ءدۇيىم دۇنيە نازارىن سالىپ وتىرعان ەكسپو-2017 حالىقارالىق مامانداندىرىلعان كورمەسى ۇلت ابىرويىن تاعى ءبىر اسقاقتاتىپ, مارتەبەسىن كوتەرەتىن مادەني ماڭىزدى شارا بولعالى تۇر. ال ايتۋلى كورمەگە كەلىپ قاتىساتىن مارتەبەلى مەيمانداردى, قادىرمەندى قوناقتاردى قازاق حالقىنىڭ عاسىرلار بويى قالىپتاسقان باي تاريحى, كونە شەجىرەسى قىزىقتىراتىنى داۋسىز. شىن مانىندە حالقىمىزدىڭ ايبىنى مەن رۋحى وسى كۇنى سالتانات قۇرىپ, شارىقتاي تۇسپەك. بۇل تەك استانا ءۇشىن عانا ەمەس, وڭىرلەر ءۇشىن دە مەرەكەمەن قاتار, ۇلكەن جاۋاپكەرشىلىك. قازاق دالاسىنىڭ ەشقاشان قايتالانبايتىن, ءبىر-بىرىنە ۇقسامايتىن قاسيەتى دە وسى كۇنى كورمە تورىنەن ورىن الادى.
ەكسپو-2017 كورمەسىنە مامىر ايىندا اۋليەاتا وڭىرىنەن « ۇلى جىبەك جولى. كونە تارازدان اسقاق استاناعا تارتۋ» اتتى كەرۋەن جولعا شىققان بولاتىن. اي بويى الىس جولدى باعىندىرىپ, استانا تورىنە جاياۋ جەتۋدى ماقسات ەتكەن كەرۋەن قازىرگى ۋاقىتتا مەركى اۋدانىنا كەلىپ جەتتى. بايزاق جەرىن باسىپ, قۇلان قىرقاسىنان اسىپ ءوتىپ, جەردىڭ كوركى اتانعان مەركىگە كەلگەن كەرۋەندى مەركىلىكتەر قۋانا قارسى الدى. اۋداندا قازاقتىڭ سالت-داستۇرلەرىنە وراي قىمىزمۇرىندىق, اسىق اتۋ سياقتى ۇلتتىق ويىندار ۇيىمداستىرىلىپ, كەرۋەن كوپشىلىك كوزايىمىنا اينالدى.
ايتۋلى كورمەگە ايرىقشا قۇرمەت كورسەتۋ مىندەت. بۇل تۇرعىدا ەكسپو- 2017 كورمەسىنە جامبىل وبلىسىنىڭ دا ازىرلەپ وتىرعان وزىندىك سىيى بار. وبلىس بۇل تۇرعىدا اسىرەسە مادەني ءىس-شارالارعا باسىمدىق بەرىپ, الەمگە قازاق مادەنيەتى مەن ونەرىن تانىتۋدى كوزدەپ وتىر. «اعىمداعى جىلدىڭ 26 جانە 30 شىلدەسى ارالىعىندا ەكسپو-2017 حالىقارالىق كورمەسى اياسىندا استانا قالاسىندا جامبىل وبلىسىنىڭ مادەنيەت كۇندەرى وتەتىن بولادى. اۋليەاتالىقتار اۋەلى ەكسپو اۋماعىنداعى «امفيتەاتردا» مادەني-كوپشىلىك ءىس-شارالارىن وتكىزسە, قالعان كۇندەرى قالالىق «قازانات» يپپودرومىنىڭ اۋماعىنان سالىناتىن «ەتنواۋىلدا» ءىس-شارالار ۇيىمداستىرىلادى. مۇندا كۇنى بويى شەبەرلەر اۋىلى, شەبەرلەردىڭ تۋىندىلارىن ساتۋعا ارنالعان «شىعىس بازارى» ورىن الىپ, تەاترلاندىرىلعان قويىلىمدار, كونتسەرتتەر مەن ۇلتتىق سپورت ويىندارى وتەدى. ماقساتىمىز – حالقىمىزدىڭ باي مادەنيەتى مەن تاعىلىمدى تاريحىن كورمە كەزەڭىن الەم ازاماتتارىنا ناسيحاتتاۋ», دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ.
