): 2 التىن، 4 كۇمىس، 7 قولا (بارلىعى 13 مەدال). بىلاي قاراعاندا ناتيجە جامان ەمەس. ءار وليمپيادا سايىن جەتىلىپ، ءوسىپ كەلە جاتقانىمىز بايقالادى، بىراق، دامۋىمىز قارقىندى ەمەس. اسىرەسە، «ءبىز بىلعارى قولعاپ سپورتىنان كۋبادان كەيىن ەكىنشى ورىندامىز» دەپ بورىكتەرىن اسپانعا لاقتىرعان بوكسشىلارىمىز ءۇمىتتى اقتامادى. قورجىنىمىزعا ەكى التىن سالعان ەكى سپورت­شىمىز – يليا يلين مەن باقىت سارسەكباەۆتىڭ جانارلارىنان وت ۇشقىنداپ، جاستىق جىگەرلەرى مەن نامىس قاتار ءورىلىپ تۇرعانىن تەلەديدارعا تەل­مىرگەن قالىڭ قازاق بايقاماي قالعان جوق. ولار وزدەرىنە سەنىمدى ەدى. 20 جاسقا ەندى عانا اياق باسقان يليا «مەن ءبىرىنشى ورىن الامىن» دەپ، ەكرانعا قايتا-قايتا نىعارلاي ايتقانى، وسى سەرتىندە تۇرىپ، زىلتەمىردى سەرپە كوتەرگەندە، قازاق­ستاندىقتاردىڭ ءبارى ورىندارىنان ءبىر كوتەرىلىپ تۇرعانى انىق ەدى. «ءبىر دە ءبىر التىنسىز قالار ما ەكەنبىز» دەپ كوڭىلى كۇپتى بولىپ كۇتكەن حالىقتىڭ ءۇمىتىن اقتاعان يليا ءيليندى ەرەكشە اتاۋ كەرەك. ال باقىتتىڭ جايى بەلگىلى. وزبەكتەردىڭ قيانا­تى­نا شىداماعان نامىسقوي قازاق قانىندا ويناعان نامىسىنىڭ ارقاسىندا التىندى اتا-باباسىنىڭ اتامەكەنىندە قالدىردى. بايراقتى باسەكەدە باق پەن باپ، نامىس جەتەلەيتىنىن دالەلدەدى ولار. ال ءبىزدىڭ جىگىتتەردى بۇدان بۇرىن العان جۇلدەلەرىنىڭ بۋى قىستى ما، الدە، ءوز ەلىمىزدە ءجۇرىپ وزگەگە جالتاقتاۋدان جىگەرى جاسىپ قالعان با، ايتەۋىر، جانارلارى سولعىن، ەڭسەلەرى ەڭكىش قالپى ەلىمىزگە ورالدى. وسىعان قاراپ، ءبىزدىڭ بوكسشى­لارى­مىزدا توقمەيىلسۋ باسىم بولدى-اۋ دەگەن ويعا قالاسىڭ. جاتتىقتىرۋشىلاردىڭ «ءبىزدىڭ جىگىتتەر بابىندا» دەگەنىنە سەنىپ، وزدەرىنىڭ بارلىق ءمۇم­كىندىكتەرىن تولىق پايدالانا الماعان ولار بار بالەنى تورەشىلەرگە جاۋىپ، تومەن قاراعان قالپى قايتىپ كەلدى. وليمپياداعا توعىز قازاق جىگىتىمەن «ارپا ىشىندە ءبىر بيداي بوپ» وتىزعا قاراپ «قار­تايعان» كەزىندە اتتانداپ بارعان گاليب جافاروۆ ءوز قانداسى ازەربايجاندىق بوكسشىعا العاشقى كەزدەسۋدە-اق ەسە جىبەردى. كوبىمىزگە بۇل ادەيى ىستەلگەن ارەكەت سياقتى كورىنگەنى راس. بىردەڭە دەپ اۋىز اشساڭ، ۇلتارالىق قاتىناسقا شي جۇگىرتىپ قويدىم با دەپ، ۇندەمەي ىشىمىزدەن كۇڭكىلدەيمىز دە قويامىز. وسى وليمپيادا – قازاقستاننىڭ نامىسىن قازاقتىڭ عانا بالاسى قورعاي الادى دەگەن ءپرينتسيپتى بەرىك ۇستانۋ كەرەك ەكەنىن كورسەتتى. ءبىر قۋانارلىعى، وليمپيادا ويىندارىندا ال­عاش رەت دزيۋدودان جۇلدەگەر اتاندىق. 