قازاق رۋحىن وياتقان تۇلعا

كەشە ق.قۋانىشباەۆ اتىنداعى قازاق مۋزىكالىق-دراما تەاترىندا  ءىلياس وماروۆ اتىنداعى قازاق دراما تەاترى قازىعۇلدىڭ «مىرجاقىپ» تراگەدياسى نەگىزىندە ساحنالانعان ەرسايىن تولەۋبايدىڭ جاڭا قويىلىمىن ۇسىندى. قازاقتىڭ العاشقى رومانى «با­قىتسىز جامالدى», جىگەرلى ۇنمەن «ويان, قازاق!» جىرىن شىعارىپ, ۇلت مۇددەسى ءۇشىن تاۋەلسىزدىك جولىندا جانىن پيدا ەتكەن الاش قوزعالى­سىنىڭ اقتاڭگەرى مىرجاقىپ دۋلاتوۆ­تىڭ ساحناداعى بەينەسىن جاساۋعا تالپىنعان قوستانايلىق  تەاتر ۇجى­مىنىڭ بۇل باستاماسىن قالاي دەگەنىمىزبەن ازاتتىقتىڭ اق تاڭى ءۇشىن ايقاسقان ازاماتتىڭ رۋحىنا باعىش­تالعان حالقىنىڭ تاعزىمى, ەڭ اۋەلگى ساحنالىق تارتۋى دەۋگە تولىق نەگىز بار.  ول تەك الاشتىڭ تاباندى كۇرەس­كەرى عانا بولىپ قويماي, قازاق تاري­حىنا قاتىستى وزگە ەلدىڭ جازبالا­رىنداعى كەيبىر كونە جادىگەرلەردى قايتا ءتىرىلتىپ, سوڭىنا وشپەس مۇرا قالدىرعان قالامگەر رەتىندە زەرت­تەۋشى-عالىمداردىڭ نازارىنا ىلىگىپ كەلسە, سوڭعى جىلدارى تاريحي تۇلعالار تۋرالى قويىلىمداردىڭ كوبەيۋى ءمىرجا­قىپ سىندى الاشتىڭ ءبىرتۋار ازامات­تارىنا دا رۋحاني ەسكەرتكىشتىڭ قويىلار ۋاقىتىنىڭ جەتكەنىن اڭعارتاتىن. سول ەل الدىنداعى ەڭسەلى پارىزدى قوستاناي وبلىستىق دراما تەاترىنىڭ ويداعىداي ورىنداپ شىققانى قۋانتادى. ەل تاۋەلسىزدىككە قول جەتكىزگەلى, ءاسى­رەسە, ساحنالىق تۋىندىلاردىڭ كوك­جيەگى ەرەكشە كۇيگە ەنۋدە. وعان جەر-جەردەگى ونەر ۇجىمدارىنىڭ قايتا جاڭعىرىپ, ۋاقىت تالابىنا ساي تىنىس-تىرشىلىگىن وزگەرتىپ جاتقان ءىس-ارەكەتتەرى ناقتى دالەل بولا الادى. مىرجاقىپ دۋلاتوۆتىڭ  125 جىلدىعى قۇرمەتىنە كورەرمەنمەن قاۋىشقان  «مىرجاقىپ» تراگەدياسىن ءدال وسىنداي ايتۋلى قۇبىلىستىڭ ءبىرى دەپ قابىلدايتىن ءجونىمىز بار.  مىرجاقىپ ءرولىن قازاق­ستانعا ەڭبەك سىڭىرگەن قاي­راتكەر قونىسبەك بەگايداروۆ, احمەت بايتۇر­سىنوۆ بەينەسىن قابدول-ءماجيت يمانوۆ, عاينيجامالدى – اجار ءشا­كىرجانوۆا, ءبادريسافانى – اقمارال قاسىموۆا, جاڭعايىپتى – نۇرلىبەك كەنجەاحمەت, گولوششەكيندى – مىقتىباي جىلىباەۆ, كۇماندى – اقدامەن دوسانوۆا, وگپۋ قىزمەتكەرىنىڭ ءرولىن اسىلان كەنجەتاي نانىمدى ورىنداپ, تاريحي تۇل­عالار پورترەتىن الاشتىڭ تاعى ءبىر ارداقتى ۇلىمەن ۇلىقتادى. قاراشاش توقسانباي.