جامبىل وبلىسى عاسىرلار بويى ساقتالعان تاريحىمەن تانىمال ءوڭىر. تاراز قالاسىنىڭ وزىندە كونە زامانداردان بۇگىنگى كۇنگە جەتكەن جۇزدەگەن تاريحي ەسكەرتكىشتەر بار. تالاي تىلسىمدى ىشىنە بۇگىپ تۇرعان قاراحان, تەكتۇرماس, ءداۋىتباي كەسەنەلەرى, قالي ءجۇنىس مونشاسى, ورتاعاسىرلىق جەراستى مەشىتى سياقتى قاداۋ-قاداۋ قاسيەتتى ورىندارىمىز دا وتاندىق ءتۋريزمدى دامىتۋعا ايرىقشا سەرپىن بەرەدى. ءاربىر كىرپىشىنەن تاريح توگىلىپ, تۇڭعيىعىنان قوبىز سارىنى ەستىلىپ تۇراتىنداي اسەر ەتەتىن كونە جادىگەرلەردىڭ ءبارى دە كەلگەندەردىڭ قىزىعۋشىلىعىن تۋدىراتىنى ءسوزسىز. شاھار باسشىسى رۇستەم داۋلەت ەكسپو- 2017 كورمەسىن تاماشالاۋ ءۇشىن قازاق جەرىنە ات باسىن بۇرعان شەتەلدىك ازاماتتاردىڭ اۋليەاتا وڭىرىنە دە جولى تۇسكەن جاعدايدا, وعان قالانىڭ تولىقتاي دايىن ەكەنىن ايتتى. «تاۋەلسىز قازاق ەلىنىڭ تاريحىنداعى ايتۋلى كەزەڭنىڭ ءبارىمىز ءۇشىن ورنى بولەك. قالامىزدان جىل سايىن ساۋلەتتى عيماراتتار بوي كوتەرىپ, بارشامىزعا ورتاق قىزمەت كورسەتىپ كەلەدى. دوستىق ءۇيىنىڭ بوي كوتەرۋى, «ەجەلگى تاراز» مۋزەيىنىڭ سالىنۋى مەن باقىلاۋ مۇناراسىنىڭ اشىلۋى دا شاھار تاريحىنداعى ايرىقشا وقيعا. ەندى كەلگەن قوناقتاردىڭ كونە تاراز قالاسىنداعى قاراحان, تەكتۇرماس كەسەنەلەرى مەن وبلىس اۋماعىنداعى اقىرتاس, ايشا ءبيبى كەشەندەرىن كورىپ, تاماشالاۋىنا تولىق مۇمكىندىگى بار. بۇدان بولەك, شاھاردىڭ سەرۆيستىك قىزمەتى دە بارلىق تالاپتارعا ساي جاساقتالعان. قاۋىپسىزدىك ماسەلەسى دە باستى نازاردا», دەدى اكىم.
شىنىندا دا ەكسپو كورمەسى تاريحىمىزدى تانىتۋعا, مۇمكىندىگىمىزدى كورسەتۋگە ارنالعان الاڭ. سونىمەن قاتار, تاراز قالاسى شاھار تاريحىنا ارنالعان بەينەفيلمدەر كورسەتىپ, وڭىردەگى تاريحي جادىگەرلەر جايىندا فوتو-بەينە ونىمدەرىن تارتۋ ەتپەك. ال وسىدان التى جىل بۇرىن «ەجەلگى تاراز» قالاشىعىنان XVIII جانە حح عاسىرلار ارالىعىنا جاتاتىن كونە شىراعداندار تابىلعان بولاتىن. «ەجەلگى تاراز ەسكەرتكىشتەرى» تاريحي-مادەني قورىق-مۇراجايىنىڭ قىزمەتكەرى الماس مۇحتاروۆتىڭ ايتۋىنشا, ەكسپو-2017 كورمەسىنىڭ مادەني ءىس-شارالارعا ارنالعان زالىندا «بولاشاق ەنەرگياسىنىڭ ارعى تەگى – شىراعداندار شەرۋى» اتتى كولەمدى ەكسپوزيتسيا قۇرىلىپ, ءبىر اي بويى كەلۋشىلەرگە قىزمەت كورسەتەدى.