100 كي­لو­عا دەيىنگى سالماقتا اسحات جىتكەەۆ كۇمىستەن القا تاقتى. ەركىن كۇرەس پەن گرەك-ريم كۇرەسى شەبەر­لەرىنىڭ ونەرى مەن جەتكەن جەتىستىكتەرىن ايتپاي كەتۋگە بولماس. ويتكەنى ولار ءبىزدىڭ قورجىنىمىزعا تۇسكەن 13 مەدالدىڭ سانىن تولىقتىرعاندار. مى­سا­لى، ەركىن كۇرەسشىلەرىمىز 1 كۇمىس، 1 قولا جۇلدە­گە يە بولسا، گرەك-ريم كۇرەسشىلەرىمىز 2 قولا ءجۇل­دەنى ەنشىلەدى. تاەكۆوندودا دا تۇڭعىش رەت وليمپيادا ويىندارىندا جۇلدەگە يە بولدىق. 80 كيلودان جوعارى سالماق دارەجەسىندە نامىستى قولدان بەرمەگەن، ءبىر جاعىنان بابىنان گورى باعى باسىم بولعان ارمان شىلمانوۆ قولا مەدالعا يە بولدى. قالاي دەسەك تە بۇل وليمپيادا ءبىزدىڭ ورەمىز بەن وركەنيەتىمىزدى، كەڭدىگىمىز بەن كەمدىگىمىزدى اي­قىنداپ بەردى، تەك ودان ەل اعالارى مەن جات­تىق­تىرۋشىلار، قول سوزىم جەردە تۇرعان جۇلدەدەن قاپى قالعان سپورتشىلار ناتيجە شىعارسا بولدى دەيسىڭ. وليمپياداعا تۇڭعىش رەت قاتىسقان قول دوبى مەن ۆولەيبول سياقتى سپورتتىق ويىنداردا ويسى­راي جەڭىلگەن قىزدار كومانداسى قىتايعا بارىپ قايتقاندارىن عانا ماقتانىش ەتتى. ويتكەنى، وسى سالاداعى سپورتشىلارىمىز الەمدىك دەڭگەيدە ونەر كورسەتۋگە جەتە قويعان جوق ەدى. سونداي-اق، بۇل وليمپيادا قازاق بالاسى ءۇشىن كۇرەس پەن بوكستان دا باسقا سپورت تۇرلەرى بار ەكەندىگىن، ماسە­لەن، ستەندتىك اتۋ، قازىرگى بەسسايىس، سينحروندى ءجۇزۋ، ساداقپەن اتۋ، ۆەلوسپورت، اكادەميالىق ەسۋ، ءۇس­تەل تەننيسى، بايداركا جانە كانوە ەسۋ دەگەن سي­ياقتى سپورت تۇرلەرىنە كوڭىل ءبولۋ كەرەك ەكەنىن ەسكە سالعانداي بولدى. اتتەڭ، ءبىزدىڭ جوعارى جاقتا وتىرعان اعالا­رى­مىز اۋىزدارىن كورشىلەرگە اشىپ، سپورتشىلاردى ساتىپ الۋعا ماشىقتانىپ العان. تاس قالادا وسكەن بالا مەن كۇنگە كۇيىپ، قۇمعا اۋناپ وسكەن بالانىڭ جىگەرىن تاني المايتىندىعىمىزدى بۇدان بۇرىن­عى وليمپيادالاردا دالەلدەنگەن ەدى. بۇل جولى دا وسى قاراپايىم قاعيداعا كوزىمىز جەتكەندەي بول­دى. ولاي بولسا، بىلەك پەن ءبىلىمىڭ قاتار كورىنەتىن سپورت دەگەن سالاعا بارماق باستى، كوز قىستى ارە­كەتتىڭ جۇرمەيتىنىن تاعى ءبىر مارتە ەسكە الا وتى­رىپ، الداعى لوندون ويىندارىندا وسى قاتە­لىك­تەر مەن وكىنىشتەر قايتالانباي ەل مەرەيىن ارت­تىرار سپورتشىلارىمىز كوبەيسە دەگەن نيەت بار. ازيادا ارماندارعا جول اشتى «جاسامپازدىقتىڭ جيىرما جىلى» دەپ اتال­عان اعىمداعى جىلدىڭ بەتاشارى دا الەم نازا­رىن قازاق ەلىنە اۋدارتقان ساياسي ماڭىزدى شارالارمەن قاتار الەمدىك سپورتتىق ءىس-شارالارمەن باستالعان بولاتىن. الەمدىك سپورتتا قىسقى وليمپيادا ويىندا­رى­نىڭ ءوتۋى ماڭىزدى وقيعالاردىڭ ءبىرى بولىپ سا­نالادى. 