«بالاپان» باعدارلاماسىنىڭ بازارلىعى

وبلىستا مەكتەپكە دەيىنگى ءبىلىم مەكەمەلەرىنىڭ جەلىسىن كەڭەيتۋ, جاس بۇلدىرشىندەردى تاربيە جۇمىستارىمەن تولىق قامتۋ ءۇشىن بارلىق جاعداي جاسالۋدا. اتاپ ايتساق, «بالاپان» باعدارلاماسى اياسىندا قولعا الىنعان بالاباقشالار سانى جىلدان-جىلعا كوبەيىپ كەلەدى. مىسالى, بيىل مەكتەپكە دەيىنگى ءبىلىم مەكەمەلەرىندە 1290 ورىن سانىن قامتۋ جوسپارلانسا, قازىر ونىڭ 590 ورنى اشىلدى. اعىمداعى جىلدىڭ سوڭىنا دەيىن 1 مەملەكەتتىك, سونداي-اق مەملەكەتتىك-جەكەمەنشىك سەرىكتەستىك نەگىزىندەگى 3 بالاباقشا جانە 3 شاعىن ورتالىق اشىلماقشى. بالاباقشالاردى كۇردەلى جوندەۋدەن وتكىزۋ جۇمىستارى دا باستى نازاردا. بۇگىنگى كۇنگە دەيىن وبلىس ورتالىعىنداعى 3 مەكتەپكە دەيىنگى ءبىلىم مەكەمەلەرى 351 736,0 مىڭ تەڭگەگە جوندەلىپتى. سونىڭ ءبىرى – №19 بالاباقشا عيماراتى. ول جۋىردا بۇلدىرشىندەرگە قايتارا ەسىك اشتى. ونى زامان تالابىنا ساي جوندەۋ ءۇشىن وبلىستىق بيۋدجەتتەن 116 240,0 مىڭ تەڭگە ءبولىندى. سونىڭ ناتيجەسىندە اتالمىش بالاباقشاداعى بۇلدىرشىندەرگە ارنالعان ورىننىڭ سانى 150-دەن 280-گە ارتىپ وتىر. ال تاراز قالاسىندا جالپى 32 بالاباقشا مەن 21 شاعىن ورتالىق جۇمىس ىستەيدى. وندا 11932 ءبۇلدىرشىن تاربيەلەنەدى. كوسەمالى ساتتىباي ۇلى. جامبىل وبلىسى.