ء«بىز الەمدىك ستۋديالاردىڭ ونىمدەرىن قازاق تىلىنە كوبىرەك بەيىمدەۋگە نيەتتىمىز. بۇل رەتتە تەك ستۋديالاردىڭ عانا ەمەس, سونىمەن قاتار كىتاپ باسپالارىنىڭ ونىمدەرىن قازاقشالاۋعا ءمان بەرۋدەمىز. مىسالى, دجوان روۋلينگتىڭ جاڭا كىتابىن قازاق تىلىندە باسىپ شىعارۋدى ارماندايمىن. ەگەر دە ونىڭ گارري پوتتەر نەمەسە باسقا دا جوبالارى ءبىر مەزگىلدە قازاق, ورىس جانە اعىلشىن تىلدەرىندە باسىلىپ جاتسا, بۇل ءوز كەزەگىندە ۇلكەن وقيعا بولادى دەپ سانايمىن», دەدى ۆ. گولەنكو.
وسى تۇرعىدا ول ءتيىستى كىتاپتاردى باسقا تىلدەردە قايتا باسىپ شىعارۋعا رۇقساتتى باسپالاردان ساتىپ الىنسا, ال گارري پوتتەر تۋرالى سەريالاردى باسۋ قۇقىقتارىن تىكەلەي دجوان روۋلينگتەن الۋ كەرەكتىگىن ءتۇسىندىردى. بۇل باعىتتا كەلىسسوزدەردىڭ وزىنە ۇزاق ۋاقىت جۇمسالاتىن كورىنەدى.
«ارينە, بۇل ماسەلەنى روۋلينگ حانىممەن تالقىلاساق, ونىڭ بىزگە سەنۋى ءۇشىن قىزىقتىرا ءتۇسۋىمىز كەرەك. وزدەرىڭىز بىلەسىزدەر, ونىڭ كىتاپتارى ميلليونداعان دانامەن باسىلىپ جاتىر. سوندىقتان دا ءبىز قانداي دا ءبىر دالەلدەردى كەلتىرۋىمىز قاجەت. وسى ورايدا مۇمكىن «بولاشاق» قاۋىمداستىعىمەن بىرلەسە وتىرىپ, روۋلينگكە ونىڭ تۋىندىلارى ۇلا دالانىڭ ەڭ كونە تىلدەرىنىڭ بىرىندە باسىلاتىنىن تۇسىندىرگەن ءجون بولار. بۇل رەتتە ول بىزگە سەنىم ارتىپ, ءوز رۇقساتىن بەرۋى ىقتيمال», دەپ ويىمەن ءبولىستى «مەلومان» باسشىسى.
سونىمەن قاتار, ول قازىرگى كەزدە كومپانيا بىرقاتار شەتەلدىك اۆتورلاردىڭ تۋىندىلارىن قازاق تىلىنە اۋدارۋعا كەلىسسوزدەر جۇرگىزىپ جاتقاندىعىن ايتتى.
«بۇگىندە فرانتسيادا باسىلعان اۆتورلاردىڭ كىتاپتارىن قازاق تىلىندە شىعارۋ ءۇشىن فرانتسۋز باسپاسىمەن كەلىسسوزدەر جۇرگىزۋدەمىز. وسى راسىمدەر ايتارلىقتاي كوپ ۋاقىتتى الادى», دەدى ۆاديم گولەنكو.
ايتا كەتەيىك, دجوان روۋلينگتىڭ جاس سيقىرشى گارري پوتەر جايىنداعى كىتاپتارى بىرنەشە ماراپاتقا يە بولىپ, 400 ميلليوننان استام دانامەن ساتىلدى.