1956 جىلى يتاليانىڭ كورتينا د امپەتستسو قالاسىندا وتكەن VII قىسقى وليمپيادا وي­ىندارىنا قازاقستان العاش رەت قاتىستى. جال­پى قىسقى وليمپيادا ويىندارىنا 206 قازاق­ستان­دىق سپورتشى قاتىسقان. ونىڭ ىشىندە 5 سپورت­شى ول­يم­پيادا جەڭىمپازى اتاندى. 2010 جى­لى قازاق­ستاندىق سپورتشىلار ۆانكۋۆەردە ءوت­كەن وليمپيادا ويىندارىنىڭ 9 تۇرىنە قاتىسۋ ءۇشىن 40 ليتسەنزيا جەڭىپ الدى. قازاقستاندىق سپورت­شىلاردىڭ ۆانكۋۆەر-2010 وليمپياداسىنا قاتىسۋى ەلىمىزدەگى قىسقى سپورت تۇرلەرىنىڭ دا­مۋىنا سەپتىگىن تيگىزدى. ال سپورتشىلارىمىزدىڭ جەتىستىكتەرى ءوسىپ كەلە جاتقان جاس سپورتشىلار ءۇشىن ۇلگى بولدى. سپورت الەمىندەگى ۇزدىكسىز العا جىلجۋ مەن بيىك سپورتتىق باعىندىرۋلار ناتيجەسى قىسقى ازيا ويىندارىنىڭ تەك قانا سپورتتىق ماعىنا­دا­عى عانا ەمەس، جوعارى دارەجەدەگى قوعامدىق-ساياسي ءارى مادەني وقيعا رەتىندە قابىلداناتىن دەڭگەيگە كوتەرىپ وتىر. وعان ءبارىمىز دە بيىلعى جىلى الماتى مەن استانا قالالارىندا وتكىزىلگەن شارالار بارىسىندا ءتانتى بولدىق. بيىلعى جىلى الەمنىڭ 27 ەلدەن كەلگەن كىلەڭ «سەن تۇر مەن اتايىن» دەيتىن ساڭلاق سپورتشىلاردىڭ الدىندا ابىرويدان ايرىلماۋ ەڭ باستىسى دەسەك تە، وسى ويىنداردى ۇيىمداستىرۋعا بار كۇشى مەن قايرا­تىن جۇمساعان قازاق ەلىنىڭ مارتەبەسىن ءوسىرۋ دە باستى ماقسات بولدى. دودا بولعاسىن، توپتى جارار الامان بايگە جا­ريالانعاسىن ونىڭ ولقىلىقتارى دا، «اتتەگەن-اي» دەيتىن تۇستارى دا بولماي قالمايدى، ارينە. بۇل دوداعا ءوز ەلىمىزدەن 164 سپورتشى قاتىس­تى. سپورتتىڭ 11 تۇرىنەن: شاڭعىمەن تۇعىردان سەكىرۋ، شورت-ترەك، تاۋ شاڭعىسى، شاڭعىمەن باعدار­لاۋ، كون­كي تەبۋ، بياتلون، مانەرلەپ سىرعاناۋ، دوپ­تى جانە شايبالى حوككەي سياقتى ءبىرىن بىلسەك، ءبىرىن بىلمەيتىن سپورت تۇرلەرىنەن ون كۇن بويى سايىس ءوتتى. حوككەيدەن، اسىرەسە، قىزدار ويىنى تارتىستى ءوتتى. قازاقستان كومانداسى ءاپ دەگەننەن-اق، وزدە­رى­نىڭ شەبەر قيمىلدارىمەن، قارسىلاستارىنان قا­رىمتا قايتارا الارلىقتاي قاۋقارى بار ەكەندىكتەرىن تانىتتى. قورجىنىمىزعا العاشقى التىن­دى