«مەملەكەتتىك اۋديت جانە قارجىلىق باقىلاۋ تۋرالى» قر زاڭى قولدانىسقا ەنگەننەن بەرى ىشكى مەملەكەتتىك اۋديت كوميتەتىنىڭ ورگاندارىندا كومپلاەنس-باقىلاۋ جۇزەگە اسىرىلا باستادى. بيىل باقىلاۋمەن قامتىلعان 1 784 ملن تەڭگەنىڭ ىشىنەن سوماسى 244,1 ملن تەڭگە قۇرايتىن بۇزۋشىلىق تاۋەكەلدەرى راستالعان. وسىعان وراي 15 لاۋازىمدى تۇلعاعا تارتىپتىك جازا قولدانىلدى. ال قۇجاتقا بايلانىستى قاتەلىك جىبەرگەن ەكى لاۋازىمدى تۇلعا 816 مىڭ تەڭگە ايىپپۇل تولەدى.
«سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ دەپارتامەنتىنە جالپى سوماسى 41,0 ملن تەڭگەگە 3 اۋديت ماتەريالى جولداندى. تارتىپتىك جاۋاپكەرشىلىككە 159 لاۋازىمدى تۇلعا تارتىلدى, – دەيدى ە.مارايىموۆ. – مىسالى, «كەڭ جىلىوي» مادەنيەت ءۇيى» 2016 جىلى ۇكىمەت رەزەرۆىنەن «جۇمىسپەن قامتۋ – 2020» جول كارتاسى» باعدارلاماسى بويىنشا بولىنگەن بيۋدجەت قاراجاتىنىڭ پايدالانىلۋىنا جۇرگىزىلگەن اۋديت قورىتىندىسىندا 30,8 ملن تەڭگەنىڭ بۇزۋشىلىقتارى انىقتالعان. قارجىلىق بۇزۋشىلىقتار تولىقتاي قالپىنا كەلتىرىلدى. «كەڭ جىلىوي» مادەنيەت ءۇيىنىڭ» ديرەكتورى 226,9 مىڭ تەڭگە سوماعا اكىمشىلىك جاۋاپكەرشىلىككە تارتىلدى. سونداي-اق, اتىراۋ قالالىق ءبىلىم بولىمىنە جۇرگىزىلگەن اۋديت ءىس-شاراسى قورىتىندىسىمەن جەتكىزىلمەگەن تاۋارعا بيۋدجەتتەن 9,3 ملن تەڭگە نەگىزسىز اۋدارىلعانى بەلگىلى بولدى. اۋديت ماتەريالدارى سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ دەپارتامەنتىنە جولدانعان».
دەپارتامەنت جىل باسىنان بەرى 7437 مەملەكەتتىك ساتىپ الۋ راسىمىنە كامەرالىق باقىلاۋ جۇرگىزدى. قورتىندىسىندا 579 مەملەكەتتىك ساتىپ الۋ بويىنشا سوماسى 10325,4 ملن تەڭگەنىڭ بۇزۋشىلىقتارى انىقتالىپتى. قۇرىلىم باسشىسى مەملەكەتتىك ساتىپ الۋدى جۇزەگە اسىرۋ بارىسىندا ساتىپ الۋ قاتىسۋشىلارىنا زاڭنامادا كوزدەلمەگەن تالاپتاردى بەلگىلەۋ, شارتتى جەڭىلدىكتى قۇقىققا سىيىمسىز قولدانۋ, الەۋەتتى ءونىم بەرۋشىلەردى قۇقىقققا سىيىمسىز قابىلداماۋ جانە نەگىزسىز كونكۋرسقا جىبەرۋ سىندى قاتەلىكتەرگە كوپ جول بەرىلەتىنىن ايتادى. مەملەكەتتىك ساتىپ الۋ ۇيىمداستىرۋشىلارىمەن قۇرمانعازى, يندەر, جىلىوي اۋداندارىنىڭ جالپى ءبىلىم بەرەتىن ورتا مەكتەپتەرىنە