كوشە اتاۋلارى اۋىستىرىلا باستادى

«ەگەمەن قازاقستان» گازەتىنىڭ 3 قاراشاداعى سانىندا «سولتۇستىك سوتسياليزممەن نەگە قوشتاسپايدى؟» اتتى ماقالا جارىق كورىپ, ءوڭىردىڭ وتارشىلدىق رەسەيدى, كەڭەستىك زاماننىڭ توتاليتارلىق بەلگىلەرىن ەسكە تۇسىرەتىن اتاۋلاردان ءالى ارىلماي وتىرعانى سىنعا الىنعان بولاتىن. گازەتتىڭ ۇسىنىستارىن جەرگى­لىكتى بيلىك ەسكەرگەن بولۋ كەرەك, جۋىردا پەتروپاۆل قالالىق ءماسلي­حاتىنىڭ تۇراقتى كوميسسياسى قوعامدىق تىڭدالىم وتكىزىپ, ءبىر­قاتار كوشەلەردىڭ اتىن اۋىستىرۋ, جاڭا ەسىمدەر بەرۋ ماسەلەسىن تالقى­لادى. سولنەچنىي شاعىن اۋدانىندا بوي كوتەرگەن كوشەلەرگە عا­لىم مالدىباەۆ, ەسلام زىكى­­باەۆ سياقتى بەلگىلى اقىن جەرلەستەرىمىزدىڭ ەسىمدەرىن بەرۋ جونىندەگى ۇسىنىس ءبىراۋىزدان قولداۋ تاپتى. قاۋىپتى قىل­مىس­كەردى ۇستاۋ كەزىندە ەرلىك­پەن قازا تاپقان پوليتسيا مايورى الەك­سەي ششەرباكوۆتىڭ دا ەسىمى ۇمى­تىلمايتىن بولدى. – جاريا تىڭداۋعا دەيىن كوشە اتاۋلارىنىڭ تاريحى جان-جاقتى زەرتتەلىپ, تۇرعىنداردىڭ وي-پىكىر­­لەرى جەتە ەسكەرىلدى. الداعى ۋاقىتتا دا تاۋەلسىزدىگىمىزبەن ءۇش قايناسى سورپاسى قوسىلمايتىن جەر-سۋ اتاۋلارى وزگەرتىلەتىن بولادى. ساككو جانە ۆانتسەتتي, كلارا تسەتكين, ۆولودارسكي, ءحالتۋريننىڭ وڭىرىمىزگە قانداي قاتىسى بار؟ – دەدى جايشىلىقتا بۇيرەكتەن سيراق شىعارۋعا بەيىم قالالىق ءماسليحاتتىڭ دەپۋتاتى پاۆەل افاناسەۆ بۇل جولى ەرەكشە بەلسەندىلىك تانىتىپ. وڭىرىمىزگە مۇلدەم قاتىسى جوق, بولماسا ەشقانداي ءمان-ما­عى­ناعا يە ەمەس اتاۋلاردان كوز ءسۇرى­نەتىنى راس. ماسەلەن, وبلىس ور­تا­لىعىندا ءبىر سەننايا اتاۋىندا – 6, كيرپيچنايا دەپ اتالاتىن 4 كوشە بار. جيىندا بەسىنشى سەننايا كوشەسىن اتاقتى سپورتشى قازبەك بايبولوۆتىڭ, ياۆلەنكا تاسجولىنا قوجابەرگەن جىراۋدىڭ ەسىمىن بەرۋ تۋرالى شەشىم ەش قار­سىلىقسىز قابىلداندى. تىڭ­دالىمعا قاتىسۋ­شىلاردىڭ ءبىرى جادىرا قاراعوجينا الاش كوسەمى ءاليحان بوكەيحانوۆتى دا ۇلىقتاۋ ماسەلەسىن قوزعادى. ارينە, كوشە اتاۋلارىن ءبىر مەزەتتە قالىپقا كەلتىرۋ مۇمكىن ەمەس. دەسەك تە, اتاۋلاردى جاڭارتۋ قاجەت­تىگىن حالىق قالاۋلىلارى تۇسىنگەن سىڭايلى. ءومىر ەسقالي, «ەگەمەن قازاقستان» سولتۇستىك قازاقستان وبلىسى