سالعان دا سولار بولدى. قازاق سپورتى تاريحىندا بۇرىن-سوڭدى بول­ما­عان الامانعا ءتۇسۋ كىم-كىمگە دە سىن. الماتى قا­لاسىنىڭ «تاباعان» سپورت كەشەنىندە وتكەن فريستايل سپورت سايىسىندا قازاقتىڭ قارا كوز قىز-جىگىتى نامىستى قولدان بەرمەۋگە تىرىستى. سپورت­تىڭ بۇل تۇرىنەن تاجىريبەمىز از دەسەك تە، وڭتۇستىك قازاقستان وبلىسىنىڭ قوس بىردەي فريستايلشىسى جىبەك اراپباەۆا مەن رۋسلان ءابىلياتيپوۆتىڭ ءبىرى قولا، ەندى ءبىرى كۇمىس جۇلدەنى قورجىنعا سالدى. شاڭعىمەن باعدارلاۋ، بياتلون، تاۋ شاڭعىسى جارىستارىندا دەمالىسسىز قاتىسقان سپورتشى­لار قانشا شارشاسا دا شاشاسىنا شاڭ جۇقتىر­ماي، قارسىلاستارىن قار قاپتىرىپ كەتتى. ءسويتىپ، سپورت­تىڭ بۇل تۇرلەرىنەن دە ۇزدىكتەر قاتارى مولايدى. ارينە، جارىس بولعاسىن، جەڭۋ بار، جەڭىلىس بار. ءوز ەلىمىزدە وتكىزىلىپ جاتقان سپورتتىق شارادا كوشتەن قالۋدى ار ساناعان سپورتشىلار ءۇمىتتى اقتادى. ءبىزدىڭ سپورتشىلار شىنىندا دا ەرلەدى. ءسويتىپ، وڭتۇستىك كورەيا قۇراماسى 13 التىن، 12 كۇمىس، 13 قولا مەدالمەن ءۇشىنشى ورىندى، جاپونيا 13 التىن، 24 كۇمىس، 17 قولا مەدالمەن ەكىنشى ور­ىننان كورىندى. ال قازاقستان قۇراماسى ءوز قور­جى­نىنا 32 التىن، 21 كۇمىس، 17 قولا سالىپ، جەڭىس­تىڭ بيىك شىڭىنان ورىن تەپتى. وسىلايشا، ءVىى قىسقى ازيا ويىندارىندا قازاق ەلىنىڭ ءان­ۇ­را­ن­ى 32 رەت شىرقالىپ، 32 مارتە كوك بايراعىمىز كوكتە جەلبىرەدى. تاۋەلسىزدىك مەرەكەسىنە جاڭا سپورتتىق قاداممەن وسى ۋاقىتقا دەيىن ەل اراسىندا ۇلتىمىزعا ءتان سپورت تۇرلەرىنە باستى نازار اۋدارىلماي كەلگەندىگى تۋرالى ماسەلە ءجيى ايتىلىپ قالاتىن. بيىلعى جىلعى ەلىمىزدىڭ 20 جىلدىق مەرەيتويى بارىسىندا مەملەكەت تاراپىنان جاسالعان يگى قا­دام سپورتشىلارىمىزدى عانا ەمەس، جانكۇيەر­لەر­دى دە بەيجاي قالدىرمادى. ويتكەنى، بۇل شاراعا العاش رەت مەملەكەتتىك ماڭىز بەرىلىپ، ءارى ونىڭ ەل تاۋەلسىزدىگى مەرەكەسىنە ارنالعاندىعى باستى نا­زاردا ۇستالىپ، ەلباسى ن.ءا. نازارباەۆتىڭ ءجۇل­دەسى ءۇشىن قازاق كۇرەسىنەن «قازاقستان بارىسى» اتتى جارىس ۇيىمداستىرىلعان ەدى. بيىلعى جىل­عى 20 تامىزدا استانا قالاسىنىڭ «داۋلەت» سپورت كەشەنىندە تاۋەلسىزدىكتىڭ 20 جىلدىعى اياسىندا قازاقستان رەسپۋبليكاسى پرەزيدەنتىنىڭ جۇلدەسى ءۇشىن قازاق كۇرەسىنەن «قازاقستان بارىسى» اتتى رەسپۋبليكالىق جارىس وتكىزىلدى. جارىستى قازاق­ستان رەسپۋبليكاسى پرەزيدەنتى اكىمشىلىگى باس­شى­سىنىڭ ورىنباسارى م. اشىمباەۆ اشتى. بيىل تۇڭعىش رەت وتكىزىلگەن ايتۋلى جارىستا 14 وبلىس، استانا، الماتى قالالارىنان ۇزدىك دەپ تانىلعان 64 بالۋان بەلدەستى. ابسوليۋتتىك سالماق دارە­جە­سىندە كۇرەسكەن بالۋاندار اراسىندا «قازاقستان بارىسى» اتاعى مەن 150 مىڭ اقش دوللارى ساراپقا سالىندى. جارىس قورىتىندىسى بويىنشا ءى ورىندى، «قازاقستان بارىسى» اتاعىن جانە 150 مىڭ اقش دوللارىن ۇلان رىسقۇل (قىزىلوردا وبلىسى) جەڭىپ السا، «كۇمىس بەلبەۋ» مەن 30 مىڭ اقش دوللارى ءىى ورىندى يەلەنگەن بەيبىت ىستىباەۆقا (جامبىل وبلىسى) تابىس ەتىلدى، ءىىى ورىندى – «قولا بەلبەۋ» مەن 10 مىڭ اقش دوللارىن شالقار جولامانوۆ (شىعىس قازاقستان وبلىسى) جەڭىپ الدى. سونىمەن قاتار، جۇلدەگەر سپورتشىلاردى دايىنداعان جاتتىقتىرۋشىلارعا تيىسىنشە 50 مىڭ، 10 مىڭ جانە 5 مىڭ اقش دوللارى تاپسىرىلدى. سونداي-اق، اعىمداعى جىلدىڭ تامىز ايىنىڭ 19-20 كۇندەرى استانا قالاسىنىڭ بەيبىتشىلىك پەن كەلىسىم سارايىندا «تاۋەلسىزدىكتىڭ 20 جىلدىعى» اياسىندا سپورت كۇنى – كاسىبي مەرەكەسىنە وراي­لاس­تىرىپ، قوعامنىڭ، مەملەكەتتىڭ جانە بيز­­نەس­تىڭ قاتىسۋىمەن ءى سپورتتىق فورۋم وتكىزىلدى. فورۋم اياسىندا دەنە شىنىقتىرۋ مەن سپورت سالالارى بويىنشا ءار ءتۇرلى تاقىرىپتا دوڭگەلەك ۇستەلدەر جانە كورمەلەر ۇيىمداستىرىلىپ، دەنە شىنىقتىرۋ مەن سپورتتى دامىتۋ جونىندەگى ىنتىماقتاستىق تۋرالى تۋريزم جانە سپورت مينيسترلىگى مەن اۋىل شارۋاشىلىعى، اقپارات جانە بايلانىس، دەنساۋلىق ساقتاۋ، ءبىلىم جانە عىلىم، قورعانىس، ىشكى ىستەر مينيسترلىكتەرى جانە استانا قالاسى اكىمدىگىنىڭ اراسىنداعى مەموراندۋمدارعا قول قويىلدى، سونداي-اق، قازاقستان سپورتىنىڭ دامۋىنا ات سالىسىپ، جوعارى بەلسەندىلىكپەن كوزگە تۇسكەن جانە قولداۋ كورسەتىپ جۇرگەن ازاماتتار، سپورت باسشىلارى، بەلگىلى سپورت جۋرناليستەرى ماراپاتتالدى. سونىمەن بىرگە، اۋىل سپورتىن دامىتۋعا با­عىتتالعان «ەل قايراتى» رەسپۋبليكالىق اۋىلدىق دەنە شىنىقتىرۋ-سپورت قوعامى» قوعامدىق ءبىر­لەستىگىنىڭ تۇساۋكەسەر جينالىسى ءوتتى. مەملەكەت تاراپىنان بيىلعى مەرەكەلىك جىل­دا وتكىزىلەتىن شارالار لەگى ءبىر بۇل ەمەس. ولار­دىڭ ىشىنەن اۋىز تولتىرىپ ايتار جاڭالىعى «ءتاۋ­ەلسىزدىك جىلدارى قازاقستان سپورتىنا ۇلەس قوس­قان ەلدىڭ اتاقتى سپورتشىلارىمەن مەملەكەت باس­شىسىنىڭ كەزدەسۋىن ۇيىمداستىرۋ» جانە ءتاۋ­ەلسىزدىكتىڭ 20 جىلدىعىنا ارنالعان ۇلتتىق سپورت تۇرلەرى