تورتكۇل دۇنيە كوز تىگىپ وتىرعان حالىقارالىق ەكسپو كورمەسىنىڭ ويداعىداي وتۋىنە ەلىمىزدىڭ وزگە وڭىرلەرىمەن بىرگە وبلىس جۇرتشىلىعى دا «بىزدەردە مىناداي بار, مىناداي بار» دەگەندەي, ونەرپازدارىن باپتاپ, ونىمدەرىن ساقتاپ, تاس-ءتۇيىن ءازىر وتىر. وبلىستىق مادەنيەت, ارحيۆ جانە قۇجاتتاما باسقارماسىنىڭ بەرگەن مالىمەتتەرىنە سۇيەنسەك, شىعىس قازاقستان ەكسپو كورمەسى اياسىندا 22 اۋقىمدى مادەني-بۇقارالىق ءىس-شارا وتكىزەدى. ءوڭىردىڭ ەڭ باستى مادەني-تانىمدىق شارالارى ەلوردانىڭ ىرگەسىندەگى «قازانات» اتشابارىنداعى «ەتنواۋىل» كەشەنىندە وتەدى دەپ جوسپارلانعان. 21 شىلدە مەن 31 شىلدە ارالىعىندا شىعىس قازاقستان وبلىسى ۇلتتىق ۇلگىدە بەزەندىرىلگەن 5 كيىز ۇيدە جامبىل وبلىسىمەن بىرلەسە وتىرىپ «شىعىس بازارى» اتتى قولونەرشىلەر كورمەسىن ۇيىمداستىراتىن بولادى. 23 شىلدە كۇنى ءدال وسى جەردە شۇعىلالى شىعىستىڭ ونەرپازدارى ءان مەن جىردان شاشۋ شاشپاق. وسى كۇنى ەكسپو قوناقتارى تارباعاتاي اۋدانىنىڭ تۋماسى, اۋليە ىرعىزباي دوسقانا ۇلى كەسەنەسىنىڭ شىراقشىسى بولات تاعابايدىڭ 100 مىڭ اسىقتان قۇرالعان ۇلكەن اسىعىن تاماشالايدى. بۇل, اسىرەسە, شەت ەلدەن كەلگەن تۋريستەردىڭ تاڭدايىن قاقتىرارى انىق. ۇلتتىق ونەردىڭ جاناشىرى بۇل اسىقتاردى 16 جىل بويى جيناعانىن ايتادى. «اسىق سانى 25 مىڭعا جۋىقتاعاندا گيننەستىڭ رەكوردتار كىتابىنا تىركەلۋ ءۇشىن ءوتىنىش جازدىم. ەكى ايدان كەيىن «اسىقتىڭ سانى جونىنەن الەمدە ءسىزدىڭ الدىڭىزعا تۇسەتىن ادام جوق. رەكوردتار كىتابىنا ەنگىزۋگە بولادى» دەگەن جاۋاپ كەلدى. گيننەستىڭ رەكوردتار كىتابىنىڭ استاناداعى فيليالى مەنى شاقىرىپ, اسىقتاردىڭ ەنگەنى تۋرالى سەرتيفيكاتتى تابىس ەتتى. اسىقتى جيناۋ بار دا, ونى ساقتاۋ بار. دۇرىس ساقتاماساڭ ءشىرىپ كەتەدى. شىرىمەس ءۇشىن قازانداعى قايناعان سۋعا سالىپ, قارا تۇز قوسىپ, 3-5 ساعات قايناتامىز. تۇز اسىقتىڭ مايىن سورىپ الادى», – دەيدى بولات تاعاباي. سونىمەن قاتار بۇل كۇنى شىعىس قازاقستاننىڭ 28 قولونەر شەبەرىنىڭ تەرىدەن, تاستان, قىشتان, اعاشتان, وزگە دە ماتەريالداردان جاسالعان بۇيىمدارى جۇرتشىلىق نازارىنا ۇسىنىلماق. وبلىسىمىزدىڭ حالىقارالىق كورمە اياسىنداعى مادەني كۇندەرى 25 شىلدەدە ساعات 18:00-دە «امفيتەاتر» اۋماعىندا وتەتىن «اق ەرتىس» اتتى گالا-كونتسەرتپەن تۇيىندەلمەك.
ەكى ايعا سوزىلاتىن كورمە كەزىندە استانادا ەلىمىزدىڭ وڭىرلەرىنىڭ اۋىلشارۋاشىلىق ونىمدەرىنىڭ جارمەڭكەسى وتەدى. شىعىس قازاقستاننىڭ جارمەڭكەسى جامبىل جانە پاۆلودار وبلىستارىمەن بىرگە 1-2 شىلدە كۇندەرى ەلورداداعى «قازاقستان» سپورت كەشەنىنىڭ اۋماعىندا ۇيىمداستىرىلادى دەپ جوسپارلانعان. جارمەڭكەدە 50 توننا جىلقى, 40 توننا قۇس ەتى, 30 توننا ءسۇت ونىمدەرى, 40 توننا بال, 35 توننا كۇنباعىس مايى, 30 توننا بالىق, 10 توننا قىمىز بەن 7 توننا ۇلتتىق تاعامدار, جالپى كولەمى 300 تونناعا جۋىق ءونىم ساۋداعا شىعارىلماق.
ەكسپو كورمەسىندە ەل نازارىن اۋدارۋعا ءتيىس ەرەكشە ەكسپوناتتاردىڭ ءبىرى «توكوماك» تەرمويادرولىق ماتەريالتانۋ رەاكتورىنىڭ كۋرچاتوۆ قالاسىندا ورنالاسقان ۇلتتىق يادرولىق ورتالىق ماماندارىنىڭ قولىمەن جاسالعانىن ايتا كەتۋدىڭ ءساتى كەلىپ تۇرعان سەكىلدى. ەلىمىزدى قويىپ, دۇنيە ءجۇزى عالىمدارىنىڭ قىزىعۋشىلىعىن تۋدىرىپ وتىرعان قۇرىلعى كورمە قارساڭىندا, ياعني 9 ماۋسىمدا ەلباسىنىڭ قاتىسۋىمەن ىسكە قوسىلادى دەپ كۇتىلىپ وتىر. ۇلتتىق يادرولىق ورتالىقتىڭ باس ديرەكتورى ەرلەن باتىربەكوۆ عالىمدار رەاكتوردى جاساۋ ءۇشىن 14 جىل بويى تەر توككەنىن ايتادى. «بۇل قوندىرعىنى جەردەگى جاساندى كۇن كوزى دەسەك تە بولادى. بۇل – ەنەرگيانىڭ تاۋسىلماس كوزى. ىشىندە قىزدىرىلعان پلازماسى بار ماگنيتتى كاتۋشكالار ورناتىلعان ترويدالدى كامەرا. ونىڭ تەمپەراتۋراسى بىرنەشە ميلليون گرادۋسقا دەيىن جەتەدى», دەيدى ورتالىق ديرەكتورى.
ازامات قاسىم,
«ەگەمەن قازاقستان»
شىعىس قازاقستان وبلىسى
