«استانا» ۆەلوكومانداسى فرۋمعا قارسى فۋلسانگتى دايىنداۋدا

«استانا» ۆەلوكومانداسىنىڭ ساپىندا ونەر كورسەتىپ جۇرگەن دانيالىق ياكوب فۋلسانگ تۋر دە فرانستا ءوزىن كوماندا كاپيتانى رەتىندە سىناپ كورۋى ابدەن مۇمكىن. بۇل تۋرالى سپورتشى La Gazzetta dello Sport باسىلىمىنا بەرگەن سۇحباتىندا جاريا ەتتى. كوپتەگەن ۆەلوسپورت ماماندارىنىڭ پايىمداۋىنشا 31 جاسار ياكوبتىڭ سوڭعى جىلدارداعى جيناعان تاجىريبەسى وتە مول, ول گراند تۋرلاردىڭ بىرىندە «استانا» ليدەرى رەتىندە شىعۋعا تولىقتاي دايىن. ياكوبتىڭ ءوزى بۇل تۋرالى بىلاي دەيدى. «مەن بۇرىن ءوزىمنىڭ كۇشىمە سەنە المايتىن ەدىم. بىراق ريو وليمپياداسىنىڭ كۇمىس جۇلدەگەرى اتانعاننان كەيىن, بارلىعى وزگەردى. بۇل ناتيجە مەن ءۇشىن وتە ماڭىزدى. وسىنداي كورسەتكىشتەر مەنىڭ ۇلكەن جەڭىستەرگە لايىقتى ەكەندىگىمدى دالەلدەيدى. ارينە, كەلەسى جىلى باستى ويىم تۋر دە فرانس. مەن 2013 جىلى سول سايىستى جالپى ەسەپتە جەتىنشى ورىنمەن اياقتاعان ەدىم. قازىر ءوزىم دە, تاجىريبەم دە ءوستى. سوندىقتان بۇدان دا جاقسى ناتيجە كورسەتە الامىن دەپ ويلايمىن. جانە دە كوماندانىڭ ماعان دەگەن سەنىمىن اقتاۋ قاجەت» دەدى دانيالىق ۆەلوشاباندوز. سونىمەن قاتار, ۆينچەنتسو ءنيباليدىڭ كەلەسى ماۋسىمدا بولمايتىنى كومانداعا وڭ اسەرىن تيگىزەدى دەگەن ويىن جەتكىزدى. ياكوبتىڭ ايتۋى بويىنشا, ءنيباليدىڭ كەتۋى «Astana Pro team» ساپىنداعى باسقا ۆەلوسپورتشىلارعا ءوز شەبەرلىكتەرىن تولىقتاي اشۋعا مۇمكىندىك بەرەدى. وسىعان دەيىن «Astana Pro team» كومانداسىنىڭ باسشىلىعى دجيرو دە يتاليا مەن يسپانيا ۆۋەلتاسىندا فابيو ارۋ, ال تۋر دە فرانستا ياكوب فۋلسانگ پەن كولۋمبيالىق ميگەل انحەل لوپەس كوماندا كاپيتاندارى بولاتىندىعىن مالىمدەگەن. بي-بولات سەيتاق