فەستيۆالىن وتكىزۋ بولىپ وتىر. فەستيۆالدى وتكىزۋدەگى ماقسات – قازاقستان پرەزيدەنتىنىڭ حالىققا جولداۋىندا ايقىندالعان مىندەتتەردى ورىنداۋ، ۇلتتىق سپورت تۇرلەرىن، سونىڭ ىشىندە اۋىل سپورتىن تانىتۋ جانە دامىتۋ، جاستاردى سپورتپەن شۇعىلدانۋعا تارتۋ، حالىق اراسىندا سالاماتتى ءومىر سالتىن ناسيحاتتاۋ. فەستيۆالدىڭ رەگلامەنتىنە سايكەس وعان 14 وبلىستىڭ، استانا مەن الماتى قالالارىنىڭ ەڭ مىقتى سپورتشىلارى قاتىسادى. اقتىق جارىسقا 1700 سپورتشى قاتىسادى. فەستيۆال شىعىس قازاقستان وبلىسى اكىمدىگى، اۋىل شارۋاشىلىعى مينيسترلىگى، قازاقستان حالقى اسسامبلەياسى، «نۇر وتان» حالىقتىق-دەموكراتيالىق پارتياسى جانە رەسپۋبليكالىق ۇلتتىق سپورت تۇرلەرى قاۋىمداستىعىنىڭ قولداۋىمەن وتەدى. ال، قورىتىندى شارالار رەتىندە تاۋەلسىز­دىك­تىڭ 20 جىلدىعىنا ورايلاستىرىلعان سپورت كەشەندەرى مەن ورتالىقتارى اشىلۋىنىڭ سالتانات­تى راسىمدەرىن وتكىزۋ جىل سوڭىنا جوسپارلانىپ وتىر. قازاقستان رەسپۋبليكاسى تاۋەلسىزدىگىنىڭ 20 جىلدىعىن وتكىزۋ بويىنشا ءىس-شارالار جوسپا­رى­نىڭ تارماعىن ورىنداۋ شەڭبەرىندە مينيسترلىك سالىنعان جانە سالىنىپ جاتقان سپورت كەشەندەرى مەن سپورت وبەكتىلەرى بويىنشا بەلگىلى جۇمىس جۇرگىزۋدە. سونىمەن قاتار، بيىلعى 4 جەلتوقساندا «سەرگەكتىك» ۇرانىمەن رەسپۋبليكالىق ايماقتارىندا حوككەي كورتتارىن، شاڭعىمەن جاپپاي سىرعاناۋ ءۇشىن، شاڭعى تراسسالارى مەن مۇز ايدىندارىن اشۋ جوسپارلانىپ وتىر. وسى شارالارعا سپورت اۋەسقويلارى، جالپى ءبىلىم بەرەتىن مەكتەپتەردىڭ، كوللەدجدەردىڭ، اسكە­ري مەكەمەلەر، سپورتتىق كلۋبتار، بجسم، مەملەكەتتىك ورگانداردىڭ، كاسىپورىن ۇيىمدارىنىڭ قىزمەتكەرلەرى جانە بارلىق نيەت بىلدىرۋشىلەر قاتىسادى دەپ جوسپارلانۋدا. بەيبىتكۇل توقاباەۆا. (ماقالا تۋريزم جانە سپورت مينيسترلىگىنىڭ تاپسىرىسى بويىنشا جازىلدى).
سوڭعى جاڭالىقتار

كوزى ءتىرى كلاسسيككە قۇرمەت

ادەبيەت • بۇگىن، 08:30

عارىشتان انىقتالعان قوقىستار

ەكولوگيا • بۇگىن، 08:24

ۆيرۋس جۇقتىرۋ توقتاماي تۇر

كوروناۆيرۋس • بۇگىن، 08:16

ءورت سوندىرگەن وجەتتەر

ايماقتار • بۇگىن، 08:12

ەرلىككە بەرگىسىز ەڭبەك

قوعام • بۇگىن، 08:09

جاساندى جۇرەك سالىندى

الەم • بۇگىن، 08:02

نۇروتاندىقتاردىڭ ايقىن جەڭىسى

ساياسات • بۇگىن، 07:43

شامانىڭ ءانى

ونەر • كەشە

سوتتالعان جىرلار

ادەبيەت • كەشە

9 اي «تولعاتقان» 9 پايىز

ەكونوميكا • كەشە

ۇقساس جاڭالىقتار