شارا بارىسىندا ەلىمىزدىڭ مادەنيەت جانە رۋحانيات سالاسىنا ەڭبەگى سىڭگەن ءبىر توپ ونەر جانە ادەبيەت قايراتكەرلەرىنە وبلىس اكىمىنىڭ ارنايى سىيلىعى تابىس ەتىلدى.
وبلىس اكىمىنىڭ قولىنان سىيلىق العانداردىڭ قاتارىندا جازۋشى ءادىحان شىلتەرحانوۆ, اقىن-سازگەر, دراماتۋرگ يسرايل ساپارباي, ءانشى اقجول مەيىربەكوۆ, نۇرلان ونەرباەۆ, التىناي جوراباەۆا سىندى ساڭلاقتار بار.
«وڭتۇستىك قازاقستان وبلىسىنداعى كاسىبي تەاترلاردىڭ سانى 8-گە جەتىپ, وندا جىل سايىن 40-تان استام جاڭا سپەكتاكل ساحنالانىپ كەلەدى. وسىنىڭ ءوزى وڭتۇستىك جۇرتشىلىعىنىڭ شىنايى ونەرگە دەگەن ىقىلاس-پەيىلىن تانىتسا كەرەك. جىل سايىن وبلىس ورتالىعىندا «تەاتر كوكتەمى» فەستيۆالى وتكىزىلەدى. بارشاڭىزعا مادەنيەت پەن ونەرگە قىزمەت ەتۋ جولىندا زور دەنساۋلىق, شابىت, جاڭا شىعارماشىلىق تابىستار تىلەيمىن», دەدى وبلىس اكىمى جانسەيىت قانسەيىت ۇلى مادەني شارادا.
كەش بارىسىندا ءوڭىرىمىزدىڭ 8 ونەرپازىنا قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ «مادەنيەت سالاسىنىڭ ۇزدىگى» توسبەلگىلەرى مەن وبلىس اكىمىنىڭ گراموتالارى تابىستالدى. سونداي-اق, «تۇركىستان 2017 جىل – تۇركى الەمىنىڭ مادەني استاناسى» جىلىنىڭ سالتاناتتى اشىلۋى مەن تۇركى الەمىنىڭ «ناۋرىزناما» مەرەكەسىن ۇيىمداستىرۋعا اتسالىسقان شىعارماشىلىق ۇجىمدارعا وبلىس اكىمىنىڭ اتىنان العىس حاتتار بەرىلدى.
باقتيار تايجان,
«ەگەمەن قازاقستان»
