اتالعان ونەر ۇجىمى استانا قالاسىندا وتەتىن ەكسپو-2017 حالىقارالىق مامانداندىرىلعان كورمەسى اياسىندا 18-26 ماۋسىم ارالىعىندا ونەر كورسەتەدى. قويىلىمدار استانا وپەرا جانە بالەت تەاترى مەن استانا جاستار تەاترىنىڭ ساحناسىندا وتەدى دەپ جوسپارلانۋدا. وسىعان وراي, تەاتر ۇجىمى ەكسپو كەزىندە ەلوردادا كورەرمەن نازارىنا ۇسىنىلاتىن 7 سپەكتاكلدى تانىستىرىپ, كورمەگە دايىندىق جۇمىستارى مەن جاڭالىقتارى جونىندە باق وكىلدەرىنە ءباسپاسوز ماسليحاتىن وتكىزدى.
حالىقارالىق كورمە اياسىندا 1940 جىلدان بەرى تەاتر ساحناسىنان تۇسپەي كەلە جاتقان عابيت مۇسىرەپوۆتىڭ «ماحاببات داستانى» شىعارماسى العاشقى بولىپ كورەرمەنگە جول تارتپاق (رەج. قايرات سۇگىربەكوۆ). بۇل ءتىزىمدى ارى قاراي تولىقتىراتىن راقىمجان وتارباەۆتىڭ (رەج. يۋ. حانينگو-بەكنازار) «سۇلتان بەيبارىسى», مۇحتار اۋەزوۆتىڭ ايگىلى «اباي» رومانى (رەج. ەسمۇحان وباەۆ), جاس دراماتۋرگ مادينا وماروۆانىڭ «كومبە ناننىڭ ءدامى» (رەج. الما كاكىشوۆا) اتتى سۋ جاڭا تۋىندىسى, عاريفوللا ەسىمنىڭ «تاڭسۇلۋ» (رەج. الما كاكىشوۆا) قويىلىمى, عابيت مۇسىرەپوۆتىڭ (رەج. ەرىك نۇرسۇلتان) «قىز جىبەك» شىعارماسى, يران-عايىپتىڭ (رەج. يوناس ۆايتكۋس) «قورقىتتىڭ كورى» قويىلىمدارى بارلىق كورمە قوناقتارىنا مەرەكە سىيلايتىن بولادى.
– الەمگە تانىمال ايتۋلى شارادان تىس قالۋعا حاقىمىز جوق. «ەكسپو-2017» كورمەسىنە ارنايى دايىنداعان شىعارمالارىمىز بار. رەپەرتۋارىمىزدا بۇرىننان كەلە جاتقان تانىمال تۋىندىلار دا جوق ەمەس. ول جەردە قويىلاتىن قويىلىمداردىڭ ءمان-ماعىناسى, مازمۇنى شەت ەلدەن كەلگەن قوناقتار مەن تۋريستەرگە ءبىزدىڭ ءتول تابيعاتىمىزدى, مادەنيەتىمىز بەن ادەبيەتىمىزدى, ونەر سالتىمىزدى جان-جاقتى تانىستىراتىن بىردەن ءبىر شىعارمالار. بارلىق سپەكتاكلدەر ءۇش تىلگە اۋدارىلعان. قويىلىم قازاق تىلىندە جۇرگەنىمەن, كەلگەن قوناقتارعا اعىلشىن جانە ورىس تىلىندە قوسىمشا اۋدارما ءجۇرىپ وتىرادى. سونداي-اق, مۇمكىندىگى شەكتەۋلى كورەرمەندەرگە ارنالعان ارناۋلى شىعارىلىمدار دايىندالۋدا. ياعني, شىعارمانىڭ مازمۇنى مەن يدەياسى جايلى, رولدەردى سومدايتىن ارتىستەر تۋرالى تولىق ماعلۇماتتار بەرىلەدى. بيلەت باعالارى 500 بەن 1500 تەڭگە ارالىعىندا.
«نەگىزگى ماقساتىمىز – اسىل مۇرالارىمىز بەن رۋحاني قۇندىلىقتارىمىزدى, ساف ونەرىمىزدى شەتەلدىك قوناقتارعا تانىستىرۋ», دەيدى تەاتر باسشىسى ەرلان ءبىلال.
ەكسپو-2017 حالىقارالىق كورمەسى كەزىندە تەاترلانعان قويىلىمدارىمىز ارقىلى الەم جۇرتشىلىعى تەرەڭ تاريحىمىز بەن ءىنجۋ-مارجان مۇرالارىمىزدى تانىپ, رۋحاني ءنار الىپ جاتسا نۇر ۇستىنە نۇر.
ارمان وكتيابر,
«ەگەمەن قازاقستان»
