اتالمىش كوللەدج اقتاۋ قالاسىندا 1976 جىلى اشىلعان گۋرەۆ مەديتسينالىق ۋچيليششەسىنىڭ شەۆچەنكو فيليالىنىڭ بازاسىندا 1997 جىلى جەكە مەنشىك مەكەمەسى بولىپ قايتا قۇرىلىپ, 2012 جىلى «مەيىربيكە كوللەدجى» جشس بولىپ تىركەلدى.
مۇندا ساباق قازاق جانە ورىس تىلدەرىندە جۇرگىزىلىپ, 65 وقىتۋشى جۇمىس ىستەيدى. ۇشەۋى مەديتسينا عىلىمدارىنىڭ كانديداتى, سونىڭ ىشىندە 40 مۇعالىم دەنساۋلىق ساقتاۋ سالاسىندا ۇزاق جىلدار قىزمەت ەتكەن ءارى ۇستازدىق تاجىريبەلەرى دە بار. 2011-2014 جىلدار ارالىعىندا «مەيىربيكە» كوللەدجى ءوڭىردىڭ دەنساۋلىق ساقتاۋ مەكەمەلەرى ءۇشىن 1020 مامان دايىنداپ شىعاردى.
ءوز وقۋ عيماراتىن سالۋ ارقىلى كوللەدج ستۋدەنتتەر سانىن كەڭەيتۋگە مۇمكىندىك الدى. عيمارات ساباق وتەتىن سىنىپتار, زەرتحانالار, ءماجىلىس زالى, اكىمشىلىك كەڭسەلەرمەن جابدىقتالعان. جوبا بويىنشا 5 بلوكتان تۇراتىن (10 954.9 ش.م. اۋداندى قۇرايدى) 3-4 قاباتتى ءبىلىم بەرۋ مەكەمەسىن سالۋ ءۇشىن كومپانيا 100 ملن تەڭگەنى «Forte Bank» اق ارقىلى جىلىنا 14%-بەن, 42 اي مەرزىمگە, «بيزنەستىڭ جول كارتاسى-2020» باعدارلاماسى اياسىندا الدى.
«14 پايىزدىڭ 7 پايىزىن كليەنت تولەيدى, ال قالعان 7 پايىزى مەملەكەت ەسەبىنەن قايتارىمسىز نەگىزدە سۋبسيديالانىپ وتەلەدى. سونداي-اق, كەپىلزات كولەمى جەتكىلىكسىز بولعاندىقتان, «دامۋ» قورىنىڭ كەپىلدەندىرۋ قۇرالىن 100 پايىزعا پايدالانا الدى. قارجىلاندىرۋدىڭ نەگىزگى ماقساتى – №5 بلوك بويىنشا قۇرىلىس جۇمىستارىن اياقتاۋ ەدى. وسى قۇرىلىس اياقتالعاننان كەيىن كاسىپكەر جاتاقحانا مەن مۇعالىمدەرگە ارنالعان تۇرعىن ءۇي سالۋعا كىرىسكىسى كەلەدى», – دەدى «دامۋ» قورى» اق ماڭعىستاۋ وبلىسى بويىنشا فيليالىنىڭ مەنەدجەرى اباي مومبەكوۆ.
ونىڭ ايتۋىنشا, بۇل جوبانى قولداۋ 2016-2020 جىلدارعا ارنالعان قازاقستان رەسپۋبليكاسى دەنساۋلىق ساقتاۋ سالاسىن دامىتۋعا ارنالعان «دەنساۋلىق» مەملەكەتتىك باعدارلاماسىنىڭ ورىندالۋى بارىسىنداعى ناقتى قادام بولىپ سانالادى.
گۇلايىم شىنتەمىرقىزى,
«ەگەمەن قازاقستان».
اقتاۋ