ينفورماتيكا, گەوگرافيا, مۋلتيمەديالىق كابينەت جانە باسقا دا كابينەتتەردى ساتىپ الۋدا كونكۋرستىق قۇجاتتامانى جاساقتاۋ بارىسىندا زاڭ نورمالارى ساقتالماعان. باقىلاۋ قورىتىندىسىمەن 23 مەملەكەتتىك ساتىپ الۋدىڭ كۇشى جويىلدى. مەملەكەتتىك ساتىپ الۋدى ۇيىمداستىرۋشى, «جىلىوي اۋداندىق تۇرعىن ءۇي كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمى» مم مايكومگەن, شوقپارتوعاي, تۇرعىزبا, قوسشاعىل اۋىلدارىنىڭ ىشكى جولدارىن جاڭعىرتۋ بويىنشا جوبالاۋ-سمەتالىق قۇجاتتامانى جاساقتاۋدا زاڭنىڭ 9-تارماعىن بۇزىپ, كونكۋرستىق قۇجاتتامادا جوبالاۋ قىزمەتىن اتقارۋعا الەۋەتتى ءونىم بەرۋشىنىڭ ليتسەنزياسى بولۋى تۋرالى تالاپ قويىلماعان, سونداي-اق جوبالاۋ-سمەتالىق قۇجاتتاما جاساقتاۋ جۇمىسىنا دەمپينگتىك باعا قارالماعان. بۇل ساتىپ الۋدىڭ دا كۇشى جويىلدى.
«كونكۋرستىق وتىنىمدەردى قاراۋ كەزىندە الەۋەتتى ءونىم بەرۋشىلەردى نەگىزسىز كونكۋرسقا قاتىسۋعا جىبەرۋ دەرەكتەرى دە كەزدەسەدى. ايتالىق, ساتىپ الۋ ۇيىمداستىرۋشىسى, «جىلىوي اۋداندىق قۇرىلىس, ساۋلەت جانە قالا قۇرىلىسى ءبولىمى» مم №1305312-1 «جىلىوي اۋدانى قۇلسارى قالاسىندا كوشە بەينەباقىلاۋى جانە باعدارشام ورناتۋعا جوبالاۋ-سمەتالىق قۇجاتتاما جاساقتاۋ» ساتىپ الۋدى جۇزەگە اسىرۋ كەزىندە زاڭ نورمالارى مەن ەرەجە تالاپتارى بۇزىلىپ, الەۋەتتى ءونىم بەرۋشىنىڭ بىلىكتىلىك تالاپتارىنا جانە كونكۋرستىق قۇجاتتاما تالاپتارىنا ساي كەلمەيتىن كونكۋرستىق ءوتىنىمىن كونكۋرسقا قاتىسۋعا جىبەرگەن. «قۇلسارى قالاسى ىشكى ىستەر ءبولىمىنىڭ جەدەل باسقارۋ ورتالىعى اكىمشىلىك عيماراتىنىنىڭ قۇرىلىسىنا تەحنيكالىق قاداعالاۋ قىزمەتى» كونكۋرسى بويىنشا كوميسسيا بىلىكتىلىك تالاپتارىنا ساي كەلمەيتىن «كۇرىلىس ينجينيرينگ اقتوبە» جشس-نىڭ ءوتىنىمى نەگىزسىز كونكۋرس جەڭىمپازى بولىپ تانىلعان» – دەيدى ىشكى مەملەكەتتىك اۋديت دەپارتامەنتى باسشىسى.
ەكونوميكالىق قۇقىق بۇزۋشىلىقتاردىڭ الدىن الۋ باعىتىندا دەپارتامەنت بارلىق اۋدانداردا مەملەكەتتىك ساتىپ الۋ ماسەلەلەرى بويىنشا تەحنيكالىق وقۋلار وتكىزۋدى جولعا قويعان. بۇل – اتالعان سالاداعى پروبلەمالاردىڭ الدىن الۋعا باعىتتالعان قادامنىڭ ءبىرى.
باقىتگۇل باباش,
«ەگەمەن قازاقستان».
اتىراۋ.
