بالۋاندار باسەكەسى باستالماس بۇرىن دۇنيەجۇزىلىك قازاق كۇرەسى فەدەراتسياسىنىڭ قۇرمەتتى پرەزيدەنتى قاجىمقان ءماسىموۆ, اكادەميك عاريفوللا ەسىم, وليمپيادا چەمپيونى جاقسىلىق ۇشكەمپىروۆ, اقىن قايىربەك اسانوۆ, سپورت ءجۋرناليسى نەسىپ ءجۇنىسباي, حالىقارالىق ءداستۇرلى كۇرەس تۇرلەرى قاۋىمداستىعىنىڭ (FILA) كوميتەت توراعاسى گەنتاۋتاس ۆيلەيتا باستاعان الىس-جاقىننان كەلگەن مارتەبەلى قوناقتار ىرعىزباي اۋليە كەسەنەسىندە بابا رۋحىنا باعىشتالعان اسقا قاتىستى.
اقسۋات بوز كىلەمىنە ەڭ الدىمەن البەرت مكرتچيان مەن موڭعول بالۋانى توگۋبات باتنۋر شىعىپ, بۇل بەلدەسۋدە قاپ تاۋىنىڭ وكىلى قارسىلاسىن بار بولعانى ەكى مينۋت ىشىندە جەر قاپتىردى. ءبىر ايتا كەتەرلىگى, بيىل قازاقتىڭ جىگىتتەرى بارلىق سالماقتا دا دەس بەرمەي, قارسىلاستارىن قوعاداي جاپىردى. جەتپىس كيلودا وڭتۇستىك قازاقستان وبلىسىنىڭ تۋماسى قاسىمحان تولەنباەۆ قارسىلاس شاق كەلتiرمەسە, 90 كيلودا بەكزات احمەتبەكوۆ توپ جاردى.
ال 90 كيلودان جوعارى سالماقتا «قازاقستان بارىسى» ايبەك نۇعىماروۆ اقتىق سىندا 160 كيلو تارتاتىن ورىس بالۋانى رۇستەم ارسىلانوۆتى 3 مينۋت شاماسىندا جاۋىرىنىن جەر يiسكەتىپ, الەم كۋبوگىنىڭ جەڭىمپازى اتاندى. 90 كيلو سالماقتاعى گرۋزين اداشاشۆيلي زۆيا, ءۇندىستاننان كەلگەن مۋكسين گۋاتالي سەكىلدى بالۋانداردىڭ ونەرى دە كوپشىلىكتىڭ كوڭىلىنەن شىقتى. كۇرەس كورۋگە جينالعان جۇرت ولاردىڭ ايشىلىق الىس جەرلەردەن ات ارىتىپ كەلگەنىنە عانا ەمەس, قازاق كۇرەسىن ءبىر كىسىدەي مەڭگەرگەنىنە ريزاشىلىقتارىن ءبىلدىرىپ وتىردى. بەلدەسۋدەن گورى بيگە شەبەر حالىقتىڭ وكىلى مۋكسين گۋاتالي قازاق جەرىنە العاش رەت كەلگەنىن ايتىپ, مۇنداي ۇلكەن جارىستىڭ اۋىلدا وتكەنىنە تاڭعالعانىن دا جاسىرمادى.
ء«بىزدىڭ ەلدە مۇنداي جارىستار ۇلكەن قالالاردا عانا وتەدى. ۇشى-قيىرسىز سايىن دالا توسىندە وسىنداي اجارلى اۋىلدى كورەم دەپ مۇلدەم ويلاماپپىن. ۇلتتىق تاعامدارىڭىز, داستۇرلەرىڭىز قانداي كەرەمەت, حالىقتىڭ قوناقجايلىعىنا ءتانتى بولدىم», – دەيدى ول.
ازامات قاسىم,
«ەگەمەن قازاقستان»
شىعىس قازاقستان وبلىسى
سۋرەتتەردى تۇسىرگەن ءماناپ مۇرزاتاەۆ
