پولشا ەلشىسىمەن كەزدەستى

ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى ءۋاليحان قاليجانوۆ پولشا رەسپۋب­لي­كا­سىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ياتسەك كليۋچكوۆسكيمەن كەزدەستى, دەپ حابارلادى وسى پالاتانىڭ ءباسپاسوز قىزمەتى. دەپۋتات ەلشىمەن ەكەۋىنىڭ ارىپتەس ەكەندىگىن ايتىپ, كەزىندە «ەگەمەن قازاقستان» گازەتىندە باس رەداكتور بولىپ جۇرگەنىندە پولشادا بولىپ, پرەزيدەنت كۆاسنەۆسكيدەن سۇحبات الۋ مۇمكىندىگىنە يە بولعانىن ەسكە الدى. ەندى ەلشى بولىپ كەلگەن ارىپتەسىنىڭ ەكى ەل اراسىنداعى ىنتىماقتاستىققا جاڭا سەرپىن بەرەتىنىنە سەنىم ءبىلدىردى. ەلشى ءوز كەزەگىندە ءوزىنىڭ پارلامەنتتىك ءىس-تاجىريبەسى بارىن, بىرنەشە جىل پولشانىڭ پارلامەنتىندە اپپارات باسقار­عا­نىن, ەندىگى نەگىزگى جۇمىسى پول­شا مەن قازاقستان اراسىن­داعى بايلانىستاردى جان­دان­دىرۋ دەپ بىلەتىنىن مالىمدەدى. بۇگىنگە دەيىنگى ەكونوميكالىق قارىم-قاتىناستاردىڭ وركەن­دەپ, وتكەن جىلعى ەكى ەل ارا­سىن­داعى تاۋار اينالىمى 1 ميلليارد 600 ميلليون اقش دول­لارى­نا جەتىپ وتىرعانىن حا­بارلادى. كەزدەسۋدە ەۋروپالىق وداق پەن قازاقستان اراسىنداعى قا­رىم-قاتىناستى ورنىقتىرۋعا بايلانىستى «ەۋروپاعا جول» باعدارلاماسىن جۇزەگە اسىرۋ مەن ەقىۇ-عا توراعالىق كەزىندە دە پولشانىڭ قازاقستاندىق ساياساتتى قولداعانى ايتىلدى. سونداي-اق, جۇزدەسۋدە 9 قازاندا وتەتىن پولشاداعى پارلامەنتتىك سايلاۋدى ويداعىداي وتكىزۋ جايىندا دا اڭگىمە بولدى.