كەشە جاپون سۋرەتشىسى توموكو حوۋكيونىڭ اتىراۋداعى Renaissance قوناقۇيىندە جەكە كورمەسى اشىلدى. ول بۇدان ەكى جىل بۇرىن استاناداعى قازاقستان رەسپۋبليكاسىنىڭ تۇڭعىش پرەزيدەنتى مۋزەيىندە «جاپون سۇلۋلىق الەمى» اتتى العاشقى سۋرەت كورمەسىن وتكىزگەن.
سۋرەتشى سوڭعى ءۇش جىلدان بەرى اتىراۋ قالاسىندا تۇرادى. ءوزىنىڭ تۋىندىلارىن جاپوننىڭ كلاسسيكالىق كەسكىندەمە جانرىندا سالادى. بۇرىن ءوز تۋىندىلارىنا كۇنشىعىس ەلىنىڭ اسەم تابيعاتىن كەسكىندەۋ ءۇشىن تاستار مەن جاڭعاقتاردى دا پايدالانىپ كەلگەن.
«سوڭعى جىلدارى الەمدە ءتۇرلى جان شوشىتارلىق جانجالدار كوبەيىپ, ونىڭ زاردابىن تابيعات, اسەرەسە, بالالار كورىپ جاتىر. الايدا, بەيكۇنا بۇلدىرشىندەردىڭ جان داۋىسىن ەستۋگە ەشكىم نازار اۋدارار ەمەس. ءوز شىعارمالارىمدا ولاردىڭ پەرىشتەدەي تۇنىق بەينەسىن سالۋ ارقىلى بەيبىتشىلىكتى ساقتاۋعا ۇلەس قوسۋدى كوزدەدىم», – دەدى توموكو حوۋكيو.
«قايعى جولى» دەپ اتالعان اتىراۋداعى بۇل كورمەسىنە 14 كارتيناسى قويىلدى. ولار جىبەكتەن جاسالعان ارنايى قاعازعا سالىنعان. كوپشىلىگىندە بالالار بەينەلەنگەن. اراسىندا الداعى ۋاقىتتا جاپونيانىڭ «شوۋدزيۋين» بۋددا عيباداتحاناسىنىڭ ىشكى كۇمبەزىنە ورنالاستىرىلاتىنى كوزدەلگەن 4 كارتيناسى دا بار.
جولداسبەك شوپەعۇل,
«ەگەمەن قازاقستان»
