مەملەكەتتىك حاتشى بيىل ەكى ەل اراسىنداعى ديپلوماتيالىق قارىم-قاتىناستاردىڭ ورناعانىنا 25 جىل تولعانىن, ەلباسى نۇرسۇلتان نازارباەۆ پەن قىتاي حالىق رەسپۋبليكاسىنىڭ توراعاسى سي تسزينپين اراسىندا جىلى ءارى دوستىق قارىم-قاتىناس ورناعانىن ايرىقشا اتاپ ءوتتى. ەكىجاقتى ىنتىماقتاستىقتىڭ جوعارى دەڭگەيى, سەنىمدى ديالوگ, ارىپتەستىكتى نىعايتۋعا دەگەن ءوزارا مۇددەلىلىك سونىڭ ناتيجەسى بولىپ سانالادى. سونداي-اق, مەملەكەتتىك حاتشى قىتاي مەديتسيناسىنىڭ تامىرىن تەرەڭنەن الاتىنىن, دارىگەرلەردىڭ مىڭداعان جىلدار بويى جيناقتاعان تاجىريبەسىنە نەگىزدەلگەنىن ايتتى.
– ءبىزدىڭ ازاماتتار ەم الۋدىڭ بالامالى ادىستەرىنە ءجيى جۇگىنەتىن بولدى. ەكسپو-2017 حالىقارالىق كورمەسى قارساڭىندا اشىلىپ وتىرعان قىتايدىڭ ءداستۇرلى مەديتسينالىق ورتالىعى قازاقستاندىقتاردىڭ ەمدەلۋ مۇمكىندىكتەرىن ارتتىرۋعا سەپتىگىن تيگىزەدى. بۇل ورتالىق حالىق دەنساۋلىعىن ساقتاۋدىڭ ۇزدىك رەسۋرستارىنىڭ ءبىرى بولاتىنىنا سەنىمىم مول, دەدى گۇلشارا ابدىقالىقوۆا.
ءوز كەزەگىندە قىتاي حالىق رەسپۋبليكاسىنىڭ قازاقستانداعى ەلشىسى لە يۋيچەن قىتاي ەلى ءۇشىن قازاقستان ورتالىق ازياداعى ەڭ سەنىمدى ارىپتەس بولىپ وتىرعانىن, بۇگىندە الەمنىڭ كوپتەگەن ەلدەرى ءداستۇرلى قىتاي مەديتسيناسىن تاني باستاعانىن جەتكىزدى.
ال ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ مەملەكەت باسشىسىنىڭ مەديتسينا سالاسىنىڭ ەكسپورتتىق الەۋەتىن دامىتۋعا تاپسىرما جۇكتەگەنىن, وسى ورايدا قازاقستاندىقتار مەن شەتەلدىكتەردىڭ قازاقستاندا ەم الۋىنا جان-جاقتى جاعداي جاساۋ باعىتىندا جۇمىس جۇرگىزىلىپ جاتقانىنا توقتالدى.
پرەزيدەنتتىڭ ءىس باسقارماسى مەديتسينالىق ورتالىعىنىڭ جەتەكشىسى ۆالەري بەنبەريننىڭ ايتۋىنشا, بۇل ورتالىقتا قىتايدا جاسالعان ءتۇرلى تۇنبالار مەن قايناتىلاتىن دارىلەر ساتاتىن ءدارىحانا بولماق. ەلىمىزدىڭ كەز كەلگەن ازاماتىن قۋانا قارسى الاتىن بۇل ورتالىق كەلۋشىلەردى دارىلىك شوپتەر مەن ماسساج, ينە, س ۇلىك سالۋ جانە ءتۇرلى گيمناستيكالاردىڭ كومەگىمەن ەمدەيدى. ياعني, مانۋالدى تەراپيا, رەفلەكستى تەراپيا, فيتوتەراپيا سىندى شىعىس مەديتسيناسى كەڭىنەن قولدانىلادى. اقىلى تۇردە قىزمەت كورسەتەتىن ورتالىقتا قىتايدان كەلگەن بىلىكتى ماماندار ەڭبەك ەتەدى. سونىمەن بىرگە, وتاندىق ماماندار دا قىتايلىق دارىگەرلەرمەن ءوزارا تاجىريبە الماسىپ, پاتسيەنتتەردى شىعىس مەديتسيناسىمەن ەمدەۋدى ۇيرەنبەك. ياعني, اتالعان ورتالىقتا قىتايدىڭ ديپلومدى, ءوز ەلدەرىندە بەدەلى, ۇلكەن تاجىريبەسى بار ماماندارى جۇمىس ىستەيدى, دەدى ول.
شاراعا قاتىسقان Beijing Tong Ren Tang International Information Technology Co., Ltd. كاسىپورنىنىڭ باسقارما توراعاسى دجي گۋانفەيدىڭ ايتۋىنشا, اتالعان كاسىپورىن الەمنىڭ 26 مەملەكەتىندە وزدەرىنىڭ 150-دەن استام ءدارىحاناسىن اشقان, دارىلىك شوپپەن ەمدەۋ ارقىلى داڭقى شىققان كاسىپورىن سانالادى. ال CITIC GROUP كومپانياسىنىڭ ديرەكتورلار كەڭەسىنىڭ توراعاسى چانگ جەنمينگ قىتايدىڭ ءداستۇرلى مەديتسيناسىنىڭ نەگىزگى ەرەكشەلىكتەرى تۋرالى اڭگىمەلەپ, ەرتەدەگى تسين يمپەرياسىنىڭ 8 بيلەۋشىسى اتالعان ءداستۇرلى مەديتسينانى تۇتىنعانىن جەتكىزدى. سونداي-اق, قىتاي ماماندارى ءوز كومپانيالارىنىڭ تاريحىمەن, جۇمىس جۇيەسىمەن جانە ىسكەرلىك ارىپتەستەرىمەن تانىستىرىپ, ساپالى ءارى ناتيجەلى ەم كورسەتەتىندەرىنە سەندىردى.
دۋمان اناش,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»
