اقتوبەدە تەراكت ۇيىمداستىرعاندارعا سوت ۇكىمى شىعارىلدى

بۇگىن اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا وسى جىلدىڭ 5 ماۋسىمىنداعى تەراكت بويىنشا ايىپتىلارعا ۇكىم شىعارىلدى. ۇكىم بويىنشا 7 ادام ءومىر بويى باس بوستاندىعىنان ايىرىلىپ, ەرەكشە رەجىمدە جازاسىن وتەيدى. بۇدان بولەك, سوت نەگىزگى ايىپتالۋشىلار جۇبانوۆ ايدوس پەن ابدراحمانوۆ ازاماتتى 22 جانە 20 جىلعا ەرەكشە رەجىمدە وتەۋگە كەستى. قولعا تۇسكەن 29 كۇدىكتىنىڭ ىشىندە 9-ى – باستى ايىپتالۋشىلار. ولارعا بىرقاتار قىلمىستار بويىنشا, ونىڭ ىشىندە تەراكت جاسادى دەگەن ايىپ تاعىلىپ وتىر. قىلمىسكەرلەردىڭ مۇلكى تاركىلەنىپ, جازاسىن ەرەكشە رەجىمدە وتەيدى. قالعان 18-نە قىلمىس تۋرالى قۇزىرلى ورگاندارعا حابارلاماۋ (قر قك 434 بابى), 2-ەۋىنە قىلمىستى جاسىرۋ ارەكەتتەرى (قر قك 432 بابى) بويىنشا ايىپ تاعىلدى. سونىمەن قاتار, اقتوبەدە 2016 جىلدىڭ 5 ماۋسىمى كۇنى بولعان تەرروريستىك اكتىگە قاتىسقان ابدراحمانوۆ پەن وزگە دە ازاماتتاردىڭ قىلمىستىق ىستەرى بويىنشا, سوت 21 قاراشا كۇنى ايىپتالۋشىلاردىڭ سوڭعى سوزدەرىن ەستىدى. بىرقاتار قىلمىستار جاساعان, سونىڭ ىشىندە تەرروريستىك اكت ۇيىمداستىردى دەپ سوتتالعاندار مەن ايىپ تاعىلعان ازاماتتار ىستەگەن ارەكەتتەرىنە وكىنەتىندەرىن ايتىپ, سوت وكىلدەرىنە ءومىر بويىنا قاماۋعا الۋ تۋرالى ۇكىم شىعارماۋ جونىندە ءوتىنىش جاساعان. ايتا كەتەيىك, لاڭكەستەر «پاللادا» جانە «پانتەرا» قارۋ-جاراق دۇكەندەرى مەن №6655 اسكەري بولىمىنە شابۋىل جاسادى. سالدارىنان 8 ادام قازا تاپتى. ولاردىڭ 3-ەۋى – اسكەري قىزمەتكەر.