قازاقستان رەسپۋبليكاسىنىڭ ۇلتتىق بانكى 2016 جىلعى 1 جەلتوقساننان باستاپ ەل تاۋەلسىزدىگىنىڭ 25 جىلدىعىنا ارنالعان, نومينالدىق قۇنى 10 000 تەڭگەلىك مەرەيتويلىق بانكنوتتى اينالىمعا شىعارادى, دەپ حابارلادى بانكتىڭ ءباسپاسوز قىزمەتى.
مەملەكەت باسشىسىنىڭ سۋرەتى بەينەلەنگەن كۋپيۋرا تاۋەلسىزدىكتىڭ 25 جىلدىعىنا ارنالعان. بانكنوتتىڭ ديزاينى اينالىستاعى اقشا بەلگىلەرىمەن بىرىڭعاي ستيلدە ورىندالعان: بەت جاعىندا بەينەلەر باسىم تۇردە تىگىنەن, سىرت جاعىندا كولدەنەڭىنەن ورنالاسقان. بانكنوتتىڭ باسىم ءتۇسى – كوكشىل كۇلگىن.
بانكنوتتىڭ بەت جاعىنداعى نەگىزگى بەينەلەر: «قازاق ەلى» مونۋمەنتى, ەسىك قورعانىنان تابىلعان «التىن ادامنىڭ» باس كيىمىنىڭ ءبىر بولىگى – «ءومىر اعاشى». گولوگرافيالىق مەتالل جولاقتا استانانىڭ كورىنىسى, قازاقستان رەسپۋبليكاسى تۇڭعىش پرەزيدەنتىنىڭ فاكسيميلەسى جانە كۇننىڭ ستيلدەندىرىلگەن بەينەسى ورنالاسقان. قازاقستان كارتاسىنىڭ بەينەسى كولبەۋ بۇرىشىن وزگەرتكەن كەزدە ءتۇسىن وزگەرتەتىن قورعانىش ەلەمەنتىن بىلدىرەدى. كارتانىڭ بەتىندە «ماڭگىلىك ەل» دەگەن جازبا بار. سونىمەن قاتار, ىلە الاتاۋىنداعى تاۋ تىزبەگى بەينەلەنگەن.
سول جاعىندا ورتاسىندا نومينالدىڭ تسيفرلىق بەينەلەنۋى باسىلعان. جوعارعى وڭ جاق بۇرىشىندا شىعارۋشى بانك – «قازاقستان ۇلتتىق بانكى», سونداي-اق قولدان جاساعانى ءۇشىن جاۋاپكەرشىلىك تۋرالى ەسكەرتەتىن «بانكنوتتاردى قولدان جاساۋ زاڭمەن قۋدالانادى» دەگەن جازبا بار.
بانكنوتتىڭ سىرت جاعىندا نەگىزگى بەينە – قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ پورترەتى. پورترەت قاعازدىڭ بەتىندە بەدەرلىكتى قامتاماسىز ەتەتىن جانە ۇستاعان كەزدە سەزىلەتىن ينتاگليو (تەرەڭ باسۋ) ادىسىمەن ورىندالعان. الەمدىك تاجىريبەدە بۇل ءادىس بانكنوتتارداعى پورترەتتەردى ورىنداعان كەزدە ءداستۇرلى ءادىس بولىپ ەسەپتەلەدى.
ارتقى كورىنىستە قازاقستان كارتاسى بەينەسىنىڭ اياسىندا «بايتەرەك» مونۋمەنتىن قوسا العاندا, استانا قالاسىنداعى بىرنەشە عيمارات بەينەلەنگەن. قىزعىلت سارى قورعانىش ۇزىك-ۇزىك ءجىپ بانكنوتتىڭ كولبەۋ بۇرىشىنا وراي ءتۇسىن وزگەرتەدى. «پوددەلكا بانكنوت پرەسلەدۋەتسيا پو زاكونۋ» دەگەن جازبا بانكنوتتىڭ سول جاقتاعى تومەن بۇرىشىندا ورنالاسقان.
باسقا اقشا بەلگىلەرىمەن قاتار, بۇل بانكنوت اينالىسقا شىعارىلعان ساتتەن باستاپ زاڭدى تولەم قۇرالى بولىپ ەسەپتەلەدى, سونداي-اق بارلىق تولەمدەر مەن اقشا اۋدارىمدارىندا قابىلدانۋعا مىندەتتى. تارالىمى – 100 000 دانا.
ايتا كەتەيىك, 15 قاراشادا نازارباەۆ بەينەلەنگەن جاڭا كۋپيۋرا تانىستىرىلعان بولاتىن. ول بانكنوتپەن ساۋدا جاساۋعا دا بولادى.
