كەشە...

...جاڭا  كاسىپورىن  استىق قابىلداي باستادى بۇلاندى اۋدانىنىڭ ورتا­لى­عى ماكين قالاسىندا جاڭا استىق قابىلداۋ كاسىپورنى ىسكە قوسىلىپ, شارۋاشىلىقتاردان العاشقى توننا استىقتى قا­بىل­داي باستادى. قۇنى 518 ميلليون تەڭگەلىك جوبانى «ارنا» جاۋاپكەرشىلىگى شەكتەۋلى سەرىكتەستىگى قىسقا مەرزىمدە جۇزەگە اسىردى. بۇل قارجىنىڭ 77,9 ميلليون تەڭگەسى «ارنانىڭ» جەكە قورىنان ءبولىنىپ وتىر. اقمولا وبلىسىنىڭ اكىمى سەرگەي دياچەنكو ەگىن وراعىنىڭ شەشۋشى شاعىندا پايدالانۋعا بەرىلگەن كاسىپورىن اۋدان دي­قان­دارىنىڭ  سۇرانىسىن تولىق قامتاماسىز ەتۋگە مۇمكىندىك جا­سايتىنىن اتاپ ءوتتى. ونىڭ جوبالىق قۋاتى 30 مىڭ استىقتى ساپالى ساقتاۋعا باعىتتالعان. مۇندا 36 ادام ەڭبەكپەن قام­تىل­عان. باقبەرگەن امالبەك. اقمولا وبلىسى. * * * ...قىسقا دايىندىق ماسەلەسى قارالدى وبلىس قالالارى مەن اۋدان­دارىندا قازان ايىنىڭ باسىندا قازاندىقتار ىسكە قوسىلۋى ءتيىس. وسىعان بايلانىستى  وبلىس اكى­مى­نىڭ ءبىرىنشى ورىنباسارى ۆيك­تور مەيستەر سەلەكتورلىق ءما­جى­لىس وتكىزدى. وندا قالالار مەن اۋدان باسشىلارى بايلانىسقا شىعىپ, وزدەرىندەگى  دايىندىق جۇمىستارى تۋرالى باياندادى. ماجىلىستە ۆيكتور مەيستەر جىلۋ بەرۋدى ەندى سوزباقتاتپاي, قازاننىڭ  1-جۇلدىزىنان قوسۋ كەرەكتىگىن ايتتى. نەگىزىنەن وب­لىستىڭ قىسقا دايىندىعى جامان ەمەس. بايلانىسقا شىققان ارقالىق قالاسىنىڭ اكىمى تەمىرجان تولەۋباەۆ جىلۋدى ءبۇ­گىن بەرۋگە دە دايىن ەكەنىن حاباردار ەتتى. بىراق  مازۋت كوك­تەم­گە دەيىن تاپشى بولۋى دا مۇمكىن. سوندىقتان وعان قو­سىم­شا قارجى كەرەك. رۋدنىي قالاسى دا ساقاداي ساي. الايدا كەنشىلەر قالاسىنىڭ كوگىلدىر وتىنعا 3 ميلليون تەڭگە قارىزى بار. ال ليساكوۆ قالاسىندا قا­زان ايىن كۇتپەي-اق  قىركۇيەك­تىڭ 30-ىنان باستاپ جىلۋ بەرىلمەك. ءنازيرا جارىمبەتوۆا. قوستاناي. * * * ...باسقارمالارعا باسشىلار تاعايىندالدى مۇنايلى ءوڭىر اكىمى بەرگەي رىسقاليەۆ وبلىستىق ەكى باس­قار­ماعا جاڭادان باسشىلار تا­عايىنداعان وكىمگە قول قويدى. ويتكەنى, بۇعان دەيىن وبلىستىق ىشكى ساياسات باسقارماسىنىڭ بۇ­رىن­عى باستىعى ستاتيستيكا ءجو­نىن­دەگى ۇجىمدى باسقارۋعا اۋىس­قان ەدى. ەندى ىشكى ساياسات باس­قارماسىن باسقارۋ ءۇشىن اكىمنىڭ تاڭداۋى «اتىراۋ-اقپارات» مەدياحولدينگىنە بەس جىلداي جەتەكشىلىك ەتكەن ەلدار جۇما­عازيەۆكە ءتۇستى. ال وبلىستىق ءبىلىم باس­قار­ماسىنىڭ باستىعى لاۋازىمىنا ساتقان ەسەنعاليەۆ تاعايىن­دال­دى. ول جاڭا لاۋازىمعا تاعايىن­دال­عانعا دەيىنگى ەكى جىلداي وبلىستىق بالالاردىڭ قۇقىعىن قورعاۋ دەپارتامەنتىنە جەتەكشىلىك ەتتى. جولداسبەك شوپەعۇل. اتىراۋ وبلىسى.