«ەۋرازيا» كينوفەستيۆالىنىڭ باس جۇلدەسىن «نوسەر الدىندا» كارتيناسى الدى
الماتىنى دۋمانعا ءبولەگەن VII حالىقارالىق «ەۋرازيا» كينوفەستيۆالى دە مارەگە جەتتى. كينوسۇيەر قاۋىم بەس كۇن بويى 7 باعدارلاما اياسىندا 20 ەلدىڭ كارتينالارىن تاماشالاسا, وسى ارالىقتا قازىلار القاسى 12 كارتينانى ساراپقا سالدى.
فەستيۆالدىڭ اشىلۋ سالتاناتى دا, ماراپاتتاۋ ءراسىمى دە ءو.جولداسبەكوۆ اتىنداعى ستۋدەنتتەر سارايىندا ءوتتى. وسىنىڭ ارقاسىندا قازاق كينەماتوگرافيستەرى مەن الەمنىڭ كينوجۇلدىزدارى جاستار قالاشىعىندا ستۋدەنتتەرىمىزدىڭ قوشەمەتىنە بولەندى.
اتى تورتكۇل دۇنيەگە ءماشھۇر قوناقتاردىڭ قاتارىندا دجون كيۋساك, سيگۋرني ۋيۆەر, ناستاسيا كينسكي مەن نەد بەللامي, رەجيسسەر چاك راسسەل, رەسەيلىك اكتەرلەر ۆلاديمير ەرەمين, ۆاديم كولگانوۆ, ەلەنا كوريكوۆا ءجانە سەرگەي استاحوۆ بولدى. ال رەجيسسەر ەگور كونچالوۆسكي كينوفەستيۆالدىڭ اشىلۋ سالتاناتىندا «ا»-عا ورالۋ» اتتى كارتيناسىنىڭ تۇساۋىن كەسۋ قۇرمەتىنە يە بولدى. بۇل فيلم – قازاقستاندىق جانە رەسەيلىك كينەماتوگرافيستەردىڭ بىرىگىپ تۇسىرگەن لەنتاسى.
جەتىنشى رەت ۇيىمداستىرىلعان «ەۋرازيا-2011» كينوفەستيۆالىنىڭ بيىلعى جاڭالىقتارى مەن ماڭىزدى وزگەرىستەرىن بۇرىن دا بايانداعانبىز. دەگەنمەن, فەستيۆال اياسىنداعى «قازاقستاندىق كينوجوبالار رىنوگى» شاراسى ەڭ باستى وقيعالار قاتارىنان ورىن الدى. بۇل دا كۇندەردىڭ كۇنىندە كينەماتوگرافيستەرىمىز ءۇشىن ناعىز كاسىپقوي الاڭعا اينالۋى ءتيىس.
باستاپقىدا كينوجوبالار بايقاۋىنا كەلىپ تۇسكەن 65 ءوتىنىش ىشىنەن 8-ءى ىرىكتەلىنىپ الىنسا, ەڭ سوڭىندا ءۇش ستسەناري تۇپكىلىكتى تۇردە تاڭداپ الىنعان. ەندىگى جەردە بۇل كينوجوبالار قاي جاعىنان بولسا دا قارجىلاندىرىلىپ, ەۋروپالىق كينوستۋديالاردىڭ كومەگىمەن پروكاتقا شىعاتىن بولادى. رەجيسسەرلەر ءۇشىن سيرەك تۋاتىن مۇنداي مۇمكىندىككە ءادىلحان ەرجانوۆ, تالعات بەكتۇرسىنوۆ پەن ءامىر بايعازين يە بولدى. سونداي-اق, فەستيۆال بارىسىندا «ەرەكشە وقيعا» باعدارلاماسى اياسىندا وتكەن ەرەكشە وقيعالار تومەندەگىدەي. بيىلعى كينوفەستيۆالدىڭ قازىلار القاسىنا تورەلىك ەتكەن رەجيسسەر كيم كي دۋك ءوزىنىڭ «اريرانگ» اتتى كارتيناسىن, قازىلار القاسىنىڭ تاعى ءبىر مۇشەسى رۇستەم ابدىراشەۆ «بالالىق شاعىمنىڭ اسپانى» ءفيلمىن كورەرمەن نازارىنا ۇسىندى. بۇل باعدارلاما رەجيسسەر سلامبەك تاۋەكەلدىڭ «جەرۇيىق», كارلوس ساۋردىڭ «فلامەنكو, فلامەنكو» كارتينالارىن قامتىدى.
فەستيۆالدە باق سىناعان فيلمدەردەن بولەك, كونكۋرستان تىس جۇرگەن كورسەتىلىمدەر دە وتاندىق كينەماتوگرافيانىڭ اياق الىسىن كورسەتىپ بەردى. ماسەلەن, مۇنى «ىرعاقتى دامىپ كەلە جاتقان قازاقستاندىق كينو» باعدارلاماسىنا قاتىستى ايتىپ وتىرمىز. اتالمىش باعدارلاما اياسىندا ءوز ەلىمىزدە تۇسىرىلگەن ەڭ كورنەكتى جۇمىستار كورسەتىلدى. ال «ۆيرتۋالدى باتىس» باعدارلاماسىنا قازىلار القاسىنىڭ مۇشەسى جيل مارشان ەڭ سوڭعى جۇمىسى «قارا اسپاندى» ۇسىنىپ, الماتىلىقتار بۇعان قوسا لارس فون تريەردىڭ اتىشۋلى كارتيناسى «مەلانحوليا» ءفيلمىن كورۋگە ءمۇمكىندىك الدى.
