قازاقستان مەن قىتاي ۋنيۆەرسيتەتتەرى ستۋدەنت الماسۋعا كەلىستى

بۇگىن ەلىمىزدىڭ اگروتەحنيكالىق ۋنيۆەرسيتەتتەرىنىڭ جەتەكشىلەرى مەن اۋىل شارۋاشىلىعى ماماندارىنىڭ قىتاي حالىق رەسپۋبليكاسىنا ارنايى ساپارى اياسىندا جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى مەن سولتۇستىك باتىس اۋىل شارۋاشىلىق, ورمان شارۋاشىلىق عىلىم-تەحنيكا ۋنيۆەرسيتەتىنىڭ اراسىندا ءوزارا كەلىسىم تۋرالى مەموراندۋم جاساستى. بۇل تۋرالى اۋىل شارۋاشىلىعى مينيسترلىگىنىڭ ءباسپاسوز قىزمەتى حابارلادى. مەموراندۋمنىڭ باستى ماقساتى – عىلىمي-زەرتتەۋ جانە ءبىلىم بەرۋ سالاسىنداعى تاراپتاردىڭ كەزەڭدىك جانە جۇيەلى تۇردە تاجىريبە الماسۋىنا جانە ىنتىماقتاستىققا جاردەمدەسۋ. ونىڭ اياسىندا, پروفەسسورلىق-وقىتۋشىلار قۇرامى, دوكتارانتتار, ماگيسترانتتار مەن ستۋدەنتتەردىڭ اكادەميالىق ۇتقىرلىعىن دامىتۋ, ىزدەنۋشىلەرگە عىلىمي, پەداگوگيكالىق جانە زەرتتەۋ تاعىلىمدامالارىنان وتۋگە جاردەمدەسۋ, الماسۋ بارىسىندا ستۋدەنتتەردىڭ وقۋ ۇردىسىندە العان كرەديتتەرىن ەكىجاقتى تانۋ, ءوزارا مۇمكىن بولاتىن ءبىلىم بەرۋ باعدارلامالارىن جانە ەكى ديپلومدى ءبىلىم بەرۋدى دامىتۋ ءۇشىن ۋنيۆەرسيتەتتەردىڭ عىلىمي جانە ءبىلىم بەرۋ مۇمكىنشىلىكتەرىن پايدالانۋ سەكىلدى ت.ب. مىندەتتەر قاراستىرىلعان. بۇدان بولەك, ءبىلىم بەرۋ مەن عىلىمنىڭ وزەكتى ماسەلەلەرى بويىنشا بىرلەسكەن سيمپوزيۋمدار, حالىقارالىق عىلىمي-پراكتيكالىق كونفەرەنتسيالار مەن سەمينارلار ۇيىمداستىرۋ, ورتاق عىلىمي-زەرتتەۋ باعدارلامالارى مەن جوبالاردى قولعا الۋ جوسپارلانۋدا.