الداعى ءۇش كۇندە رەسپۋبليكانىڭ كەي وڭىرىندە قار جاۋادى

وسى اپتانىڭ 1-3 جەلتوقسان كۇندەرى ارالىعىندا ەلىمىزدىڭ كەيبىر وڭىرلەرىندە قار جاۋادى, دەپ حابارلايدى «قازگيدرومەت» رمك. «قازاقستان اۋماعىندا كۇردەلى مەتەورولوگيالىق جاعداي كۇتىلۋدە. الداعى ءۇش تاۋلىكتە اۋا رايىن الدىمەن سۋىق اتموسفەرالىق فرونت, سودان كەيىن وڭتۇستىك تسيكلون انىقتايتىن بولادى. رەسپۋبليكانىڭ سولتۇستىگى مەن شىعىسىندا بۇرقاسىندى قار جاۋىپ, كۇشتى باتىس جەلى سوعادى. ەلىمىزدىڭ باتىسى مەن ورتالىعىنا, سونداي-اق, كەي جەرلەرگە قار جاۋادى», – دەيدى سينوپتيكتەر. سونىمەن قاتار, ولار اتالعان وڭىرلەردى كۇندىزگى تەمپەراتۋرا مينۋس 3 - پليۋس 3ºس بولىپ, كوكتايعاق كۇتىلەتىنىن ايتۋدا. قازاقستاننىڭ وڭتۇستىگىندە 2 جەلتوقساندا كۇندىز, 3 جەلتوقساندا وڭتۇستىك-شىعىسىندا تەمپەراتۋرا پليۋس 2...پليۋس 10ºس دەيىن كوتەرىلىپ, جاۋىن-شاشىن تۇسەدى, باسىمىراق جاڭبىر جاۋىپ, اياعى سۋلى قارعا ۇلاسادى. سونداي-اق, ەكپىندى وڭتۇستىك-باتىس جەلى دە كۇتىلۋدە. سوندىقتان دا سينوپتيكتەر جولداردا, اسىرەسە قالا سىرتىندا وتە اباي بولۋدى ەسكەرتەدى.