19 مىڭ-اق شاقىرىمعا قاتەلەسىپتى
رەگبيدەن جاڭا زەلانديادا ءوتىپ جاتقان الەم چەمپيوناتىنا اتتانعان وڭتۇستىكافريكالىق ەرلى-زايىپتى ادەندورففتار الدىن الا برونداپ قويعان قوناق ۇيلەرىنەن 19 مىڭ شاقىرىم قاشىقتىقتاعى جەردەن ءبىر-اق شىقتى. ءسويتسە, تۋريستەر قاتەلەسىپ, قوناق ءۇي ءنومىرىن جاڭا زەلاندياداعى يستبورننان ەمەس, اعىلشىننىڭ وسى اتتاس ەلدى-مەكەنىندەگى وتەلدەن برونداپتى.
وڭتۇستىكافريكالىقتاردىڭ سوزدەرىنە قاراعاندا, ولار ەكى يستبورندى شاتاستىرىپ الدىق دەپ ەش ويلاماپتى. ال قاتەلەسكەندەرى قالاداعى وتەلدى ءارى ىزدەپ, بەرى ىزدەپ ەش تابا الماعان كەزدە بەلگىلى بولعان. انگلياداعى قوناق ۇيگە قاتىستى ايتاتىن بولساق, ونداعىلار ەرلى-زايىپتىلاردىڭ بانكتەگى ەسەپ-شوتىنان ءتيىستى اقشانى الىپ ۇلگەرىپتى.
زەينەتكەرلەر ءپۋتيندى مونشاعا شاقىردى
پريمورەلىك ۇلى وتان سوعىسىنا قاتىسۋشى ارداگەرلەر مەن زەينەتكەرلەر رەسەي پرەمەر-ءمينيسترى ۆلاديمير ءپۋتيندى مونشاعا شاقىرىپ وتىر. زەينەت جاسىنداعىلار ۇكىمەت باسشىسىنا ءتيىستى ءوتىنىش جازىلعان حات جولداپتى. «ءبىزدىڭ سىزبەن تىكەلەي تانىسىپ, اۋىزبا-اۋىز ءسويلەسكىمىز كەلەدى. ءسىزدى وسى ماقساتتا شىن كوڭىلدەن مونشاعا شاقىرامىز», دەپتى ولار.
زەينەتكەرلەردىڭ ايتۋىنشا, مونشادا بۋلانىپ قانا قويماي, ادەمى اڭگىمە-دۇكەن قۇرۋعا دا بولادى. مونشانى پريمورە ولكەسى پارلامەنتىنىڭ بۇرىنعى دەپۋتاتى ادام يماداەۆ تۇرعىزىپتى. وعان ارداگەرلەر مەن زەينەتكەرلەر تەگىن تۇسەدى ەكەن. وسى سەبەپتى دە مونشا ولاردىڭ ۋاقىتتارىن «مازمۇندى» وتكىزەتىن سۇيىكتى ورىندارىنا اينالعان سىڭايلى.
بۇزاقىنى ايەل مەن بالا الماستىردى
تۇركيانىڭ فۋتبول قاۋىمداستىعى جەرگىلىكتى كوماندالار جانكۇيەرلەرى اراسىندا ورىن الاتىن تارتىپسىزدىكتەرگە بايلانىستى بىرجاقتى شەشىم قابىلداعان ەدى. ەندى ەر ادامدارعا بەلگىلى ءبىر ۋاقىتقا دەيىن سۇيىكتى كلۋبىنىڭ ويىنىن تاماشالاۋعا مۇمكىندىك جوق. ەسەسىنە ايەلدەر مەن 12 جاسقا دەيىنگى بالالار كەزدەسۋلەردى تەگىن تاماشالاي الادى.
