مەملەكەتتىك ءتىل مەرەيلەنە ءتۇستى

قوستانايدا «25 جۇلدىزدى كۇن» اكتسياسى شەڭبەرىندە «مەملەكەتتىك ءتىل –قوعام بىرلىگىنىڭ جانە مەملەكەتتىلىكتى بىرىكتىرۋدىڭ باس­تى فاكتورى» اتتى دوڭگەلەك ۇستەل ءماجىلىسى ءوتتى. وندا وبلىستىق تىلدەردى دامىتۋ باسقارماسىنىڭ باسشىسى جانبولات ۇمبەتوۆ سويلەپ, ءبىر كەزدەرى وڭىردە تابالدىرىقتان قاراپ قالعان انا ءتىلىمىزدىڭ بۇگىندە قايتا وركەندەۋى تاۋەلسىزدىكتىڭ ارقاسى ەكەنىن ايتتى. ەڭ الدىمەن قازاق ءتىلى مەملەكەتتىك تىلگە اينالدى. وبلىس وڭىرىندەگى اۋدان, قالالاردىڭ بارلىعىندا قازاق تىلىندە ءبىلىم بەرەتىن مەكتەپتەر جۇمىس ىستەيدى. ءبىر رۋدنىيدىڭ وزىندە ءۇش قازاق مەكتەبى بار. وبلىستا مەملەكەتتىك ءتىل­دىڭ ءورىس­تەۋى ءۇشىن ءتىل ۇيرەنۋ ور­­تالىقتارى اشىلعان. ونداي ور­تالىقتاردىڭ سانى بۇگىندە 18-گە جەتكەن. وندا قازاق تىلىمەن قاتار اعىلشىن ءتىلى, ۇلتتىق-مادەني ورتالىقتاردىڭ تىلەگىمەن نەمىس, ۋكراين, كورەي, تاتار, ازەربايجان تىلدەرى وقىتىلادى. وبلىس وڭىرىندە مەملەكەتتىك ءتىلدى ۇيرەنۋگە جاستاردىڭ ىقى­لاسى دا, بەلسەندىلىگى دە جو­عارى. «اباي وقۋلارى», و.بوكەي اتىنداعى مانەر­لەپ وقۋ باي­قاۋلارىنىڭ وبلىستىق, رەسپۋب­ليكالىق دەڭگەيلەرىنە وبلىس­تان قاتىسىپ, جۇلدە الىپ جۇرگەن وزگە ۇلت وكىلدەرى كوبەيىپ كە­لەدى. «ءتىل دارىن» كلۋبىنىڭ بەل­سەندىلەرى دە نەگىزىنەن قازاق ءتىلىن ۇيرەنىپ العان, مەملەكەتتىك تىلدە سويلەيتىن وزگە ۇلت جاستارىنان تۇرادى. – مەنىڭ قازاق ءتىلىن مەڭگەرۋىمە اتا-انامنىڭ ەڭبەگى زور. ەلباسى قازاقستاننىڭ بولاشاعى قازاق ءتىلىن­دە ەكەنىن ايتىپ كەلەدى. مەنى وقۋعا قازاق مەكتەبىنە بەر­گەنى ءۇشىن اتا-اناما العىسىم شەكسىز, – دەدى تازا قازاق تىلىندە سويلە­گەن ا.باي­تۇرسىنوۆ اتىنداعى ۋنيۆەر­سيتەتتىڭ ستۋدەنتى ولگا تيحوۆا. ءبىر قىزىعى, وبلىستىڭ جەرگىلىكتى ۇلت سانى از فەدوروۆ, جىتىقارا, ۇزىنكول سەكىلدى اۋداندارىندا جاستاردىڭ مەملەكەتتىك ءتىلدى ۇيرەنۋگە دەگەن قۇشتارلىعى جاقسى. دميتري روماشەنكو وسكەن فەدوروۆ اۋدانىندا قازاق­تاردىڭ سانى 18 پايىز عا­نا. تالاپتى جاس قازاق ءتىلىن ءوز بەتىمەن ۇيرەنىپ, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ قازاق فيلولوگياسى ماماندىعىن ءتامامداپ, قازىر ءوزىنىڭ تۋعان جەرىندەگى قازاق مەكتەبىندە ۇستازدىق ەتەدى. مۇنداي مىسالدار جەتكىلىكتى. وبلىستا جاستاردىڭ قازاق تىلىندە ونەر كورسەتەتىن كۆن كومان­دالا­رىنىڭ سانى جۇزگە جەتىپ جى­عىلادى ەكەن. جاستاردىڭ تىلگە دەگەن ىقى­لاسى مەن جۇمىسىنان مەم­لە­كەتتىك ءتىل مەرەيلەنە تۇسكەندەي جانە ونىڭ جارقىن بولاشاعى دا كورىنگەندەي بولادى. ءنازيرا جارىمبەتوۆا, «ەگەمەن قازاقستان» قوستاناي