كەشە ازەربايجاننىڭ استاناسىندا بوكستان ەرەسەكتەر اراسىندا الەم چەمپيوناتى باستالدى. بۇل – حالىقارالىق اۋەسقوي بوكس قاۋىمداستىعىنىڭ اياسىندا 1974 جىلى العاش رەت وتكىزىلگەن بوكسشىلار باسەكەسىنەن بەرگى 16-شى الەم چەمپيوناتى. بيىلعى چەمپيوناتقا الەمنىڭ 130 ەلىنەن 700-دەن استام بىلعارى قولعاپ شەبەرلەرى قاتىسۋدا. ولار 26 قىركۇيەك پەن 9 قازان ارالىعىندا 10 سالماق دارەجەسىندە لوندون وليمپياداسىنىڭ جولداماسى ءۇشىن باق سىناسادى.
الەم چەمپيوناتىنا ءبىزدىڭ قۇرامانى 23 قىركۇيەك كۇنى قازاقستان بوكس فەدەراتسياسىنىڭ ۆيتسە-پرەزيدەنتى, ايبا بيۋروسىنىڭ مۇشەسى, داڭقتى بوكسشىمىز سەرىك قوناقباەۆ پەن ۇلتتىق قۇرامانىڭ باس باپكەرى مىرزاعالي ايتجانوۆ باستاپ كەلدى. بۇل باسەكەدە ءبىزدىڭ ەل مىنا قۇرامدا قاتىساتىن بولادى. ياعني, ەڭ جەڭىل 49 كيلو سالماقتا ءبىرجان جاقىپ قاتىسادى. ءبىزدىڭ ەلدە وسى سالماقتا ەل نامىسىن قورعاۋعا لايىق بىرنەشە بوكسشىنىڭ بار ەكەنىن بىلەمىز. دەگەنمەن, باس باپكەر ءبىرجان جاقىپتى ۇلتتىق قۇرامادا ونەر كورسەتۋگە لايىق دەپ شەشتى. بۇل جەردە ايتجانوۆ ءوزىنىڭ ءتول شاكىرتىنىڭ سوڭعى كەزدەردەگى ونەرىن ەسكەرگەن بولۋ كەرەك. ول بيىل ۇلكەن جارىستارعا قاتىسپاعانىمەن, ەلىشىلىك سىنداردا, ىرىكتەۋ كەزىندەگى سپاررينگتەردە ءوزىن جاقسى جاعىنان كورسەتە ءبىلدى.
كەلەسى, 52 كيلو سالماقتا جارىسقا تارازدىق بوكسشى ولجاس ءساتتىباي قاتىسادى. بۇل سالماقتا دا ەلىمىزدە الەمدىك باسەكەگە قاتىسۋعا لايىق بوكسشىلار جەتكىلىكتى. بىراق, باس باپكەر سولاردىڭ ىشىندە ىرىكتەۋ كەزىندە ءوزىن جەڭىسكە دەگەن جىگەرلىلىگىمەن تانىتىپ, كوزگە تۇسكەن ولجاس ءساتتىبايدى قۇراما ساپىنا الدى. ودان كەيىن 60 كيلودا ەلىمىزدىڭ 2009 جانە 2010 جىلعى چەمپيونى عاني جايلاۋوۆ قولعاپ تۇيىستىرەدى.
64 كگ. سالماقتا ۇلتتىق قۇرماعا بىلتىرعى ازيا ويىندارىنىڭ جەڭىمپازى, 2010 جانە 2011 جىلدارعى ەل چەمپيونى دانيار ەلەۋسىنوۆ قوسىلىپ وتىر. قازىر وسى بوكسشىعا كوپ ادامدار سەنىم ارتۋدا. بيىلعى جارىستا نامىسقا تىرىسىپ, ءوزىن تاعى ءبىر دالەلدەسە, دانياردىڭ الەم چەمپيونى اتانۋى ابدەن مۇمكىن.
كەلەسى, 69 كيلودا شارشى الاڭعا ەلىمىزدىڭ ۇزدىك بوكسشىلارىنىڭ ءبىرى سەرىك ساپيەۆ شىعادى. بۇل – ساپيەۆ ءۇشىن ءتورتىنشى الەم چەمپيوناتى. مۇنىڭ الدىندا ول ەكى رەت الەم چەمپيونى اتانىپ, وسىدان ەكى جىل بۇرىن ميلاندا وتكەن سىندا قولا جۇلدەگە يە بولعان ەدى. ەندى ەكى دۇركىن الەم چەمپيونى ءۇشىنشى مارتە باس جۇلدەنى جەڭىپ الۋدى ماقسات ەتىپ وتىر.
75 كيلودا دانابەك سۋجانوۆ شارشى الاڭعا شىعادى. ول دا سوڭعى كەزدەرى باپكەرلەردىڭ كوزىنە ءتۇسىپ جۇرگەن بوكسشى. بىلتىر ول گۋانچجوۋدا وتكەن ازيا ويىندارىندا قولا جۇلدەگە يە بولدى. 81 كگ. سالماقتا جارىسقا ادىلبەك نيازىمبەتوۆ قاتىسادى. بۇل سالماقتا دا ۇلتتىق قۇرامانىڭ ءمۇشەسى بولۋعا لايىق بىرنەشە بوكسشى بار بولاتىن. سولاردىڭ ىشىنەن ەڭ سوڭعى ساتتە باس باپكەر نيازىمبەتوۆكە تاڭداۋ جاساعان ەكەن. كەلەسى, 91 كگ. جانە اسا اۋىر سالماقتا ۆاسيلي لەۆيت پەن يۆان دىچكو قولعاپ تۇيىستىرەدى. وسى بوكسشىلاردىڭ ءبارىن الەم چەمپيوناتىنا وزدەرىنىڭ جەكە باپكەرلەرىمەن بىرگە نۇرلان اقۇرپەكوۆ, الەكساندر سترەلنيكوۆ پەن مارات ەلەۋسىنوۆ باستاپ اكەلىپ وتىر. سوڭعىسى دانيار ەلەۋسىنوۆتىڭ اكەسى مەن باپكەرى.
وسى چەمپيوناتتا ەلىمىز ءبىر التىن, ءبىر كۇمىس جانە ءبىر قولا جۇلدەنى جەڭىپ الۋدى ماقسات ەتىپ وتىر. بۇل – ۇلتتىق قۇرامانىڭ باس باپكەرى مىرزاعالي ايتجانوۆتىڭ ءسوزى.
* * *
كەشە ءتۇس اۋا ءبىزدىڭ قۇرامادا ەڭ جەڭىل سالماقتا ءبىرىنشى بولىپ ءبىرجان جاقىپ كۋبالىق يوسۆاني ۆەيتيامەن قولعاپ ءتۇيىستىردى. وكىنىشكە قاراي, جەڭىس ءبىزدىڭ جاقتا بولمادى. كۋبالىق 19 جاسار بوكسشى ءۇش راۋندتىڭ بارىندە باسىمدىق تانىتىپ, جەڭىسكە جەتتى. ەسەپ – 21:11.
باكۋ شارشى الاڭىندا ءبىرجان جاقىپ قولعاپ ءتۇيىستىرىپ جاتقاندا, كورشى رينگتە قىتاي زوۋ شيمين دومينيكاندىق حۋان مەدينامەن كەزدەسىپ, قارسىلاسىن تازا ۇتتى.
بۇگىن ءوز سالماعىندا ولجاس ءساتتىباي ماروككولىق ابدەلفاتتاح نافيلمەن كەزدەسەدى.
داستان كەنجالين, «ەگەمەن قازاقستان»– باكۋدەن.