«وزگەرمەلى شىعىس» باعدارلاماسى «كاپيتان ابۋ راەد» (يوردانيا) پەن «ءلايلانىڭ تۋعان كۇنى»( پالەستينا) فيلمدەرىن ناسيحاتتادى. بۇل ەكى كارتينا دا شىعىس مەملەكەتتەرىندەگى قازىرگى وزەكتى ماسەلەلەردى شىنشىل تۇرعىدا كورسەتە العاندىعىمەن باعالاندى.
سونىمەن, وڭتۇستىككورەيالىق كيم كي دۋك باس بولىپ, رف حالىق ءارتىسى, رەجيسسەر ۆلاديمير حوتينەنكو, فرانتسۋز رەجيسسەرى ءارى كومپوزيتورى جيل مارشان, جاپون رەجيسسەرى, 2007 جىلى «ەۋرازيا» كينوفەستيۆالىنە قاتىسقان يويتي ساي مەن ءوز رەجيسسەرىمىز رۇستەم ابدىراشەۆ قوستاعان قازىلار القاسىنا دا ەڭ ۇزدىك جۇمىستاردى تاڭداۋ وڭايعا تۇسپەگەن. بۇل تۋرالى كيم كي دۋك كينوفەستيۆالدىڭ باس جۇلدەسى – گران ءپريدى ءوز قولىمەن رەجيسسەرلەر سانو سيندزيۋ مەن ەرلان نۇرمۇحامبەتوۆكە تابىستاپ تۇرعاندا ايتتى.
– بىزگە ەڭ ۇزدىك ءفيلمدى تاڭداۋ وتە قيىن بولدى. ءتىپتى قازىلار القاسىنىڭ مۇشەلەرى داۋىس بەرۋدە داۋلاسۋعا دەيىن باردى, – دەدى كيم كي دۋك.
سونىمەن, بيىلعى كينوفەستيۆالدىڭ باس جۇلدەسى جوعارىدا اتالعان رەجيسسەرلەر بىرىگىپ تۇسىرگەن «نوسەر الدىندا» (جاپونيا-قازاقستان) كارتيناسىنا بۇيىردى.
جىل سايىن ءداستۇرلى تۇردە يەلەرىنە تابىستالاتىن جۇلدەلەر قاتارىندا «ەڭ ۇزدىك رەجيسسۋرا» اتاعى بار. بۇل جۇلدەگە – رەجيسسەر ناريمان تورەباەۆتىڭ «شۋاقتى كۇندەر» (قازاقستان) كارتيناسى لايىق دەپ تابىلدى.
«ەڭ ۇزدىك ەر ادام ءرولى» جۇلدەسى – يسلانديا رەجيسسەرى رۋنار رۋنارسسوننىڭ «جانارتاۋ» فيلمىندە باستى رولدە ويناعان تەودور جۋليوسسونعا بەرىلدى.
«ەڭ ۇزدىك ايەل ءرولى» جۇلدەسىن رەسەي كينورەجيسسەرى يگور ءۆولوشينننىڭ «ءباداۋي» كارتيناسىنداعى جۇمىسى ءۇشىن ولگا سيمونوۆا يەمدەندى.
سول سياقتى سوڭعى جىلدارى ءداستۇرلى تۇردە بەرىلىپ جۇرگەن حالىقارالىق كينەماتوگرافيالىق باسىلىمدار فەدەراتسياسىنىڭ – فيپرەسسي جۇلدەسىنە فيليپپيندىك رەجيسسەر وراۋس سوليتونىڭ «بۋسونگ» كارتيناسى لايىق دەپ تابىلسا, نەتپاك قازىلار القاسى وزبەكستاندىق رەجيسسەر زۇلفىقار مۇساقوۆتىڭ «مىرىش» اتتى ءفيلمىن ماراپاتتادى.
ال «ەۋرازيا-2011» كينوفەستيۆالىنىڭ جابىلۋ سالتاناتىنىڭ ءسانى – گولليۆۋدتىق مەگا-جۇلدىز سيگۋرني ۋيۆەر بولدى. سيگۋرني حانىم دا قازاق ەلىنە تۇڭعىش رەت كەلىپ وتىر ەكەن. بۇرىن كورمەگەن ەلدىڭ سالت-ءداستۇرى مەن قوشەمەتى اتاقتى اكتريساعا ۇناعانى بايقالىپ-اق تۇردى. سيگۋرني حانىم دا «ەۋرازيا» كينوفەستيۆالىنىڭ ساحناسىندا تۇرىپ, «الەمدىك كينو ونەرىنە قوسقان ۇلەسى ءۇشىن» سىيلىعىمەن ماراپاتتالدى.
وسىلايشا VII حالىقارالىق «ەۋرازيا» كينوفەستيۆالى دە اياقتالدى. ال ەرمەك امانشاەۆ مىرزا سەگىزىنشى كينوفەستيۆالگە دايىندىق كەلەسى كۇننەن-اق باستالاتىندىعىن مالىمدەدى.
ايناش ەسالي.
الماتى.
سۋرەتتەردە: گران-پري العان قوس رەجيسسەر; سۋگرۋني ۋيۆەرگە كورسەتىلگەن قوشەمەت; ءجۇرگىزۋشىلەر.
