قازاقتىڭ مۇحتار اۋەزوۆ اتىنداعى مەملەكەتتىك اكادەميالىق دراما تەاترىنىڭ ارتىستەرى جامبىل وبلىسىنا گاسترولدىك ساپارمەن كەلدى.
«كەلگەنشە قوناق ۇيالادى, كەلگەن سوڭ ءۇي يەسى ۇيالادى», دەمەكشى, وبلىس كورەرمەندەرى تاراپىنان رۋحاني قوشەمەتكە بولەنگەن حالىق ارتىستەرى ءسابيت ورازباەۆ, تورعىن تاسىبەكوۆا, تۇڭعىشباي جامانقۇلوۆ جانە اتالمىش تەاتر ديرەكتورى ەسمۇحان وباەۆتى وبلىس اكىمى قانات بوزىمباەۆ جىلى شىرايمەن قابىلدادى. وبلىستاعى الەۋمەتتىك-ەكونوميكالىق وڭ وزگەرىستەردى بايانداي كەلىپ, وبلىس باسشىسى بيىل وبلىستىق تەاتردىڭ قاسبەتى جوندەلىپ جاتقانىن, ال كەلەسى جىلى ونەر شاڭىراعى كۇردەلى جوندەۋدەن تولىقتاي وتەتىنىن اڭگىمەلەدى.
وڭىردەگى ونەر مەن مادەنيەتكە دەگەن قامقورلىق مۇنىمەن دە شەكتەلمەپتى. ۇستىمىزدەگى جىلى وبلىستا تۇڭعىش رەت ۇلت اسپاپتار وركەسترى دۇنيەگە كەلسە, تاراز مەملەكەتتىك پەداگوگيكالىق ينستيتۋتى جانىنان مادەنيەت جانە ونەر كوللەدجى اشىلعان. سونداي-اق, تارازدىق تالانتتاردىڭ شەبەرلىكتەرىن شىڭداپ, جاڭا باعىتتا جۇمىس ىستەۋ ءۇشىن «ارت-MIX» ونەر سەمينارى وتكىزىلگەن. وعان بەلگىلى رەجيسسەرلەر يۋ.حانينگا-بەكنازار, ب.اتاباەۆ, قىلقالام شەبەرى ا.مەڭلىباەۆا, حورەگراف گ.عابباسوۆا, تەاتر زەرتتەۋشىسى ج.ءجانتورينا كەلىپ, ساحنا, سۋرەت, بي ونەرىنە دەن قويعان ارىپتەستەرىمەن شەبەرلىك بولىسكەن. تاراز قالاسىندا وتكەن سۋرەتشىلەردىڭ حالىقارالىق سيمپوزيۋمىن دا ونەردىڭ وركەنيەتكە ۇمتىلۋىنىڭ جاقسى ءۇردىسى دەپ قابىلداعان ءجون.
مىڭ رەت ەستىگەننەن, ءبىر رەت كورگەن ارتىق. اتاقتى «اكەمتەاتر» ەل ىشىنە كەلىپ, ونىڭ ءسابيت ورازباەۆ سىندى ساڭلاقتارى ويناعان سپەكتاكلىن ءبىر رەت بولسا دا كورگەن ارتىق. سوندىقتان وبلىس باسشىسى قانات بوزىمباەۆ ارتىستەردى قابىلداۋمەن بىرگە, ساحنا شەبەرلەرىنىڭ ونەرىن تاماشالاۋعا دا ۋاقىت ءبولدى. ءسويتىپ, قىرعىز رەجيسسەرى ب. جاكيەۆتىڭ «جۇرەيىك جۇرەك اۋىرتپاي» دەپ اتالاتىن دراماسىنىڭ باستى قاھارمانىن سومداعان ءسابيت ورازباەۆتىڭ ونەرىنە كورەرمەنمەن بىرگە ريزاشىلىقپەن قول سوقتى.
كوسەمالى ساتتىباي ۇلى.
جامبىل وبلىسى.
