رەسەي پرەزيدەنتى دميتري مەدۆەدەۆ ەلدىڭ قورعانىس پەن قاۋىپسىزدىككە ارنالعان شىعىنى وتە جوعارى بولىپ قالا بەرەتىنىن مالىمدەدى. مۇنداي ۇستانىممەن كەلىسپەيتىن مەملەكەتتىك قىزمەتشىلەر, دەدى ول, ءوزدەرىنە باسقا جۇمىس ىزدەي بەرسىن.
يتاليا پرەمەر-ءمينيسترى سيلۆيو بەرلۋسكونيگە قاتىستى ونىڭ بيزنەسمەن دجامپاولو تارانتينيدى ءوزىنىڭ جەڭگەتايلىق ءىسى بويىنشا تەرگەۋگە جالعان ءمالىمەت بەرۋگە ماجبۇرلەدى دەگەن كۇدىك پايدا بولىپ وتىر. بۇل تۋرالى ANSA اگەنتتىگى حابارلادى.
اۆستراليا ۇكىمەتى ايەلدەرگە تىكەلەي سوعىس ءىس-قيمىلدارىنا قاتىستى لاۋازىمداردا قىزمەت ەتۋگە رۇقسات بەرەتىن شەشىم قابىلدادى. بىراق ول ءۇشىن نازىك جاندىلار ەرلەر نورماتيۆتەرىن ورىنداۋعا قابىلەتتى بولۋلارى ءتيىس كورىنەدى.
ماسكەۋدەگى پۋشكين الاڭىندا وپپوزيتسيونەرلەر رەسەي پرەمەر-ءمينيسترى ۆلاديمير پۋتيننىڭ پرەزيدەنتتىك سايلاۋعا ءتۇسۋىنە قارسى نارازىلىق اكتسياسىن وتكىزدى. ميتينگ ماسكەۋ ءبيلىگىمەن كەلىسىلىپ ۇيىمداستىرىلدى. شاراعا بىرنەشە ءجۇز ادام جينالدى.
«ءال-جازيرا» تەلەارناسى كابۋل بيۋروسىنىڭ باسشىسى سامەر اللاۆي دۇيسەنبى كۇنى حاماس قوزعالىسىمەن ىنتىماقتاستىقتا يزرايلگە قارسى جاساعان قىلمىسى ءۇشىن سوتقا تارتىلدى. ول مۇنداي ارەكەتپەن 1993 جىلدان بەرى اينالىسىپ كەلىپتى.
امەريكانىڭ كۋباعا قارسى ەكونوميكالىق توسقاۋىلى ارال مەملەكەتكە تريلليون دوللارعا جۋىق شىعىن اكەلگەن. بۇلاي دەپ كۋبا سىرتقى ىستەر ءمينيسترى برۋنو رودريگەس پاريليۋ جاريا ەتىپ وتىر. ەمبارگو رەجىمىن ۆاشينگتون 1960 جىلى ەنگىزگەن بولاتىن.
الەكسەي كۋدرين رەسەي فەدەراتسياسى ۆيتسە-پرەمەرى جانە قارجى ءمينيسترى قىزمەتىنەن وتستاۆكاعا كەتتى. كۋدريننىڭ وتستاۆكاسى تۋرالى جارلىققا پرەزيدەنت مەدۆەدەۆتىڭ قول قويعانىن ونىڭ ءباسپاسوز حاتشىسى ن.تيماكوۆا قۋاتتاپ وتىر. كۋدريننىڭ بۇعان دەيىن مەدۆەدەۆ ۇكىمەتىندە ىستەمەيمىن دەپ مالىمدەگەنى بەلگىلى.
گرۋزيننىڭ «رۋستاۆي-2» تەلەارناسىنىڭ جۋرناليستەرى گرۋزيا پارلامەنتىنىڭ بۇرىنعى سپيكەرى نينو بۋردجانادزەنىڭ تبيليسيدە پرەزيدەنتكە قارسى اكتسيالار ۇيىمداستىرعانى ءۇشىن سىرتتاي سوتتالعان كۇيەۋى بادري بيتسادزە ۆەنادا ءجۇر دەگەن حابار تاراتتى.
گەرمانيا ليۆيانىڭ استاناسى – تريپوليدە ەلشىلىك اشتى. ەلشىلىك قىزمەتكە راينار ەبەرلە تاعايىندالعان. ونىڭ ايتۋىنشا, ەلشىلىكتىڭ مىندەتى جاڭا ليۆيامەن ساياسي, ەكونوميكالىق جانە مادەني بايلانىستار ورناتۋ بولىپ تابىلادى.
ەستونيانىڭ استاناسى – تاللين قالاسىنىڭ مەرى ەدگار ساۆيساار كولىگىنىڭ جىلدامدىعىن اسا جوعارىلاتىپ جىبەرگەنى ءۇشىن ايتىپتى دەپ تانىلدى. ول ساعاتىنا 90 شاقىرىم جىلدامدىقپەن جۇرۋگە رۇقسات ەتىلگەن جول بويىندا 137 شاقىرىم جىلدامدىقپەن جۇرگەن. ەندى مەر ايىپ ءتولەۋى, تۇتقىندالۋى نەمەسە 12 ايعا كولىك جۇرگىزۋ قۇقىنان ايىرىلۋى ءتيىس.
اقپارات اگەنتتىكتەرىنىڭ ماتەريالدارى نەگىزىندە ازىرلەندى.