جامبىلدىقتار ەكسپو كورمەسىنە اتسالىسۋعا جانە تاماشالاۋعا دايىن. سونداي-اق, وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ مالىمەتىنشە, كورمەگە سوعىس ارداگەرلەرى, التى جاسقا دەيىنگى بالالار, جەتىم بالالار, بارلىق توپتاعى مۇگەدەكتەر دە تەگىن كىرگىزىلەتىن بولادى. ستۋدەنتتەر, مەكتەپ وقۋشىلارى, زەينەتكەرلەر, كوپ بالالى انالار 50 پايىز جەڭىلدىكتى بيلەتتەرمەن قامتاماسىز ەتىلگەن. بۇدان وزگە دە ماسەلەلەر جونىندە باسقارما باسشىسى قارلىعاش ارالبەكوۆا ايتىپ بەردى. «تاسىمالمەن قامتاماسىز ەتۋ ماقساتىندا «تاراز-استانا» باعىتى بويىنشا اپتاسىنا 10 ۇشاق استانا قالاسىنا قاتىنايتىن بولادى. تەمىر جول تاسىمالى بويىنشا 7 پلاتسكارت, 6 كۋپە ۆاگوندارى بار تاراز – استانا – تاراز باعىتى بويىنشا جولاۋشىلار پويىزى ىسكە قوسىلادى. اۆتوموبيل تاسىمالىمەن «Dim Dimich & Company» جشس قىزمەت كورسەتەدى. سونىمەن قاتار, «پروفسويۋز تۋريست» جشس-ءى 50 ورىندىق 3 اۆتوبۋسپەن 2, 3 كۇندىك تۋرلار ۇيىمداستىرادى. ەكسپو كورمەسى وتكىزىلۋى كەزەڭىندە استاناداعى ەكسپو اپارتامەنتتەرى, قوناق ۇيلەر, حوستەلدەرمەن وبلىس تۇرعىندارىن قابىلداۋ بويىنشا «Baiterek Travel Center» جشس جانە «كوچەۆنيك» جشس كەلىسىمشارتتارعا قول قويىلدى», دەدى قارلىعاش امىرقىزى.
تاعى ءبىر ايتا كەتەرلىگى, ەكسپو كورمەسى ءىس-شارالارىنىڭ جوعارى دارەجەدە وتۋىنە اتسالىسۋ ماقساتىندا وبلىستان 100 ەرىكتىلەر دايىندالعان. سونداي-اق, 40 ازامات اعىلشىن كۋرستارىنا قاتىسۋدا. ال تەمىر جول كولىگى ارقىلى استانا قالاسىنا جەتۋى مەن كەرى قايتۋىنا قاجەتتى 3 ميلليون 600 مىڭ تەڭگە بولىنگەن.
ەكسپو-2017 حالىقارالىق مامانداندىرىلعان كورمەسىنە جامبىل وبلىسىنان 100 مىڭ ادام قاتىسۋى كەرەك دەپ جوسپارلانسا, بۇگىنگى كۇنگە 64 516 بيلەت ساتىلعان. بۇل جۇمىستار الداعى ۋاقىتتاردا جالعاسىن تاباتىن بولادى دەيدى ءتيىستى ماماندار.
ايتۋلى كورمە ۇلتىمىزدىڭ تاريحىن وزگەلەرگە تانىتىپ قانا قويماي, ەلىمىز تۋرالى ەرەكشە پىكىر قالىپتاستىراتىن دا مۇمكىندىككە يە بولادى. استانا تورىندە اسقاقتاعان ابىروي مەن بيىكتەگەن بەدەل ءبىرىنشى كەزەكتە حالىقتىڭ, ۇلتتىڭ, مەملەكەتتىڭ مارتەبەسى بولىپ تابىلماق.
حاميت ەسامان,
«ەگەمەن قازاقستان»
جامبىل وبلىسى