تۇركيا چەمپيوناتى سوڭعى تۋرىنىڭ ويىندارى تۇڭعىش رەت وسىنداي سحەما بويىنشا ءوتتى. ماسەلەن, ىستامبۇلداعى جەرگىلىكتى «فەنەرباحچە» كومانداسىنىڭ «مانيساسپور» كلۋبىمەن كەزدەسۋىن تاماشالاۋعا 41 مىڭنان استام ايەل مەن جاسوسپىرىم جينالعان. ستاديونعا كەلگەندەردى ونىڭ الدىندا ايەل پوليتسەيلەر قۇرمەتپەن قارسى السا, ال ستاديوننىڭ ىشىندە نازىك جاندى جانكۇيەرلەرگە فۋتبولشىلار گۇل شوقتارىن لاقتىرىپ قۇرمەت كورسەتكەن.
الەمدەگى ەڭ قۇرمەتتى ازامات كىم؟
نەلسون ماندەلا پلانەتامىزداعى ەڭ قۇرمەتتى ازامات بولىپ تانىلدى. امەريكانىڭ Repulation Institute زەرتتەۋلەر ينستيتۋتى الەمنىڭ 25 ەلىندە جۇرگىزگەن سۇراۋ سالۋلار ناتيجەسى وسىلاي دەيدى. ساۋالداماعا 50 مىڭنان استام ادام قاتىسسا, سولاردىڭ 78,5 پايىزى ءوز داۋىستارىن وڭتۇستىك افريكا رەسپۋبليكاسىنىڭ تۇڭعىش قارا ءناسىلدى پرەزيدەنتىنە بەرگەن.
ەكىنشى ورىندا اتاقتى شۆەيتساريالىق تەننيسشى رودجەر فەدەرەر تۇر. ول ءوزىنىڭ سپورتتاعى تابىستارىمەن قاتار, قايىرىمدىلىق قىزمەتىمەن دە بەلگىلى. تىزىمدە ءۇشىنشى ورىنعا امەريكالىق ميللياردەر بيلل گەيتس لايىق دەپ تابىلىپتى. تىزىمنەن ورىن تيگەندەر قاتارىندا سونداي-اق باراك وباما (14 ورىن), بريتانيا پرەمەرى دەۆيد كەمەرون (34 ورىن), دميتري مەدۆەدەۆ (43 ورىن) پەن ۆلاديمير پۋتين (44 ورىن) بار.
سوزجۇمباقتىڭ كومەگىمەن ءسوز سالعان
اقش-تىڭ ۆيردجينيا شتاتىنداعى الەكساندريا قالاسىندا تۇراتىن نيۋمان ەسىمدى جىگىت ءوزىنىڭ ۇناتقان قىزىنا سوزجۇمباق ارقىلى ءسوز سالۋ ءۇشىن ونى تۇزەتىن ماماندارعا ارنايى تاپسىرىس بەرىپتى. سەزىمىڭدى تىكەلەي ءوزىڭ نەگە جەتكىزبەيسىڭ دەپ سۇراعاندا, ۇيالاتىنىن جانە باتىلى جەتپەيتىنىن مالىمدەگەن.
نيۋماننىڭ ۇناتقان قىزى مارلوۋ ەپشتەين ءسوزجۇمباق شەشكەندى جاقسى كورەدى ەكەن. ول سۇيىكتى گازەتىندەگى سوزجۇمباقتى شەشىپ وتىرىپ, ءسوزدىڭ وزىنە ارنالعانىن بىردەن ۇققان جانە ءوزىنىڭ دە جىگىتتىڭ ۇسىنىسىنا كەتارى ەمەس ەكەنىن ەمەۋرىنىمەن بىلدىرگەن. ءسويتىپ, كوپ ۇزاماي نيۋمان قالىڭدىعىنا نەكە ساقيناسىن اپارىپ سىيلاپتى. تاياۋ بولاشاقتا ەكى جاس نەكەلەسۋ ءراسىمىن وتكىزبەكشى كورىنەدى.
اقپارات اگەنتتىكتەرى ماتەريالدارى نەگىزىندە ازىرلەندى.
