بوكستان باكۋ تورىندە ءوتىپ جاتقان الەم چەمپيوناتى جالعاسۋدا. سارسەنبى كۇنى ءبىزدىڭ قۇرامادان شارشى الاڭعا 81 كيلو سالماقتا ادىلبەك نيازىمبەتوۆ شىقتى. بۇل كەزدەسۋ استانا ۋاقىتىمەن كەش باستالدى. ءسويتىپ, بوكس كەشىنىڭ ەڭ سوڭعى كەزدەسۋىندە ادىلبەك نيازىمبەتوۆكە قارسى رينگكە مولدوۆالىق ۆلاديمير چەلەس كوتەرىلدى. چەلەس مولدوۆانىڭ ەلىشىلىك جارىستارىندا كوزگە ءتۇسىپ ءجۇرگەنىمەن, حالىقارالىق ارەنادا ايتارلىقتاي سالماعى جوق بوكسشى سانالاتىن.
كەزدەسۋ شىن مانىندە ءبىزدىڭ بوكسشىنىڭ باسىمدىعىمەن ءوتتى. ءبىرىنشى راۋندتا نيازىمبەتوۆ قارسىلاسىنىڭ وسال تۇسىن ىزدەپ, بىرنەشە ادەمى سوققى جاسادى. ودان كەيىن باپكەرىنىڭ كەڭەسى بويىنشا پسيحولوگيالىق جاعىنان جەڭۋ ءۇشىن سوققىلار دارىتىپ, قارسىلاسىن ەسەڭگىرەتىپ جىبەردى. ەكىنشى راۋندتا دا وسى جاعداي قايتالاندى. ال ءۇشىنشى راۋند تازا قازاق بوكسشىسىنىڭ باسىمدىعىمەن ءوتتى. ءسويتىپ, كەزدەسۋ ءبىزدىڭ بوكسشىنىڭ پايداسىنا شەشىلىپ اياقتالدى, ەسەپ – 16:11.
نيازىمبەتوۆتىڭ كەلەسى قارسىلاسى وسال بوكسشى ەمەس. ونىڭ مولدوۆالىققا قاراعاندا شەبەرلىگى باسىم, ءبىراز تۋرنيرلەردە اتوي سالعان. دەگەنمەن, نيازىمبەتوۆتىڭ ونى دا جەڭۋگە مۇمكىندىگى بار. ال ودان كەيىنگى جەكپە-جەكتەر تۋرالى ازىرشە ايتۋ قيىن. ويتكەنى, وسى سالماقتا رەسەيلىك نيحومتسەۆ, ۋكراينالىق گۆوزديك بار. ونىڭ ۇستىنە, جاڭا ايتقانىمىزداي, ادىلبەك نيازىمبەتوۆ ەرەسەكتەر اراسىنداعى الەم چەمپيوناتىنا العاش رەت قاتىسىپ وتىر. ول 2008-2009 جىلدارى قازاقستان چەمپيونى, 2007 جىلى ازيانىڭ جاستار اراسىنداعى, 2009 جىلى ازيانىڭ ەرەسەكتەر اراسىنداعى چەمپيونى بولعان.
وسى چەمپيوناتقا دانابەك سۋجانوۆ پەن دانيار ەلەۋسىنوۆ تە العاش رەت قاتىسىپ وتىر. بارلىق دەبيۋتانتتىڭ جاستارى شامالاس. باسقا بوكسشىلارىمىز تۋرالى ايتساق, الدىمەن اۋىزعا ەكى دۇركىن الەم چەمپيونى سەرىك ساپيەۆ ورالادى. ساپيەۆ سوڭعى الەم چەمپيوناتىندا قولا جۇلدەگە يە بولعانى بەلگىلى. وسى جولى بۇدان دا بيىك ساتىعا كوتەرىلسە دەگەن تىلەگىمىز بار. اسا اۋىر سالماقتا يۆان دىچكو مەن 91 كيلودا ۆاسيلي لەۆيتتىڭ دە جارىستى جالعاستىرۋعا مۇمكىندىگى جەتەرلىك.
دىچكو العاشقى جەكپە-جەگىن سەرب ميللۋتين ستانكوۆيچپەن ءوتكىزەدى. ونى جەڭسە, بەيجىڭ وليمپياداسىنىڭ كۇمىس ءجۇلدەگەرى جان جيلەيگە قارسى قولعاپ تۇيىستىرەدى. ايتقانداي, وسى قىتاي الىبىن بيىلعى ازيا چەمپيوناتىندا دوسجان وسپانوۆ ۇتقان بولاتىن. سوعان قاراپ, دىچكو دا نامىسقا تىرىسادى عوي دەپ ويلايمىز. ال لەۆيت اۋەلى امەريكالىق ۋيليامسپەن قولعاپ ءتۇيىستىرەدى. ەگەر جەڭە السا, فرانتسۋز يوكو تونيگە قارسى شىعادى.
ءسويتىپ, كەشە كەشكىسىن 69 كيلو سالماق دارەجەسى بويىنشا سەرىك ساپيەۆ ءتورتىنشى الەم چەمپيوناتىنداعى العاشقى كەزدەسۋىن وتكىزدى. ونىڭ وسى جەكپە-جەكتەگى قارسىلاسى ەكۆادورلىق كارلوس سانچەس بولدى. جاسىراتىنى جوق, بۇل بوكسشىنىڭ دا حالىقارالىق ارەناداعى جەتىستىكتەرى اۋىز تولتىرىپ ايتارلىقتاي ەمەس. كەزدەسۋدە سوعان ءسايكەس ساپيەۆتىڭ باسىمدىعىمەن ءوتتى. ءبىرىنشى راۋندتا-اق سانچەس ساپيەۆتىڭ سوققىلارىنىڭ استىندا قالدى. ەكىنشى راۋندتا ەكۆادورلىق ودان ءارى ەسەڭگىرەي ءتۇستى. ءۇشىنشى راۋندتا سانچەس نوكداۋن الدى. وسىدان كەيىن-اق ەكۆاتورلىقتىڭ باپكەرلەرى جەكپە-جەكتى رينگكە ورامال تاستاپ توقتاتۋعا ءماجبۇر بولدى.
ءسويتىپ, ءبىزدىڭ قۇراما الەم چەمپيوناتىنداعى ءتورتىنشى كۇنى ءۇشىنشى جەڭىسىنە جەتتى. وسى سالماقتا ساپيەۆكە قارسىلاس بولاتىن بىرنەشە بوكسشىنىڭ بار ەكەنىن اتاپ وتكەن ءجون.
كەشە باسقا جەكپە-جەكتەر دە قىزىقتى جانە تارتىستى ءوتتى. اسىرەسە, يران مەن اقش بوكسشىلارىنىڭ اراسىنداعى كەزدەسۋدى سولاي دەپ ايتۋعا بولادى. ال ازەربايجاندار تاعى ءبىر بوكسشىسىنان ايىرىلدى. مۇنىڭ الدىندا راگيم نادجافوۆ العاشقى كەزدەسۋىندە جەڭىلگەن بولاتىن.
بۇگىن شارشى الاڭعا 64 كيلو سالماقتاعى دانيار ەلەۋسىنوۆ شىعادى. ونىڭ قارسىلاسى – شوتلانديالىق دجوح تەيلور.
داستان كەنجالين, «ەگەمەن قازاقستان» – باكۋدەن.
