مەملەكەت باسشىسى نۇرسۇلتان نازارباەۆ رەسەي فەدەراتسياسى پرەزيدەنتىنىڭ كەدەن وداعىنداعى ارنايى وكىلى ۆيكتور حريستەنكونى قابىلدادى.
كەزدەسۋ بارىسىندا ەكىجاقتى ىنتىماقتاستىق ماسەلەلەرى, سونداي-اق كەدەن وداعى قىزمەتىنىڭ ماسەلەلەرى تالقىلاندى.
– نۇرسۇلتان ءابىش ۇلى بارلىق پوستكەڭەستىك ينتەگراتسيالىق تاريحتىڭ لوكوموتيۆى بولىپ تابىلادى. بۇل رەتتە ءجۇرىپ وتكەن جانە قول جەتكىزىلگەن ەلەۋلى كەزەڭدەر ينتەگراتسيالىق باعىتتاردىڭ سەنىمدىلىگى مەن تيىمدىلىگىن كورسەتەدى, – دەپ باستادى ۆ.حريستەنكو قابىلداۋدان شىققاننان كەيىنگى جۋرناليستەرگە ارنالعان بريفينگتە. – 2000 جىل – بەس مەملەكەتتىڭ قاتىسۋىمەن مۇلدە جاڭا فورماتتاعى ەۋرازيالىق ەكونوميكالىق قوعامداستىقتى قۇرۋ جىلى بولدى. بۇدان ءبىراز ۋاقىت وتكەن سوڭ كەدەن وداعىن قالىپتاستىرۋ تۋرالى شەشىم قابىلدانىپ, ءۇش ەل – قازاقستان, بەلارۋس جانە رەسەي تەرەڭ ينتەگراتسيالىق ۇدەرىستەرگە قاراي العا جىلجىدى. بۇل دا بۇگىندە ستاتيستيكالىق, تەحنيكالىق جانە ساياسي جاعىنان ءوزىنىڭ تيىمدىلىگىن كورسەتتى. قاراپايىم ازاماتتار, بيزنەس ءۇشىن كەدەن بەكەتتەرى, كوپتەگەن رەسىمدەر الىنىپ تاستالعاندا, تاۋارلاردىڭ, كاپيتالدىڭ اۋىسۋى ءبارى ءۇشىن كۇتپەگەن ەركىندىك بولدى. بۇل, ءسوز جوق, سوڭعى ءۇش جىلداعى جەتىستىك. وسى ءۇش جىل ىشىندە كەدەن وداعىنىڭ جاڭا ينتەگراتسياسىنىڭ قۇقىقتىق جانە ۇيىمداستىرۋشىلىق بازاسى قالىپتاسقان سوڭ, بۇل كەزەڭ ەندىگى باستاۋىن كەلەر جىلدان الاتىن جاڭا كەزەڭگە اۋىسادى. بۇل – بىرىڭعاي ەكونوميكالىق كەڭىستىكتىڭ فۋنكتسياسى كەڭەيە تۇسەتىن كەزەڭ. ول ۋاقىتتا تاۋارلار مەن قىزمەت كورسەتۋ عانا ەمەس, سونىمەن قاتار قارجى ساياساتىن ءۇيلەستىرۋ جانە قامتاماسىز ەتۋ, سالىق ساياساتىن ۇيلەستىرۋ, ءبىزدىڭ دامۋىمىزدىڭ بەرىك تۇراقتىلىعى مەن ورنىقتىلىعىنا اپاراتىن ەلەمەنتتەردى ۇيلەستىرۋ اناعۇرلىم ۇلكەن كولەمدە جۇزەگە اسىرىلادى. بيىلعى جىلى, – دەدى بۇدان كەيىن رف پرەزيدەنتىنىڭ كەدەن وداعىنداعى ارنايى وكىلى, – ءبىز رەسەي مەن قازاقستاننىڭ ەكىجاقتى تاۋار اينالىمىنىڭ 40 پايىزدىق وسىمىنە قول جەتكىزدىك, ءبىزدىڭ ەلدەرىمىز اراسىنداعى تاۋار اينالىمى بويىنشا ءوز تاريحىنداعى ەڭ رەكوردتىق كورسەتكىشكە شىعامىز, ياعني تاۋار اينالىمى ول كەزدە 20 ملرد. دوللارعا ارتادى. بەلارۋسپەن دە سولاي بولادى. ءيا, ءبىز ءوز ەكونوميكامىزدا كورىنىس تاباتىن جاھاندىق داعدارىستىڭ قيىن كەزىن باستان ءوتكەرەمىز. ينتەگراتسيانىڭ تەرەڭدەۋى ءبىزدىڭ ەكونوميكانىڭ اناعۇرلىم ورنىقتى, اناعۇرلىم نەگىزدى دامۋىنا مۇمكىندىكتەر تۋعىزاتىن بولادى. پرەزيدەنت نۇرسۇلتان ابىش ۇلىمەن بۇگىنگى كەزدەسۋىمىز كوميسسيا جۇمىسى ءۇشىن جاڭا قۇقىقتىق بازا قالىپتاستىرۋعا ارنالدى. ول سونداي-اق جاڭا ينتەگراتسيالىق الاڭدا ۇيىمنىڭ جۇمىسىن ءتيىمدى قامتاماسىز ەتەتىن كاسىبي, ۇنەمى ارەكەت ەتەتىن ورگانعا اينالۋى كەرەك. ءبىر جاعىنان, قازاقستان پرەزيدەنتىنىڭ وراسان تاجىريبەسىنىڭ ارقاسىندا, ەكىنشى جاعىنان, وسى ۇدەرىستەردىڭ ءمانىن تۇسىنە وتىرىپ, بۇگىندە دامۋ ءۇشىن الدا ۇلكەن كوكجيەكتى قامتاماسىز ەتەتىن ىمىراعا كەلەتىن شەشىم قابىلداۋ قاجەت. قازاقستان 20 جىل ىشىندە وزگە ەلگە – ورنىقتى دامۋشى, ءوزىنىڭ پەرسپەكتيۆالارىن الدىن الا ءدال كورەتىن, ءوز مۇددەلەرىن ناقتى ءتۇسىنەتىن جانە ونى قورعاي بىلەتىن, ءارتۇرلى سالالارداعى ءىرى جوبالاردى ىسكە اسىرا الاتىن ەلگە اينالدى. وسى ورايدا پرەزيدەنت سارايىنىڭ تەرەزەسىنەن جاڭا قازاقستاننىڭ قاندايلىق دامىعانىنىڭ دالەلىن كورۋگە بولادى. مەن ەلدىڭ, قالالاردىڭ, ادامداردىڭ كەلبەتى قالاي وزگەرگەنىن كوردىم. مەن ءۇشىن بۇل – پرەزيدەنت نۇرسۇلتان نازارباەۆتىڭ باسشىلىعىمەن قازاقستان قول جەتكىزگەن جەتىستىكتەردىڭ وتە جارقىن بەلگىسى, – دەپ اياقتادى ءسوزىن ۆ.حريستەنكو جۋرناليستەرگە ارنالعان بريفينگتە.
