دامير كارىموۆ ءوزىنىڭ قوعامدىق جۇمىستارىمەن بەلگىلى ازامات. ول قورشاعان ورتانى قورعاۋدى قولدايتىن ءتۇرلى اكتسيالارعا بەلسەنە قاتىسىپ, قاراعاندىداعى «PosadiDerevo.kz» قوعامدىق قوزعالىسىنا جەتەكشىلىك ەتەدى. سونىمەن قاتار, ول ۆەلوسيپەدپەن قىسى-جازى جۇرەتىن وبلىس ورتالىعىنداعى ساناۋلى عانا ادامداردىڭ ءبىرى.
– مەن تۋعانىمنان تەك 8 پايىز عانا كورەمىن, – دەيدى ول. – الەمدى باسقاشا كورۋدىڭ نە ەكەنىن بىلمەيمىن. مەن كەز كەلگەن ادام سەكىلدى ءوز جۇمىستارىممەن اينالىسامىن. كەزىندە ماتەماتيكا ءپانىنىڭ مۇعالىمى ماعان: «الەم باسقالارىنا قانداي تالاپ قويسا, ساعان دا سونداي تالاپ قويادى. سوندىقتان سەن ءوز-وزىڭە جوعارى تالاپ قويۋىڭ كەرەك», دەگەن ەدى. قازىر سول ۇستازىمنىڭ ايتقانىن ءىس جۇزىنە اسىرىپ كەلەمىن دەپ ويلايمىن.
سەيسەنبىدە تاڭعى 7:00-دە د.كارىموۆ جالعىز ءوزى ۆەلوسيپەدكە وتىرىپ, قاراعاندىدان الماتىعا اتتاندى. ونىڭ ەسەپتەۋىنشە, ول 5-6 كۇن جول ءجۇرۋى ءتيىس. ول شاتىردا تۇنەۋدى جوسپارلاۋدا. وزىمەن بىرگە ۆەلوسيپەدتى جوندەيتىن سايماندارىن, قاپتوسەك, بال, جاڭعاقتاردان جانە كەپتىرىلگەن جەمىستەردەن قۇرالعان تاعامدىق قوسپا العان.
– تاماق پەن سۋدى جولدان الا سالامىن, وندا تۇرعان ەش قيىندىق جوق دەپ ويلايمىن, – دەپ جوسپارلارىمەن ءبولىستى ول. – اش قالماسىم انىق. مەنىڭ الىس قاشىقتىققا ۆەلوسيپەدپەن ساياحاتتاعان دوستارىم جولدا جۇرگىزۋشىلەر توقتاپ, سۋ مەن تاماق بەرەتىنىن ايتتى. الايدا, كولىكپەن جەتكىزىپ سالۋدى ۇسىنسا, باس تارتامىن. مەن بارلىق جولىمدى تەك ۆەلوسيپەدپەن ءوتۋدى كوزدەپ وتىرمىن.
دامير كارىموۆ ءۇشىن بۇل – العاشقى الىس ساياحات. وسىعان دەيىن ول ءارى بارسا 120 شاقىرىم قاشىقتىققا شىققان ەكەن. الماتىدان ساياحاتشى پويىزبەن ورالۋدى جوسپارلاپ وتىر.
ميراس اسان,
«ەگەمەن قازاقستان»
قاراعاندى وبلىسى
